Расследаваннем шматэпізоднай справы займаліся супрацоўнікі аддзела лічбавага развіцця папярэдняга следства УСК па Гомельскай вобласці.

Згодна з матэрыяламі справы, летам 2022 года 18-гадовы жыхар Гомеля, навучэнец аднаго з каледжаў, праз месенджар знайшоў ананімнага «работадаўцу», які і прапанаваў маладому чалавеку плату за збор і прадастаўленне персанальных даных іншых грамадзян для рэгістрацыі банкаўскіх кабінетаў і выпуску карт. Усведамляючы незаконнасць такой дзейнасці, гамяльчанін тым не менш пагадзіўся і пачаў шукаць людзей, гатовых за невялікую ўзнагароду перадаць яму даныя сваіх пашпартоў, нумары тэлефонаў, а таксама коды з SMS для доступу да банкаўскіх дадаткаў. Усю сабраную інфармацыю ён затым перапраўляў свайму «наймальніку», разумеючы, што рахункі будуць выкарыстоўвацца для пераводу ў наяўныя грошы тых сродкаў, што былі выкрадзены.

З часам абвінавачаны ўцягнуў у гэту супрацьпраўную дзейнасць сваіх знаёмых, і сетка так званых «дропаў» — асоб, якія прадастаўлялі доступ да сваіх банкаўскіх рахункаў, — пашырылася да больш за 120 чалавек. Аднак ужо праз паўтара месяца яе актыўнасць была зафіксавана праваахоўнымі органамі. Спрабуючы пазбегнуць адказнасці, малады чалавек уцёк і быў аб’яўлены ў вышук. У пачатку 2025 года яго затрымалі на тэрыторыі Расійскай Федэрацыі і вярнулі ў Беларусь.

У ходзе расследавання было ўстаноўлена, што абвінавачаны перадаў свайму ананімнаму «работадаўцу», які з’яўляецца, па даных следства, стваральнікам адной з анлайн-супольнасцяў, што спецыялізуюцца на махлярстве, ідэнтыфікацыйныя даныя 127 чалавек. Следчыя правялі карпатлівую работу: запатрабавалі і прааналізавалі аб’ёмныя банкаўскія выпіскі, даследавалі шмат інфармацыі. З прымяненнем аўтаматызаванай інфармацыйнай сістэмы «След» удалося даказаць дачыненне фігуранта да 42 эпізодаў крадзяжоў грошай у жыхароў Гомельскай і іншых абласцей. Агульная шкода, прычыненая пацярпелым, перавысіла 160 тысяч беларускіх рублёў. 

У выніку гамяльчаніну было прад’яўлена абвінавачанне ў дапамозе махлярству і мадыфікацыі камп’ютарнай інфармацыі, учыненай групай асоб, у тым ліку па папярэдняй змове, у асабліва буйным памеры. Малады чалавек быў прыгавораны да 5 гадоў і 6 месяцаў пазбаўлення волі ў калоніі ўзмоцненага рэжыму і штрафу ў памеры 100 базавых велічынь.

Як адзначыла афіцыйны прадстаўнік УСК па Гомельскай вобласці Марыя Крываногава, рэгістрацыя карт або прадастаўленне рэквізітаў староннім асобам пад любой падставай катэгарычна недапушчальна. Увогуле вельмі важна з асцярожнасцю ставіцца да просьбаў незнаёмцаў, у тым ліку выпадковых спадарожнікаў і інтэрнэт-суразмоўцаў, перавесці для іх грошы, выкарыстоўваць ваш рахунак для транзітных аперацый. Падобныя дзеянні не толькі пагражаюць фінансавай бяспецы, але і могуць зрабіць уладальніка рахунку саўдзельнікам злачынства.

Аміна НАЗАРАВА, 

фота з адкрытых крыніц.