Якое будзе надвор'е ў Беларусі 12 жніўня, расказалі ў Рэспубліканскім цэнтры па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.
«Працоўныя будні большасці беларусаў на гэтым тыдні будуць праходзіць на фоне сонечнага, умерана цёплага надвор’я. Так, пад пераважным уплывам вобласці павышанага атмасфернага ціску істотных ападкаў па краіне не чакаецца, толькі днём 12 жніўня (аўторак) месцамі, у асноўным па паўночным усходзе, дзе адаб’ецца ўплыў няўстойлівай паветранай масы, пройдуць невялікія кароткачасовыя дажджы. Разам з тым пры ясным небе ночы будуць даволі свежымі ў межах 6-13 градусаў цяпла, а днём промні жнівеньскага сонца змогуць прагрэць паветра да камфортных 20-27 градусаў, толькі ў паўднёва-заходніх раёнах будзе на 1-3 градусы цяплей», — расказалі ў Белгідрамеце.У аўторак, 12 жніўня, будзе пераважна без ападкаў, толькі днём месцамі ў асноўным па паўночным усходзе краіны пройдуць невялікія кароткачасовыя дажджы, навальніцы. У начныя і ранішнія гадзіны ў асобных раёнах магчымы слабы туман. Тэмпература паветра ўначы складзе 7-13 градусаў цяпла. Днём будзе 20-25 градусаў, па поўдні — да плюс 27.
