Фігурантамі праходзяць 50-гадовы жыхар Асіповічаў, а таксама 23-гадовы і 37-гадовы барысаўчане, якія ўступілі ў змову. «Ведаючы аб планаванай перавозцы буйной сумы наяўных з нашай краіны ў суседнюю, яны распрацавалі план крадзяжу. Пераследавалі аўтамабіль з грашыма з тэрыторыі Беларусі, а на АЗС у Смаленскай вобласці фігуранты знайшлі транспартны сродак і забралі амаль $130 тыс. у эквіваленце. Затым вярнуліся дадому», — расказалі ў МУС. 

Мужчын затрымалі пры сілавой падтрымцы байцоў СПБТ «Алмаз». Двое з іх раней судзімыя. 

Па даных прадстаўніка ГУБАЗіК МУС Уладзіміра Гарагляда, у жыллі зламыснікаў выяўленая і канфіскаваная частка выкрадзенага. Астатняе яны паспелі патраціць — куплялі нерухомасць, наведвалі ігральныя ўстановы, арганізоўвалі адпачынак.

Заведзена крымінальная справа за крадзеж у асабліва буйным памеры. Фігурантам пагражае да 12 гадоў пазбаўлення волі. Устанаўліваюцца іншыя факты іх злачыннай дзейнасці.

У МУС папярэдзілі: «Грамадзяне нашай краіны, якія здзейснілі злачынствы за яе межамі і не панеслі там пакарання, не вызваляюцца ад адказнасці, а адказваюць па беларускіх законах».