«Беларуская кухня — скарбніца смакаў і традыцый. Гастранамічны турызм даўно стаў візітнай карткай Беларусі. Госці дзесяцігоддзямі адзначаюць гасціннасць, смачную кухню і чысціню ў краіне. Мы ганарымся сваёй кухняй, натуральнасцю прадуктаў, традыцыямі прыгатавання, разнастайнасцю гастрападзей. У снежні мы здзейснім гастраэкскурс і пагаворым аб тым, што, як і дзе ядуць у Беларусі, успомнім гісторыю, традыцыі, раскажам, дзе пакарміць гасцей, пакажам кулінарныя майстар-класы, параўнаем сусветныя тэндэнцыі з развіццём гастратурызму ў Беларусі», — адзначылі ў агенцтве.

Беларусь цікавая як традыцыйнай, так і сучаснай кухняй. «Адкрыйце для сябе дранікі хрусткія і апетытныя, паспрабуйце верашчаку духмяную і сытную, нацешцеся смакам бабкі салодкай і пяшчотнай, здавольце голад мачанкай густой і насычанай, пакаштуйце ведзьмакі і клёцкі. Беларуская кухня багатая на стравы з бульбы, мяса і малочных прадуктаў, якія гатуюцца па старадаўніх рэцэптах, што перадаюцца з пакалення ў пакаленне. Што датычыцца сучаснай кухні, беларускія кухары і рэстаратары актыўна эксперыментуюць з традыцыйнымі рэцэптамі, ствараючы новыя цікавыя стравы. У Мінску і іншых буйных гарадах вы знойдзеце мноства сучасных рэстаранаў, дзе можна пакаштаваць беларускую кухню ў новай інтэрпрэтацыі», — пазначылі ў агенцтве.

Акрамя таго, у Беларусі вырабляецца мноства высакаякасных прадуктаў харчавання. Наведванне мясцовых ферм, сыраварняў, піваварняў і іншых вытворчасцяў — выдатны спосаб пазнаёміцца з тэхналогіямі і паспрабаваць свежыя прадукты прама ад вытворцы. Таксама ў розных гарадах Беларусі праходзяць гастранамічныя фестывалі, якія прапануюць шырокі выбар страў і напояў, магчымасць пазнаёміцца з мясцовымі кулінарнымі традыцыямі і паўдзельнічаць у забаўляльных мерапрыемствах. Яркія гастранамічныя падзеі краіны — фестываль клубніц «Лунінецкія клубніцы» (Лунінецкі раён), «Сырны фестываль» (Гродна), «Бацькава булка» (Свіслач), Gastrofest (Мінск і іншыя гарады), «Вішнёвы фестываль» (Глыбокае).

Беларусь актыўна развівае сетку спецыялізаваных устаноў, дзе традыцыі нацыянальнай кухні прадстаўлены ва ўсёй красе. Таксама Мінск актыўна развівае пляцоўкі street-food, прапаноўваючы гасцям новыя канцэпцыі забаў і сучасную кухню хуткага харчавання.

У Нацыянальным агенцтве па турызме таксама падзяліліся праграмай мерапрыемстваў на месяц. 11—14 снежня пройдзе прэзентацыя фермерскай экапрадукцыі ў рамках правядзення выставы-кірмашу «Чароўны млын» (Мінск). 12—14 снежня плануецца прэзентацыя гастранамічнага патэнцыялу Беларусі ў рамках Міжнароднай турыстычнай выставы-форуму «Інтурмаркет. Зіма» (Санкт-Пецярбург).

20 снежня адбудзецца ўзнагароджанне пераможцаў рэспубліканскага турыстычнага конкурсу «Пазнай Беларусь — 2025».

На 25 снежня намечана адкрыццё рэзідэнцыі Дзеда Мароза-Траскуна Верхнядзвінскага ў вёсцы Юсціянава Верхнядзвінскага раёна (з вулічнай дэгустацыяй верхнядзвінскіх сыроў і салодкіх калядных пачастункаў).

26—31 снежня — тэатралізаваная праграма «Паці ў хаце» ў этнаграфічнай сядзібе «Вецера». 26 снежня — майстар-клас па прыгатаванні страў нацыянальнай кухні (аграэкасядзіба «Хутар Мядкоў»).

Даведацца больш пра месцы з беларускай кухняй і аграэкасядзібы, дзе можна пакаштаваць аўтэнтычную кухню і рэдкія стравы, якія не гатуюць у рэстаранах, можна на афіцыйным турыстычным партале Беларусі belarus.travel.

Гастратурызм — гэта турыстычнае падарожжа ў мэтах азнаямлення з краінай, рэгіёнам, мясцовасцю праз далучэнне да нацыянальнай гастраноміі, асаблівасцяў вытворчасці і прыгатавання нацыянальных страў, іншай харчовай прадукцыі, а таксама дзейнасць па арганізацыі гэтага турыстычнага падарожжа. Ён прадугледжвае наведванне або правядзенне дэгустацый, майстар-класаў, аб’ектаў грамадскага харчавання, гастранамічных мерапрыемстваў (кірмашоў, фестываляў, выстаў), у тым ліку з мэтай азнаямлення са стравамі нацыянальнай кухні, наведванне навучальных устаноў, кандытарскіх фабрык, іншых арганізацый з кулінарнай спецыялізацыяй з мэтай азнаямлення з асаблівасцямі вытворчасці і прыгатавання нацыянальных страў, іншай харчовай прадукцыі. А таксама навучанне турыстаў, экскурсантаў прыгатаванню нацыянальных страў, характэрных для адпаведнага рэгіёна, мясцовасці, у тым ліку з выкарыстаннем прадукцыі, вырашчанай у гэтым рэгіёне, мясцовасці, азнаямленне з кулінарнымі асаблівасцямі адпаведнага рэгіёна, мясцовасці шляхам стварэння і прасоўвання гастранамічных пляцовак, фудкортаў.