Судзейскі корпус краіны папоўніўся надзейнымі і перспектыўнымі маладымі кадрамі, якім кіраўніком дзяржавы і народам Беларусі даверана вяршыць правасуддзе. Пасля ўрачыстай цырымоніі прынясення прысягі суддзямі Старшыня Вярхоўнага Суда звярнуў увагу, што суддзя — гэта вяршыня кар’еры любога юрыста, любога правазнаўцы, гэта вяршыня не толькі праваахоўнай сістэмы, але ў цэлым па многіх пытаннях і дзяржаўнай улады.

«З сённяшняга дня вы будзеце адпраўляць правасуддзе ад імя беларускай дзяржавы, — сказаў Андрэй Швед. — Людзі будуць суадносіць вас са справядлівасцю, законам, парадкам у цэлым, ацэньваючы вашу работу як работу ўсіх дзяржаўных інстытутаў».

У суддзяў, якія прынеслі прысягу, сёння адказны, знакавы момант у жыцці, упэўнены Старшыня Вярхоўнага Суда. Ён звярнуўся да кіраўнікоў ніжэйстаячых судоў, адзначыўшы, што ў іх руках моладзь, якой важна дапамагаць і падказваць. Маладым суддзям ён пажадаў мэтанакіраванасці і жадання пастаяннага самаўдасканалення.

«Кожны дзень трэба асвойваць велізарнае мора заканадаўства, разбірацца ў ім, разумець яго. Таму не лянуйцеся, працуйце над сабой. Асабліва ў першыя гады, ды і ў далейшым, звяртайцеся да старэйшых калег. Трэба разумець, што перш чым прыняць рашэнне, у гэтым рашэнні неабходна быць абсалютна, на 100 % упэўненым», — дадаў Андрэй Швед.

Старшыня Вярхоўнага Суда падкрэсліў, што суддзя павінен прымаць рашэнне так, каб і праз гады прысутнічала ўпэўненасць у сваёй праваце — і па сутнасці, і па законе.

Андрэй Швед таксама звярнуў увагу на публічнасць выбранай прафесіі. Жыхары асабліва невялікіх гарадоў, раённых цэнтраў, ды і сталіцы заўсёды звяртаюць увагу на суддзяў. «Вы, можа, не будзеце ведаць усіх жыхароў раёна, але яны дакладна будуць ведаць вас. Кожны дзень, не толькі ў працоўны час, у выхадныя дні, яны будуць глядзець на вас. Памятайце гэта», — сказаў ён, звяртаючыся да маладых суддзяў.

Напрыканцы Старшыня Вярхоўнага Суда, цытуючы кіраўніка дзяржавы, у пажаданне маладым калегам дадаў, што час выбраў іх. «Прыйдзе час, і вы будзеце, магчыма, тут, за гэтай трыбунай, таксама казаць словы наказу маладым суддзям, якія прыйдуць пазней», — сказаў ён.

Суддзя суда агульнай юрысдыкцыі мае права ажыццяўляць правасуддзе толькі пасля прынясення прысягі і прыводзіцца да яе на працягу аднаго месяца з дня прызначэння на пасаду. Прысяга прыносіцца суддзёй суда агульнай юрысдыкцыі ва ўрачыстай абстаноўцы перад Дзяржаўным сцягам Рэспублікі Беларусь.

Уступаючы на пасаду, суддзя суда агульнай юрысдыкцыі ўрачыста клянецца перад народам Рэспублікі Беларусь сумленна і добрасумленна выконваць свае абавязкі, ажыццяўляць правасуддзе, падпарадкоўваючыся толькі Канстытуцыі Рэспублікі Беларусь, быць бесстароннім і справядлівым, як загадвае абавязак суддзі.