Са словамі віншавання і прызнання заслуг калектыву Інстытута лесу НАН Беларусі выступіў старшыня Гомельскага аблвыканкама Іван Крупко. Кіраўнік рэгіёна падкрэсліў, што 95-годдзе інстытута — гэта не проста юбілей установы, а падзея для ўсёй навуковай школы, якая ўжо амаль стагоддзе фарміруе стратэгію развіцця беларускага лесагаспадарчага комплексу.

— Гісторыя інстытута — гэта летапіс працы і дасягненняў некалькіх пакаленняў вучоных, сапраўдных падзвіжнікаў навукі, якія прысвяцілі жыццё справе захавання і прымнажэння зялёнага багацця нашай роднай Беларусі, — самыя шчырыя словы падзякі калектыву выказаў Іван Крупко.

Кіраўнік вобласці нагадаў, што менавіта ў Гомелі фарміраваліся асновы сучаснай беларускай лясной навукі — ад пасляваеннага аднаўлення да генетычнай селекцыі і біятэхналогій.

— У нашым рэгіёне лес заўсёды быў не проста прыродным рэсурсам, а часткай жыцця, характарам і лёсам, — зазначыў старшыня аблвыканкама. — Дзякуючы працы соцень даследчыкаў створана магутная навуковая база, закладзены падмурак сучаснай селекцыі, экалогіі і абароны лясоў.

Ён асабліва адзначыў стварэнне генетычнага банка лясных рэсурсаў, развіццё селекцыйнай базы, а таксама інавацыйныя біяпрэпараты, якія дазваляюць своечасова выяўляць і ліквідаваць асяродкі шкоднікаў.

— Пасля аварыі на Чарнобыльскай АЭС менавіта Інстытут лесу стаў піянерам у галіне лясной радыеэкалогіі, унёс неацэнны ўклад у рэабілітацыю пацярпелых тэрыторый. Гэта вялікая работа, якая мае значэнне для ўсяго ляснога фонду краіны, — падкрэсліў Іван Крупко.

Асаблівыя словы падзякі кіраўнік рэгіёна адрасаваў ветэранам навукі, з пажаданнямі плённай дзейнасці звярнуўся да маладых даследчыкаў.

Са свайго боку старшыня Прэзідыума Нацыянальнай акадэміі навук Беларусі Уладзімір Каранік адзначыў, што гісторыя інстытута — гэта частка гісторыі краіны.

— За 95 гадоў калектыў інстытута перажыў шмат падзей разам з народам: і цяжкія, і светлыя. Гэта і трагедыя вайны, калі супрацоўнікі змагаліся за Радзіму, і гады эвакуацыі, аднаўленне матэрыяльнай базы, адраджэнне лясоў, якія моцна пацярпелі, — нагадаў Уладзімір Каранік.

Са станаўленнем незалежнасці нашай краіны Інстытут лесу атрымаў новы імпульс развіцця: узмацнілася матэрыяльна-тэхнічная база, з’явіліся новыя навуковыя кірункі, у тым ліку ў сферы біятэхналогій і аховы экасістэм.

— Рэспубліка Беларусь — адзіная краіна на постсавецкай прасторы, якая за гады незалежнасці здолела павялічыць сваю лясістасць, пашырыць плошчу лясоў. Паколькі рацыянальнае лесакарыстанне, аднаўленне лясоў, іх абарона — гэта дзяржаўная справа, тое, што ад нас патрабуе Прэзідэнт, тое, што выконваюць усе органы дзяржкіравання, — падкрэсліў старшыня Прэзідыума НАН Беларусі.

Уладзімір Каранік заклікаў навукоўцаў і надалей захоўваць пераемнасць пакаленняў у калектыве, каб і надалей актыўна развіваць сваю ўстанову. 

— Мы ўсведамляем адказнасць перад будучымі пакаленнямі. Як сказаў мудры чалавек, мы не атрымалі гэту зямлю ў спадчыну ад бацькоў, мы ўзялі яе ў пазыку ў сваіх унукаў. І я ўпэўнены, што сумеснымі намаганнямі мы перададзім Беларусь яшчэ прыгажэйшай, — выказаў упэўненасць старшыня Прэзідыума НАН Беларусі.

У гонар 95-годдзя Інстытута лесу НАН Беларусі старшыня аблвыканкама Іван Крупко, старшыня Прэзідыума Нацыянальнай акадэміі навук Беларусі Уладзімір Каранік, дырэктар Цэнтральнага батанічнага сада Фёдар Прывалаў і старшыня Гомельскага гарвыканкама Уладзімір Прывалаў высадзілі на тэрыторыі Гомельскага палацава-паркавага ансамбля дрэва катальпа. Дзякуючы інавацыйнай распрацоўцы лабараторыі батанічнага сада, гэта рэдкая расліна стала максімальна адаптавана да кліматычных умоў Беларусі.

Наталля КАПРЫЛЕНКА, 
фота ТК «Гомельшчына афіцыйна»