«Навуковыя даследаванні ўсё часцей паказваюць, што награванне ежы ў пластыкавай упакоўцы можа вызваляць мікрапластык і хімічныя рэчывы, якія змяшчаюцца ў пластыку, у ежу, якую ўжываюць людзі», — гаворыцца ў матэрыяле.

Быў праведзены аналіз 24 навуковых даследаванняў, прысвечаных схаваным рызыкам для здароўя, звязаным з упакаванымі ў пластык гатовымі стравамі.

У адным з даследаванняў было паказана, што пры награванні ў мікрахвалевай печы кантэйнераў з полістыролу і поліпрапілену, напоўненых вадой, пасля захоўвання ў халадзільніку або маразільнай камеры, вылучалася ад 100 тыс. да 260 тыс. часціц мікрапластыку, а ў іншым даследаванні — што пяць хвілін награвання ў мікрахвалевай печы могуць вылучыць ад 326 тыс. да 534 тыс. часціц у ежу.

Паводле ацэнак, у розных тыпах пластыку змяшчаецца каля 16 тыс. розных хімічных рэчываў і з іх каля 4,2 тыс. ідэнтыфікаваныя як небяспечныя. Многія з іх выклікаюць рак, бясплоддзе, парушэнне гарманальнага балансу і метабалічныя захворванні, адзначаецца ў справаздачы.

Даследаванні таксама паказалі, што 1396 хімічных рэчываў, якія змяшчаюцца ў пластыку і кантактуюць з харчовымі прадуктамі, былі выяўленыя ў арганізме чалавека, прычым некаторыя з іх небяспечныя для здароўя чалавека.

«Людзі думаюць, што робяць бяскрыўдны выбар, калі купляюць і разаграваюць ежу, упакаваную ў пластык. У рэчаіснасці мы падвяргаемся ўздзеянню сумесі мікрапластыку і небяспечных хімічных рэчываў, якія ні ў якім разе не павінны знаходзіцца ў нашай ежы або побач з ёй», — заявіў Грэм Форбс, кіраўнік глабальнай кампаніі па барацьбе з пластыкам з Greenpeace USA.