У панядзелак, 3 жніўня, Жаночая тэнісная асацыяцыя (WTA) апублікавала абноўленую версію рэйтынгу ў адзіночным і парным разрадах. Прадстаўніца Беларусі Арына Сабаленка (8550 ачкоў) па-ранейшаму лідзіруе і рыхтуецца да турніру ў Таронта, старт якога адкладзены з-за дажджу.
Алена Рыбакіна з Казахстана засталася на другім месцы з 8056 ачкамі. Трэці радок, як і тыднем раней, займае амерыканская спартсменка Джэсіка Пегула (6625).
Самы прыкметны ўзлёт за тыдзень здзейсніла 229-я ракетка свету, 16-гадовая расійская тэнісістка Крысціна Лютава: пасля перамогі на турніры WTA-250 у Мемфісе, ЗША, яна ўзнялася на 103 пазіцыі. У абноўленым рэйтынгу расіянка займае 126-ы радок. Раней яе найлепшым рэйтынгам было 225 месца.
Арына Сабаленка пачне ў Таронта выступленне з другога круга. Яе першая саперніца вызначылася ў матчы паміж японкай Маюкай Уцідзіма і іспанкай Крысцінай Букша.
Сёлета Сабаленка выйграла тры тытулы, перамогшы на «пяцісотніку» ў Брысбене, а таксама аформіўшы «Сонечны дубль» у Індыян-Уэлсе і Маямі. Акрамя гэтага, тэнісістка згуляла ў фінале Australіan Open, дзе ўступіла Алене Рыбакінай з Казахстана.
Другая ракетка Беларусі Аляксандра Сасновіч 136-я (-3 пазіцыі за тыдзень). Ірына Шымановіч — 205-я (-1).
