«Я хацеў бы, каб мы ўжо разумелі і тэндэнцыі, і перспектывы бягучага года» 

— Мы традыцыйна ў сакавіку збіраемся і разглядаем вынікі работы за мінулы год, зацвярджаем фінансавую справаздачнасць, прымаем рашэнне аб размеркаванні прыбытку і па іншых пытаннях дзейнасці банка, — адзначыў Аляксандр Турчын. — Мінулы год, безумоўна, быў вельмі напружаным, але, тым не менш, вынікі могуць нас задавальняць. Банк развіцця выканаў усе даведзеныя паказчыкі. На мэту інвестыцыйнага фінансавання накіравана больш за 4 мільярды рублёў. Аб’ём выдачы экспартных крэдытаў за 2025 год склаў 4,4 мільярда рублёў. У 2025 годзе Банк развіцця працягнуў праграму падтрымкі суб’ектаў малога бізнесу. У рамках праграмы на гэтыя мэты было накіравана 375 мільёнаў рублёў. Пералічана ў бюджэт 330 мільёнаў. Таму яшчэ раз хачу падкрэсліць, што можна здавальняльна ацаніць работу банка за мінулы год. 

Кіраўнік беларускага ўрада таксама звярнуў увагу ўдзельнікаў мерапрыемства на тое, што пасяджэнне Назіральнага савета — гэта не толькі ацэнка вынікаў 2025 года. «У нас фактычна скончыўся першы квартал 2026 года. Банк развіцця ўвайшоў у новы цыкл работы — у першы год стратэгічнага плана развіцця. Таму я хацеў бы, каб мы ўжо разумелі і тэндэнцыі, і перспектывы бягучага года», — падкрэсліў Прэм’ер-міністр. 

На парадку дня пасяджэння Назіральнага савета значылася 18 пытанняў, большая частка з якіх разглядаецца адначасова Назіральным саветам і агульным сходам акцыянераў. 

«Ідзём з ростам 170 % па ўсіх кірунках дзейнасці» 

Як адзначыў у размове з журналістамі старшыня праўлення Банка развіцця Сяргей Сталярчук, па выніках 2025 года ўстановай выкананы ўсе даведзеныя Назіральным саветам і ўрадам паказчыкі. «Мы захоўваем лідарскія пазіцыі па фінансаванні экспарту (у банкаўскай сістэме гэта звыш 60 %), а таксама па фінансаванні доўгатэрміновых інвестыцыйных праектаў з доляй 37 %, — пералічыў ён. — Гаворачы аб інвестыцыях, гэта звыш 180 буйных інвестыцыйных праектаў. Мы нарасцілі партфель на 17 % у 2025 годзе, укаранілі новыя інструменты падтрымкі. Гэта і камерцыялізацыя навуковых распрацовак, і праекты ў галіне прамысловай іпатэкі. Запусцілі інструменты па падтрымцы будаўніцтва пладасховішчаў, а таксама мясной галіны. У цэлым у першы квартал мы бачым пазітыўную дынаміку, ідзём з ростам 170 % па ўсіх кірунках дзейнасці». 

Гаворачы аб інструментах падтрымкі турызму, кіраўнік банка заявіў, што ў скарбонцы ўстановы ўжо звыш 60 праектаў. «Гэта праекты ў галіне гасцініц, рэстараннага бізнесу, аўтобусаў, а таксама рознага роду праекты па экспарце. Летась пракрэдытавалі каля 90 вытворцаў, больш за 100 пазіцый па наменклатуры тэхнікі. Пры гэтым пракрэдытавалі экспарт у 18 краін, — канкрэтызаваў Сяргей Сталярчук. — Сёлета, не забываючы аб фінансаванні экспарту ў краінах далёкай дугі, памятаем пра краіны ЕАЭС. Ёсць праекты з Казахстанам, Узбекістанам, Кыргызстанам, Таджыкістанам. Буйны праект рэалізаваны летась па пастаўцы 100 аўтобусаў у Санкт-Пецярбург. Сёлета таксама ёсць шэраг буйных праектаў, кантракты па якіх заключаны на міждзяржаўным узроўні». 

У галіне падтрымкі малога і сярэдняга бізнесу Банк развіцця пераарыентаваў інструментарый на падтрымку інвестыцыйных праектаў у малым і сярэднім бізнесе і сёлета больш задзейнічае інфраструктуру Беларускага фонду падтрымкі прадпрымальнікаў, а таксама лізінгавай арганізацыі. 

«Нашы даўнія партнёры, у тым ліку на азіяцкіх і афрыканскіх рынках, вельмі пазітыўна ўспрынялі навіны аб зняцці амерыканскіх санкцый з Банка развіцця. І мы ўжо пачалі дыялог з міждзяржаўнымі банкамі, у тым ліку ў афрыканскім рэгіёне, дзе абмяркоўваем падтрымку фінансавання канкрэтных інвестыцыйных праектаў», — падзяліўся Сяргей Сталярчук. 

Гаворачы аб асноўных акцэнтах 2026 года, кіраўнік банка адзначыў тры прыярытэтныя кірункі. «Акрамя колькасных паказчыкаў, ёсць задачы па ўкараненні новых інструментаў падтрымкі ў кожным з сегментаў, у тым ліку і па трох асноўных кірунках, — падкрэсліў Сяргей Сталярчук. — Па экспарце гэта праекты па фінансаванні вытворчай лакалізацыі ў трэціх краінах. Мы бачым вялікія перспектывы па стварэнні сумесных вытворчасцяў, а таксама фінансавання ўжо сумеснай прадукцыі ў трэціх краінах». Акрамя таго, падобнае фінансаванне плануецца і ў Расіі. Кіраўнік банка адзначыў, што сёлета ў лакалізацыю вытворчасці будзе ўкладзена да 100 мільёнаў беларускіх рублёў, ёсць ужо тры канкрэтныя праекты. 

Данііл ХМЯЛЬНІЦКІ
Фота БелТА