У лістападзе міжнародная арганізацыя DataReportal выпусціла апошнюю справаздачу Digital 2026: Belarus. У ёй утрымліваецца інфармацыя аб развіцці асноўных лічбавых тэхналогій у нашай краіне: ад ахопу мабільнай сувяззю да пераваг беларусаў сярод шырокага веера сацыяльных сетак. Падрабязнасці — у нашым матэрыяле.
Для пачатку варта зрабіць агаворку, што ўсе даныя ў справаздачы прадстаўлены за перыяд кастрычнік—лістапад 2025 года і з’яўляюцца актуальнымі.
Як адзначылі ў Міністэрстве сувязі і інфарматызацыі, асаблівасць платформы — гэта агрэгацыя і аналітыка даных з розных крыніц, уключаючы міжнародную статыстыку ад такіх арганізацый, як GSMA Intelligence, ITU (Міжнародны саюз электрасувязі), даныя нацыянальных статыстычных службаў і буйных інтэрнэт-кампаній (напрыклад, Google і Meta).
Асноўныя статыстычныя даныя даюць выдатны агляд «стану лічбавых тэхналогій» у Беларусі, але для таго, каб зразумець, як развіваліся лічбавыя тэндэнцыі і паводзіны, неабходна паглыбіцца ў самі лічбы. Давайце разам паглядзім, што кажуць даныя даследавання.
Мабільная сувязь
Паводле звестак GSMA Intelligence, на канец 2025 года ў Беларусі налічвалася 11,4 мільёна падключэнняў да сотавай мабільнай сувязі. Многія выкарыстоўваюць больш як адно мабільнае падключэнне, таму нядзіўна, што паказчыкі мабільнай сувязі значна перавышаюць паказчыкі для ўсяго насельніцтва.
Напрыклад, адзін і той жа чалавек можа выкарыстоўваць адно мабільнае падключэнне для асабістых патрэб, а асобнае — для работы. Распаўсюджванне eSIM у апошнія гады яшчэ больш спрасціла гэты працэс.
Сапраўды, даныя GSMA Intelligence паказваюць, што ў кастрычніку 2025 года ахоп мабільнай сувяззю ў Беларусі складаў 127 % ад агульнай колькасці насельніцтва.
Паводле даследавання, 96,1 % мабільных падключэнняў у Беларусі цяпер можна лічыць «шырокапалоснымі», а гэта азначае, што яны падключаюцца праз мабільныя сеткі 3G, 4G або 5G.
Аднак прылады, якія падключаюцца да «шырокапалосных» мабільных сетак, не абавязкова выкарыстоўваюць сотавыя мабільныя даныя (напрыклад, некаторыя тарыфныя планы могуць уключаць толькі доступ да паслуг галасавой сувязі і SMS), таму гэты паказчык шырокапалоснай сувязі не варта разглядаць як прыблізны паказчык выкарыстання мабільнага інтэрнэту.
Выкарыстанне інтэрнэту
На момант складання справаздачы аналіз апошніх даступных звестак, праведзены Kepios, паказаў, што ў кастрычніку 2025 года ў Беларусі налічвалася 8,47 мільёна інтэрнэт-карыстальнікаў. Гэта азначае, што ўзровень пранікнення інтэрнэту ў Беларусі на канец года склаў 94,3 % ад агульнай колькасці насельніцтва.
Даныя пра карыстальнікаў таксама кажуць пра тое, што 515 тысяч чалавек у Беларусі не карысталіся інтэрнэтам па стане на канец 2025-га, а гэта сведчыць пра тое, што 5,7 % насельніцтва заставаліся «афлайн» на канец года.
Апублікаваныя даныя паказваюць, што да канца 2025-га карыстальнікі інтэрнэту ў Беларусі маглі чакаць наступную хуткасць інтэрнэт-злучэння (у мегабітах у секунду (Мбіт/с)):
- Сярэдняя хуткасць загрузкі мабільнага інтэрнэту праз сотавыя сеткі перадачы даных: 18,55 Мбіт/с.
