Адкрыты дыялог адбыўся ў рамках дыскусійнай пляцоўкі «Беларусь — свету», арганізатарам якога традыцыйна выступае Беларускі дзяржаўны ўніверсітэт. Ініцыятыва дае магчымасць студэнтам нефармальна паразмаўляць з прадстаўнікамі дзяржаўных органаў і ведамстваў, грамадскіх аб’яднанняў і экспертнай супольнасці. Сімвалічна, што сустрэча адбылася напярэдадні другога пасяджэння VII Усебеларускага народнага сходу.
Размову з моладдзю аб прафсаюзным руху лідар нацыянальнага прафцэнтра пабудаваў праз прызму сацыяльна-эканамічнага развіцця краіны. Для кожнага грамадзяніна Рэспублікі Беларусь важна, як будзе развівацца краіна не толькі ў палітычным, але і сацыяльна-эканамічным плане. І моладзь у гэтым пытанні таксама не абыякавая.
Сустрэчы з маладымі людзьмі — неад’емная частка работы прафсаюзаў. Гэта магчымасць пачуць, што цікавіць сёння маладых беларусаў, якія ў іх чаканні ці перажыванні. Нярэдка менавіта ў такіх адкрытых дыялогах нараджаюцца яркія ініцыятывы і прапановы. А прафсаюзы заўсёды гатовы дапамагчы з рэалізацыяй.
— Вы — наша будучыня. Вам важна сёння ведаць тыя працэсы, што адбываюцца ў свеце, каб фарміраваць аб’ектыўную карціну. Яна павінна быць непрадузятай. Трэба разумець перадгісторыю тых ці іншых пытанняў, каб прымаць правільныя рашэнні ў сваёй прафесійнай дзейнасці, — адзначыў на сустрэчы Старшыня ФПБ Юрый Сянько.
Ён таксама звярнуў увагу, што Беларусь заўсёды адстойвала толькі мірныя ініцыятывы, прасоўвала каштоўнасці сацыяльнай справядлівасці і раўнапраўя.
— Ва ўсёй нашай рабоце мы прытрымліваемся прынцыпу — вырашаць усе пытанні шляхам дыялогу. Упэўнены, наша моладзь працягне гэтыя традыцыі і забяспечыць мірнае і паступальнае развіццё краіны, — дадаў Юрый Сянько.
У цэлым дыялог са студэнтамі ахапіў шырокі спектр тэм: гэта і прафесійны шлях, і дзейнасць ФПБ, і інструменты абароны правоў працаўнікоў, і патэнцыяльныя выклікі, з якімі можа сутыкнуцца моладзь на рынку працы. Падчас дыялогу «на роўных» маладыя людзі без сарамлівасці змаглі задаць лідару нацыянальнага прафцэнтра розныя пытанні. Напрыклад, для студэнтаў-міжнароднікаў, безумоўна, цікавы быў досвед работы Старшыні ФПБ на розных міжнародных пляцоўках.
— Для мяне сустрэча аказалася карыснай. Адгукнуўся і наказ працаваць карпатліва і ўпарта на займаных пасадах, служыць дзеля дабрабыту сваёй краіны. Гэта якраз тыя якасці, якія патрэбныя кіраўнікам, — падзяліўся сваімі ўражаннямі Канстанцін Русы, старшыня пярвічнай прафсаюзнай арганізацыі студэнтаў факультэта міжнародных адносін БДУ.
Трэба адзначыць, што Федэрацыя прафсаюзаў Беларусі ўдзяляе вялікую ўвагу рабоце з моладдзю, пытанням іх сацыяльнай падтрымкі і абароны. Прафсаюзы на пастаяннай аснове вядуць работу па ўключэнні ў пагадненні рознага ўзроўню, калектыўныя дагаворы арганізацый дадатковых норм і гарантый, якія паляпшаюць становішча маладых людзей.
Акрамя таго, прафсаюзы ўдзельнічаюць у распрацоўцы нарматыўных прававых актаў. Напрыклад, па ініцыятыве ФПБ у Падатковы кодэкс была ўнесена норма аб штомесячным падатковым выліку для выпускнікоў вышэйшых, сярэдніх спецыяльных і прафесійна-тэхнічных устаноў адукацыі, накіраваных на работу па размеркаванні. Таксама вырашана пытанне аб павелічэнні памеру выплат па часовай непрацаздольнасці для маладых работнікаў, якія маюць стаж работы менш як паўгода.
Алена КРАВЕЦ
