Комплекс размяшчаецца ў вёсцы Голубы Мастоўскага раёна, аб’ядноўвае прыродаахоўную дзейнасць і турызм. Ён уключае пяць камфартабельных нумароў для адпачынку з начлегам. Госці могуць арандаваць байдаркі для сплаваў, прагуляцца пешымі маршрутамі або адправіцца ў велапрагулкі па ваколіцах, спыніцца на абсталяваных стаянках.

Дырэктар ДПУ «Ліпічанская пушча» Андрэй Варабей адзначыў, што паслугі па пражыванні ў візіт-цэнтры плануецца аказваць з ліпеня. Цяпер вырашаюцца тэхнічныя пытанні.

Тэрыторыю візіт-цэнтра плануецца развіваць як музей пад адкрытым небам. Ужо цяпер тут прадстаўлены аўтэнтычныя экспанаты, уключаючы падняты са дна ракі стогадовы «човен» (лодка), саламяны вулей.

«Каб захаваць культуру і гісторыю мясцовых жыхароў, паказаць, чым багатыя нашы лясы, вырашылі стварыць невялікую экспазіцыю. Частку экспанатаў размясцілі пад адкрытым небам. Будзем і далей напаўняць прастору. Задумак шмат, у тым ліку па добраўпарадкаванні, афармленні месцаў адпачынку, будаўніцтве глэмпінгаў. Бачым, што папулярнасць экалагічнага турызму расце. Павышаюцца і патрабаванні да ўмоў адпачынку, харчавання», — падзяліўся Андрэй Варабей.

Як расказала дырэктар Мастоўскага ТІЦ Вольга Хальцова, візіт-цэнтр закліканы стаць цэнтрам прыцягнення для аматараў актыўнага адпачынку і знатакоў прыроды. Тут можна атрымаць вычарпальную інфармацыю пра флору і фа, маршруты для прагулак.

Заказнік «Ліпічанская пушча» размешчаны ў міжрэччы Нёмана і Шчары (на стыку Мастоўскага, Дзятлаўскага і Шчучынскага раёнаў). Ён знакаміты векавымі дубровамі, гістарычнымі партызанскімі сцежкамі. На тэрыторыі пушчы абсталявана 12 турыстычных стаянак прама ля берагоў рэк. Там ёсць месцы для намётаў, альтанкі, вогнішчы. Тут размешчана Свята-Траецкая шчарская крыніца, музей-зямлянка каля вёскі Шымкі.