У фокусе ўвагі Прэм’ер-міністра падчас знаёмства з вытворчымі магутнасцямі прадпрыемства — пашырэнне асартыменту і экспартны патэнцыял прадукцыі. 

Прадпрыемства ў Лідзе — яркі прыклад паспяховай работы ў выкананні задач па скарачэнні долі імпарту і вытворчасці імпартазамяшчальнай прадукцыі. Камбінат, які валодае глыбокай ступенню перапрацоўкі, рэалізуе амбіцыйныя праекты і актыўна развівае экспарт. У структуру ААТ «Лідскі малочна-кансервавы камбінат», акрамя галаўнога прадпрыемства, уваходзяць тры філіялы: «Ашмянскі сыраробны завод», «Смаргонскія малочныя прадукты» і «Навагрудскія дары».

— На ўсіх філіялах перапрацоўваецца больш за 1800 тон малака за суткі, а асартымент прадукцыі налічвае больш за 250 найменняў. Асноўныя напрамкі ўключаюць сухія малочныя прадукты, малочныя кансервы і сыры. Вырабляюцца практычна ўсе віды класічнага сыраробства: ад мяккіх сыроў да цвёрдых і паўцвёрдых. Візітнай карткай прадпрыемства з’яўляецца шырокі асартымент цэльнамалочнай прадукцыі, пазнаюць нас і па сырных чыпсах, якія вырабляюцца ў краіне ўпершыню, — расказала выконваючая абавязкі генеральнага дырэктара ААТ «Лідскі малочна-кансервавы камбінат» Ірына Філіпава.

Экспарт складае 70% ад агульнага аб’ёму прадукцыі. Асноўны рынак збыту— Расійская Федэрацыя, разам з тым на гэты момант асвоены рынкі 26 краін далёкай дугі. У асноўным за мяжу пастаўляюцца сухія малочныя прадукты. У планах камбіната — запуск шэрагу інвестыцыйных праектаў, накіраваных на павелічэнне аб’ёмаў перапрацоўкі малака і пашырэнне асартыменту прадукцыі. Сярод іх — вытворчасць канцэнтрату малочнага бялку, які будзе выкарыстоўвацца ў лячэбна-прафілактычным харчаванні, малочнай і кандытарскай прамысловасці, а таксама пры вытворчасці марожанага. У гэтым годзе плануецца запуск лініі разліву пітнога малака і ёгуртаў у бутэлькі, а таксама фасоўка сухіх малочных прадуктаў у спецыяльную ўпакоўку для захавання арганалептычных паказчыкаў і павелічэння тэрміну прыдатнасці.

На Ашмянскім сыраробным заводзе будзе запушчана лінія па вытворчасці сыроў з фіксаванай вагой у выглядзе слайсаў, а ў філіяле «Смаргонскія малочныя прадукты» — новая лінія марожанага і ўпакоўка тварагу ў мадыфікаваную тару для павелічэння тэрмінаў прыдатнасці. На «Навагрудскіх дарах» плануецца запуск сырнай лініі, што дасць магчымасць дадаткова вырабляць да 10 тон сыру за суткі.

Асаблівая ўвага надаецца вытворчасці сыроў з высакароднай блакітнай цвіллю, якія будуць выпускацца ў Любчанскім вытворчым цэху. Паралельна будзе ажыццяўляцца вытворчасць абязводжанага малочнага тлушчу, які будзе атрымлівацца ў працэсе вытворчасці канцэнтрату малочнага бялку. Попыт на прэміяльныя паўпрадукты, у тым ліку і на сыр з цвіллю становіцца ўсё больш высокім, асабліва сярод моладзі, якая цэніць смак і якасць. Прадукцыя камбіната запатрабавана на рынках СНД і ЕАЭС, уключаючы Расійскую Федэрацыю.

Як расказаў галоўны інжынер прадпрыемства Аляксандр Варабей, да 2030 года плануецца павялічыць аб’ём перапрацоўкі малака да 50% на ўсіх лакацыях вытворчасці.

— Камбінат ужо займае лідзіруючыя пазіцыі на сусветных рынках, і яго прадукцыя вядомая не толькі ў Беларусі, але і за яе межамі. Аднак жорсткая канкурэнцыя патрабуе пастаяннага ўдасканалення. Мадэрнізацыя ўключае не толькі рэканструкцыю цэхаў, але і глыбокую мадэрнізацыю існуючага абсталявання, што дасць магчымасць атрымліваць прадукцыю, якая адпавядае сучасным патрабаванням мікрабіялогіі і якасці. Адзін з ключавых праектаў — будаўніцтва цэха па вытворчасці канцэнтрату малочнага бялку. Будаўніча-мантажныя работы стартавалі ў канцы мая і працягваюцца ў цяперашні час. На гэты момант ужо было пастаўлена тэхналагічнае абсталяванне на суму ў 11,5 мільёна еўра. Чакаецца, што да канца чэрвеня пастаўка ўсіх неабходных кампанентаў будзе завершана. Запуск вытворчасці запланаваны на 2028 год. Гэты праект стане важным крокам у імпартазамяшчэнні і развіцці камбіната, — расказаў Аляксандр Варабей.

Пасля азнаямлення з вытворчасцю Прэм’ер-міністр правёў нараду на ААТ «Лідскі малочна-кансервавы камбінат», дзе абмеркавалі развіццё малочнай галіны. Асноўныя тэмы прадметнай размовы — пошук аптымальных механізмаў для павелічэння паставак у трэція краіны, распрацоўка дадатковых мер стымулявання эфектыўнага экспарту і павышэнне агульнай рэзультатыўнасці вытворчасці і перапрацоўкі малака. У нарадзе прынялі ўдзел міністр сельскай гаспадаркі і харчавання Юрый Горлаў, старшыня Гродзенскага аблвыканкама Юрый Караеў, прадстаўнікі Апарату Савета Міністраў Беларусі, кіраўнікі прадпрыемстваў галіны.

Вераніка КАЗЛОЎСКАЯ

Фота БелТА