- Медыянная хуткасць загрузкі фіксаванага інтэрнэту: 80,13 Мбіт/с.
Даныя Ookla паказваюць, што за дванаццаць месяцаў па стане на жнівень 2025 года сярэдняя хуткасць загрузкі мабільнага інтэрнэту ў Беларусі вырасла на 6,57 Мбіт/с (+54,8 %).
Між тым, даныя кампаніі сведчаць, што хуткасць загрузкі тыповага фіксаванага інтэрнэт-падключэння ў Беларусі за той жа перыяд павялічылася на 19,08 Мбіт/с (+31,3 %).
Статыстыка сацыяльных сетак
Аналіз паказвае, што ў кастрычніку бягучага года ў Беларусі налічвалася 7,64 мільёна актыўных карыстальнікаў сацыяльных сетак. Дарэчы, гэты паказчык эквівалентны 85 % ад агульнай колькасці насельніцтва Беларусі на канец 2025-га.
Аднак, хоць метадалогія накіравана на «дэдуплікацыю» карыстальнікаў сацыяльных сетак на розных сацыяльных платформах і, па магчымасці, на выдаленне ўліковых запісаў, якія не ўяўляюць асобных карыстальнікаў-людзей, важна падкрэсліць, што паказчыкі ідэнтыфікацыйных даных карыстальнікаў сацыяльных сетак могуць не прадстаўляць канкрэтных асоб.
Аналіз Kepios паказвае, што колькасць карыстальнікаў сацыяльных сетак у Беларусі павялічылася на 1,8 мільёна (+30,6 %) у перыяд з канца 2024 года да канца 2025-га.
Звяртаючы ўвагу на дэмаграфічныя характарыстыкі карыстальнікаў, даныя, апублікаваныя ў інструментах планавання рэкламы вядучых платформаў сацыяльных сетак, паказваюць, што па стане на канец 2025 года ў Беларусі налічвалася 7,64 мільёна карыстальнікаў ва ўзросце 18 гадоў і старэй, якія карысталіся сацыяльнымі сеткамі, што эквівалентна 105,6 % ад агульнай колькасці насельніцтва ва ўзросце 18 гадоў і старэй.
Што датычыцца гендарнага прынцыпу, то на момант даследавання 45,3 % карыстальнікаў сацыяльных сетак у Беларусі — гэта жанчыны, а 54,7 % — мужчыны.
Для дадатковага кантэксту карысна ведаць, што 90,2 % ад агульнай базы інтэрнэт-карыстальнікаў Беларусі (незалежна ад узросту) выкарыстоўвалі як мінімум адну платформу сацыяльных сетак у кастрычніку 2025 года.
Якія сацсеткі самыя папулярныя?
Паводле звестак рэсурсаў Meta, на канец 2025 года колькасць карыстальнікаў Facebook — прыхільнасць да якой праяўляе больш старэйшае пакаленне — у Беларусі складала 685 тысяч. Што датычыцца яшчэ адной сацсеткі, якая належыць Meta і карыстаецца папулярнасцю ў больш маладога пакалення — Instagram, — на канец года колькасць карыстальнікаў гэтай сацсеткі ў Беларусі складала 3,9 мільёна чалавек.
Даныя, апублікаваныя ў інструментах планавання Meta, таксама сведчаць, што самай масавай сацсеткай, дзе прысутнічаюць беларусы, паводле даследавання, з’яўляецца TikTok з паказчыкам 7,64 мільёна карыстальнікаў ва ўзросце 18 гадоў і старэй.
Менш папулярная, але таксама прадстаўленая ў Беларусі сацсетка LinkedIn, па стане на канец 2025-га колькасць яе «ўдзельнікаў» складала 1,1 мільёна.
Яшчэ адна сацсетка — X — звесткі якой паказваюць, што на канец 2025 года ў Х было 176 тысяч карыстальнікаў у нашай краіне.
І, нарэшце, Threads. Паводле звестак рэкламных інструментаў Meta, на канец 2025 года колькасць карыстальнікаў гэтай сацсеткі ў Беларусі складала 533 тысячы.
