Сёння ў сценах Палаты прадстаўнікоў разглядаюць новую версію закона аб энергазберажэнні, які быў ініцыяваны і распрацаваны Дзяржаўным камітэтам па стандартызацыі. Законапраект рыхтуецца да прыняцця ў першым чытанні.

«Час ідзе, прымаюцца новыя дакументы, спрашчаюцца адміністрацыйныя працэдуры. Менавіта таму неабходна было прыняцце кропкавых рашэнняў у адпаведнасці з прынятымі дакументамі ўрада, у тым ліку Кодэксам аб архітэктурнай, горадабудаўнічай і будаўнічай дзейнасці», — патлумачыла старшыня Дзяржстандарту Алена Маргунова.

Новаўвядзенні, запланаваныя да ўнясення ў новай рэдакцыі, носяць кропкавы і індывідуальны характар. Першая важная навацыя — законапраект прадугледжвае спрашчэнне адміністрацыйнай працэдуры па нормах расходу паліўна-энергетычных рэсурсаў (ПЭР) для юрыдычных асоб.

Другая навэла — аптымізацыя экспертных працэдур у адпаведнасці з Кодэксам аб архітэктурнай, горадабудаўнічай і будаўнічай дзейнасці. «Гэта аб’яднанне двух відаў экспертыз — будаўнічай і па энергаэфектыўнасці. Гэта навацыя патрэбна для таго, каб спрасціць і ўнесці яснасць у іх правядзенне, а таксама замацаваць усе гэтыя работы за нашым даччыным прадпрыемствам «Галоўдзяржбудэкспертыза», — звярнула ўвагу старшыня.

Рэалізацыя гэтых заканадаўчых навэл замацавана за РУП «Галоўдзяржбудэкспертыза» і Дэпартаментам па энергаэфектыўнасці Дзяржстандарту. Па словах Алены Маргуновай, прыняць законапраект неабходна ў кастрычніку бягучага года, таму што з гэтага ж месяца ўступае ў сілу закон ад 11 кастрычніка 2024 года № 33-З «Аб акрэдытацыі ў Нацыянальнай сістэме акрэдытацыі Рэспублікі Беларусь».

Датычна першай навацыі, член Пастаяннай камісіі па прамысловасці, энергетыцы, транспарце, сувязі і лічбавым развіцці Палаты прадстаўнікоў Антон Каранкевіч растлумачыў, што гэтым законапраектам для юрыдычных асоб дзяржаўнай і недзяржаўнай формаў уласнасці замацоўваецца адзіны падыход па ўстанаўленні нормаў расходу ПЭР. «Цяпер парадак па ўстанаўленні нормаў расходу ПЭР для дзяржаўных арганізацый ускладнены ў параўнанні з недзяржаўнымі. На дадзены момант у іх адны арганізацыі ўзгадняюць, іншыя арганізацыі устанаўліваюць. Цяпер проста для іх будуць устанаўлівацца дадзеныя нормы расходу паліўна-энергетычных рэсурсаў, — расказаў ён. — Мы правялі параўнанне гэтых адмінпрацэдур і высветлілася, што для недзяржаўных яны нашмат прасцейшыя. Таму вырашылі зрабіць адзіны падыход для ўсіх юрыдычных асоб незалежна ад формаў уласнасці».

Фота Сяргея Шэлега