Ігар Сергяенка падкрэсліў, што будаўніцтва новага энергаблока, безумоўна, яшчэ больш узмоцніць энергетычную самастойнасць нашай краіны. «Улічваючы патрэбнасці, якія растуць, — і прамысловасці, і эканомікі ў цэлым, і насельніцтва, — усё часцей паўстае пытанне аб ацяпленні: прыватных дамоў, асобных збудаванняў. І ўсё часцей мы вырашаем яго менавіта за кошт электраэнергіі. Таму патрэба ў дадатковых магутнасцях, вядома ж, высокая, і яна будзе толькі расці», — адзначыў ён. 

Адначасова з гэтым застаюцца ключавымі пытанні надзейнасці і бяспечнага функцыянавання станцыі. «І сёння, пабываўшы на БелАЭС, мы пераканаліся: усё тут працуе выразна, адладжана, сістэмна», — сказаў Ігар Сергяенка.

Асаблівая ўвага надаецца падрыхтоўцы кадраў — і ў ВНУ, і ва ўстановах сярэдняй спецыяльнай адукацыі. Ужо цяпер фарміруецца каманда нацыянальных спецыялістаў, цалкам гатовых забяспечваць стабільную і бяспечную работу станцыі, дадаў Старшыня Палаты прадстаўнікоў.

Гендырэктар БелАЭС Сяргей Бабовіч расказаў дэпутатам, што з пачатку 2025 года станцыя выпрацавала на 1 млрд кВт. г электраэнергіі больш, чым за аналагічны перыяд мінулага года. Дэпутатам таксама наглядна прадэманстравалі, дзе менавіта плануецца пабудаваць трэці блок і як гэта паўплывае на работу беларускай энергасістэмы.