Адвакат нагадала, што любыя гаджэты ў школе забаронены. Калі дзіця прыносіць з сабой тэлефон, яно павінна пакінуць яго ў пэўным месцы. «Калі здараецца так, што яно прынесла і ўпотай пачало здымаць настаўніка на ўроку або на перапынку, а потым выкладвае гэта ў Сетку, то пачынае працаваць закон аб абароне персанальных даных», — адзначыла Зарына Залеўская.

Яна дадала, што для распаўсюджвання інфармацыі аб чалавеку, яго знешнасці, нават голасе неабходна згода. «Калі такой згоды няма, то чалавек мае права звярнуцца альбо ў праваахоўныя органы, альбо ў суд для кампенсацыі матэрыяльнай або маральнай шкоды. Таксама бываюць выпадкі, калі дзіця выкладвае выяву настаўніка і пад гэтай фатаграфіяй размяшчае нейкія непрыемныя словы, музыку, якая зневажае настаўніка. У такой сітуацыі педагог таксама мае права звярнуцца ў праваахоўныя органы. Такія дзеянні дзіцяці могуць быць кваліфікаваны як дробнае хуліганства, абраза або паклёп», — падкрэсліла адвакат.

Зарына Залеўская нагадала, што настаўнік не мае права павышаць голас на вучня, што б той ні зрабіў. «Калі вучні запісалі настаўніка толькі з мэтай сваёй абароны, гэта, напэўна, не зусім этычна. Яны павінны былі звярнуцца да дырэктара школы, да сваіх бацькоў або ў праваахоўныя органы і расказаць аб тым, што такая сітуацыя здарылася», — растлумачыла яна.