У 12.00 па мінскім часе ў Лівінья пачнецца кваліфікацыя ў лыжнай акрабатыцы ў дзяўчат. Адборачны турнір павінен быў прайсці 17 лютага, але быў перанесены на суткі з-за моцнага снегападу. У стартавым пратаколе 25 спартсменак, сярод іх беларускі Ганна Гуськова, Анастасія Андрыянава і Ганна Дзяруга. Па выніках першай кваліфікацыі далей пройдзе лепшая шасцёрка, яшчэ шэсць пуцёвак будуць разыграны ў другім раўндзе. Пачатак фіналу — у 15.00.

Таксама апоўдні ў Карціна-д’Ампеца стартуюць спаборніцтвы ў жаночым слаламе. На трасу выйдуць 95 дзяўчат, у тым ліку наша Марыя Шканава, у якой 44-ы нумар. Для траплення ў другую спробу неабходна паказаць вынік у топ-30. Для беларускай гарналыжніцы гэта Алімпіяда стане пятай у кар’еры, чатыры гады таму Марыя была 20-й. Лепшым вынікам Шканавай у бягучым розыгрышы Кубка свету з’яўляецца 44-е месца.