Беларусь узаемадзейнічае з БРІКС у статусе дзяржавы-партнёра з пачатку гэтага года. Рэспубліцы ўдалося ўвайсці ў першы пул краін-партнёраў адразу пасля заснавання гэтага інстытута па выніках папярэдняга саміту БРІКС у Казані.

«Мы ўдзячны дзяржавам — членам БРІКС за аказаную нам падтрымку на гэтым этапе, аднак захоўваем канчатковую задачу атрымання нашай краінай паўнапраўнага членства ў БРІКС. Мы будзем да гэтага імкнуцца па меры таго, як аб’яднанне будзе гатова да далейшага пашырэння», — сказаў Максім Рыжанкоў.

Супрацоўніцтва з БРІКС на бягучым этапе Беларусь ажыццяўляе з улікам магчымасцей свайго статусу. Так, краіна ўдзельнічала ў пасяджэнні міністраў замежных спраў БРІКС, якое праводзілася ў Рыа-дэ-Жанейра ў красавіку 2025 года. А ў ліпені — упершыню ў статусе партнёра — прыняла ўдзел у саміце БРІКС.

«Беларусь ужо традыцыйна прымае ўдзел у мерапрыемствах парламенцкага вымярэння БРІКС, і гэты год не стаў выключэннем: дэлегацыя нашага Нацыянальнага сходу ўдзельнічала ў XI Парламенцкім форуме БРІКС у Бразіліі. Асаблівую цікавасць для нас уяўляе маладзёжнае вымярэнне БРІКС. Праца з моладдзю — гэта інвестыцыі ў будучыню. У Беларусі гэта адзін з найважнейшых прыярытэтаў нацыянальнага развіцця. Мы падтрымліваем і будзем і ў далейшым уносіць уклад у маладзёжны рух БРІКС, аб чым было заяўлена беларускімі ўдзельнікамі 11-га Маладзёжнага саміту БРІКС, які праходзіў нядаўна ў Бразіліі», — адзначыў міністр.

Пры гэтым Беларусь, паводле яго слоў, перш за ўсё настроена на актыўны ўдзел у практычнай дзейнасці БРІКС, у канкрэтных мерапрыемствах па прыярытэтных напрамках работы аб’яднання.

«Імкнемся напоўніць нашу працу канкрэтнымі дзеяннямі і ініцыятывамі. Мы ўдзячны бразільскаму старшынству за запрашэнні да ўдзелу ў дыскусіях і мерапрыемствах па тэматыцы змянення клімату, лічбавай трансфармацыі і штучнага інтэлекту, урбанізацыі, супрацоўніцтва ў сферах энергетыкі, аховы здароўя, гандлю, адукацыі, якія праводзяцца на пляцоўках БРІКС», — дадаў кіраўнік знешнепалітычнага ведамства.

Прыярытэтным напрамкам дзейнасці Беларусі ў БРІКС ён назваў умацаванне супрацоўніцтва ў сферах палітыкі і бяспекі, заснаванага на прынцыпах узаемнай павагі, непадзельнай бяспекі, гарантый краінавага развіцця без канфрантацыі і супрацьборства. «Гэта неабходная ўмова для пабудовы справядлівай шматпалярнай сістэмы міжнародных адносін, — заявіў Максім Рыжанкоў. — Мы абсалютна салідарныя і падзяляем пазіцыю бразільскага старшынства ў дачыненні да неабходнасці паслядоўнай абароны шматбаковага падыходу ў міжнародных адносінах. Гэта адзіны шлях да захавання міжнароднага парадку ва ўмовах прагрэсіруючай палярызацыі і пагрозы фрагментацыі свету».

Дыпламат перакананы, што роля БРІКС як апоры шматпалярнага свету сёння становіцца крытычна важнай.

«Наша дзейнасць у БРІКС накіравана на ўстойлівае эканамічнае развіццё, накіраванае на захаванне і памнажэнне чалавечага патэнцыялу, забеспячэнне высокіх сацыяльных стандартаў і дастойнай якасці жыцця, укараненне інавацый і найноўшых тэхналогій. Беларусь падтрымлівае ініцыятывы Бразіліі па ўмацаванні глабальнага супрацоўніцтва ў галіне аховы здароўя, уключаючы запуск у рамках БРІКС Партнёрства па ліквідацыі сацыяльна абумоўленых хвароб», — адзначыў міністр.

У гэтым годзе Бразілія таксама з’яўляецца старшынёй глабальнай кліматычнай канферэнцыі COP-30. Максім Рыжанкоў у сувязі з гэтым звярнуў увагу, што праблематыка змянення клімату займае прыярытэтнае становішча на парадку дня БРІКС. «Цалкам падтрымліваем меркаванне, выказанае прэзідэнтам Бразіліі: БРІКС мае дастатковую палітычную сілу, каб рэалізаваць амбіцыйныя мэты Канферэнцыі па змяненні клімату і забяспечыць эканамічны рост разам з сацыяльнай і экалагічнай справядлівасцю», — падкрэсліў кіраўнік знешнепалітычнага ведамства.

Беларусь разлічвае далучыцца да фінансавага інстытута БРІКС — Новага банка развіцця — і засяродзіць намаганні на сумеснай рабоце па стварэнню якасных умоў для развіцця гандлёва-інвестыцыйнага супрацоўніцтва ў аб’яднанні, распрацоўцы новых абароненых механізмаў фінансавых разлікаў і рэалізацыі інвестыцыйных праектаў на прасторы БРІКС.

«Я пералічыў толькі некаторыя напрамкі дзейнасці БРІКС, у якіх Беларусь актыўна задзейнічана. Зразумела, нашыя інтарэсы і амбіцыі значна шырэйшыя. Мы гатовы да ўсебаковага супрацоўніцтва ў рамках БРІКС і заклікаем актыўна ўключаць дзяржавы-партнёры ў дзейнасць аб’яднання. Беларусь бачыць у БРІКС не проста аб’яднанне, а стратэгічную платформу будучыні. Перад яе членамі стаяць амбіцыйныя задачы, якія патрабуюць скаардынаваных намаганняў. Беларусь гатова прымаць актыўны ўдзел у гэтай важнай рабоце», — рэзюмаваў Максім Рыжанкоў.