У мерапрыемстве ўзялі ўдзел 350 супрацоўніц МУС. Сярод іх былі выбраны 25 пераможцаў у 6 асноўных намінацыях: «Сэрца аддаю людзям», «Паспяховы кіраўнік», «Актыўная грамадзянская пазіцыя», «Духоўнасць і культура», «Мацярынская слава», «Віват, моладзь!».

«Было няпроста адабраць кандыдатаў і прызёраў. На дадзены момант у Беларускім саюзе жанчын МУС налічваецца каля 13 тыс. удзельніц. Гэта адна з самых вялікіх пярвічных арганізацый у сістэме БСЖ. І колькасць членаў пастаянна расце. Жанчыны жадаюць уступаць у гэта аб’яднанне. Мы ні перад чым не спыняемся, рухаемся толькі наперад, асабліва ў Год беларускай жанчыны», — адзначыла начальнік упраўлення інфармацыі і грамадскіх сувязяў МУС Наталля Сахарчук.

Яна таксама падкрэсліла, што сярод удзельніц конкурсу — жанчыны, якія займаюць розныя пасады ў праваахоўным ведамстве. «Гэта людзі, якія працуюць суткамі, забяспечваюць ахову граніцы, служаць у спецназе. Гэта дзяўчаты, якія служаць у АМАПе і забяспечваюць ахову грамадскага парадку. Гэта супрацоўніцы, якія працуюць у дзяжурнай часці, адказваюць на званкі, аказваюць своечасовую дапамогу тым, хто трапіў у бяду, забяспечваюць бесперабойную работу канцылярыі Міністэрства ўнутраных спраў. Гэта медыкі шпіталяў і паліклінік МУС, якія таксама кругласутачна робяць усё для таго, каб супрацоўнікі і члены іх сем’яў былі здаровыя. Гэта значыць, катэгорыі зусім розныя. Але самае галоўнае — гэта жанчыны Рэспублікі Беларусь», — сказала Наталля Сахарчук.

Старшыня Беларускага саюза жанчын Вольга Шпілеўская падкрэсліла, што прадстаўніцы прыгожага полу ў праваахоўным ведамстве паспяхова сумяшчаюць жаноцкасць з якасцямі, неабходнымі на службе. «Жанчыны ў структуры МУС працуюць з непаўналетнімі, займаюцца прафілактыкай правапарушэнняў. Я вельмі ўдзячная дзяўчатам за работу. Яны прыгожыя, стыльныя, сучасныя жанчыны, якія спалучаюць пабудову кар’еры, сур’ёзнасць, мяккасць, жаноцкасць і ўменне быць мамай і жонкай, калі яны вяртаюцца са службы дадому», — адзначыла Вольга Шпілеўская.

Адной з пераможцаў у намінацыі «Духоўнасць і культура» стала дырэктар Цэнтра культурна-выхаваўчай работы УУС Брэсцкага аблвыканкама Таццяна Прушынская. «Упэўнена, што падобныя мерапрыемствы дазваляюць нам раскрыцца, паказаць свае прафесійныя якасці і зрабіць гэты свет больш гарманічным і стваральным», — сказала яна.