Найлепшыя танцоры Гродзенскай вобласці збяруцца ў Смаргоні, каб прыняць удзел у абласным конкурсе танцавальных калектываў «Скокі ва ўсе бокі», паведамілі БелТА ва ўпраўленні культуры Гродзенскага аблвыканкама.
Гісторыя конкурсу бярэ пачатак у 2001 годзе, ён быў заснаваны, каб аказаць падтрымку і стымуляваць развіццё сельскіх танцавальных калектываў. Доўгі час з перыядычнасцю раз на два гады конкурс праходзіў у Карэлічах. Апошнія тры конкурсы праводзіліся ў Смаргоні, на дзень ператвараючы горад у сапраўдную танцавальную сталіцу Гродзеншчыны.
Сёлета культурная падзея аб’яднае больш за 600 выканаўцаў і падорыць гасцям звыш 50 уражальных нумароў. У конкурсе прымуць удзел як калектывы, якія маюць багаты творчы вопыт, так і дэбютанты, якія робяць першыя крокі на абласной сцэне. Сярод канкурсантаў — калектывы, якія носяць званні «народны» і «ўзорны». Удзельнікі будуць спаборнічаць у намінацыях «Беларускі народны танец» і «Сучасная харэаграфія».
Як адзначылі арганізатары, конкурс дазволіць дакрануцца да вытокаў беларускага нацыянальнага танцавальнага мастацтва і пазнаёміць з найлепшымі сучаснымі эстраднымі танцамі. Яркія касцюмы, вясёлая музыка, цікавыя пастаноўкі, розныя харэаграфічныя стылі, пластыка, артыстызм — усё гэта чакае жыхароў і гасцей Смаргоні 22 лістапада.
