Дзве замест адной
Як паведаміў намеснік начальніка галоўнага ўпраўлення арганізацыі медыцынскай дапамогі — начальнік аддзела медыцынскай дапамогі маці і дзецям Міністэрства аховы здароўя Дзмітрый ЛАЗАР, за пяць гадоў дзеяння бясплатнай праграмы ЭКА на выкананне бясплатнай спробы з рэспубліканскага бюджэту выдаткавана каля 29 мільёнаў рублёў. Праведзена 7404 цыклы ЭКА, у выніку якіх наступіла 2975 клінічных цяжарнасцяў. Сярэдняя эфектыўнасць за пяць гадоў у бясплатнай праграме склала амаль 38 %, што перавышае эфектыўнасць у цэлым па краіне (каля 30 %).
У новым указе «Аб правядзенні экстракарпаральнага апладнення» датычна тэхналогій нічога кардынальна не мяняецца. Пры гэтым цяпер бясплатна замест адной даецца дзве спробы ЭКА. Акрамя таго, пашыраецца пералік тых, хто можа ўвайсці ў бясплатную праграму ЭКА. Яно прадастаўляецца шлюбным парам, у якіх муж і жонка з’яўляюцца грамадзянамі Беларусі, і жанчынам (таксама грамадзянкам Беларусі), якія не знаходзяцца ў шлюбе. Бясплатная праграма дзейнічае толькі ў дзяржаўных арганізацыях аховы здароўя.
Яшчэ адна з важных умоў — пры ЭКА сямейным парам не дазволена выкарыстоўваць донарскія палавыя клеткі, як і донарскія яйцаклеткі жанчынам, якія не знаходзяцца ў шлюбе. Аднак апошнім можна выкарыстоўваць сперматазоіды ананімнага донара. Пры гэтым жанчына набывае іх на платнай аснове. Што датычыцца абмежавання ўзросту, то ў жанчыны ён па-ранейшаму не будзе перавышаць 40 гадоў.
Аднак у выпадку, калі першая бясплатная спроба ЭКА заканчваецца нараджэннем дзіцяці, за жанчынай захоўваецца права на правядзенне другой бясплатнай спробы да дасягнення ёй 49-гадовага ўзросту.
Запатрабаваны і даступны
Як падкрэсліў дырэктар РНПЦ «Маці і дзіця» Сяргей ВАСІЛЬЕЎ, від дапамогі ў выглядзе ЭКА запатрабаваны ў нашай краіне і цалкам даступны. За пяць гадоў работы праграмы бясплатнага ЭКА наспелі прапановы, якія і былі рэалізаваны ў нядаўна прынятым указе.
— Ужо ёсць жанчыны, якія паспяхова нарадзілі дзіця з дапамогай першай спробы. У іх засталіся крыакансерваваныя эмбрыёны добрай якасці. У плане стану здароўя ім нічога не перашкаджае вынасіць і нарадзіць яшчэ адно здаровае дзіця. Што датычыцца пашырэння ўзроставых рамак да 49 гадоў, то згодна з вызначэннем Сусветнай арганізацыі аховы здароўя, гэта рэпрадуктыўны ўзрост. Усе пасылы, якія паступілі, мы рэалізавалі ў гэтым указе, — пракаменціраваў Сяргей Васільеў.
Ён дадаў, што замацаваныя ва ўказе нормы паляпшаюць у тым ліку і даступнасць гэтага віду медыцынскай дапамогі.
— ЭКА патрабуе пэўных затрат і фінансавых сродкаў, і, безумоўна, падтрымка дзяржавы дадзенай катэгорыі пацыентаў, якія часам не могуць сабе дазволіць, — гэта істотная мера. Дзяржава падстаўляе плячо, каб сям’я ці адзінокая жанчына мелі магчымасць шчаслівага нараджэння дзіцяці, прычым не аднаго. Гэта сапраўды магчымасць здабыць шчасце мацярынства, — адзначыў Сяргей Васільеў.
Пры гэтым трэба сказаць, што з 25 кастрычніка мінулага года пастановай Міністэрства аховы здароўя пашыраны паказанні па здароўі жанчыны да атрымання працэдуры ЭКА. Гэта звязана з паляпшэннем якасці аказання дапамогі анкалагічным і пацыентам кардыялагічнага, неўралагічнага і нейрахірургічнага профілю. Пры падрыхтоўцы гэтых змяненняў улічвалася інфармацыя ад усіх рэспубліканскіх навукова-практычных цэнтраў. Дзякуючы гэтаму магчымасць зацяжараць атрымалі жанчыны, якія маюць анкалагічныя захворванні рэпрадуктыўнай сферы (рак малочнай залозы, рак эндаметрыя), хворыя на рассеянны склероз, эпілепсію. Падрабязна азнаёміцца з гэтымі змяненнямі можна на партале Міністэрства аховы здароўя.
Што датычыцца тэхналогіі правядзення ЭКА, то ў цяперашні час у дзяржаўных установах аховы здароўя выкарыстоўваюцца ўсе высокатэхналагічныя метады экстракарпаральнага апладнення, якія прымяняюцца ў свеце.
— Мы не стаім на месцы. У бліжэйшай перспектыве, ужо сёлета, будзе весціся распрацоўка перадымплатацыйнага генетычнага тэсціравання і іншых методык, якія з часам дазволяць пары нарадзіць здаровае дзіця з мінімальнай шкодай для жанчыны, — рэзюмаваў Сяргей Васільеў.
Алена КРАВЕЦ
