Маніторынгі праходзілі са снежня 2025 года па май 2026-га. Штомесяц прадстаўнікі прафсаюзаў наведвалі аб’екты гандлю ва ўсіх рэгіёнах краіны, ацэньваючы наяўнасць у продажы гародніны і садавіны айчыннай вытворчасці, звярталі ўвагу на якасць прадукцыі і захаванне цэнавай дысцыпліны. Напрыклад, толькі ў сакавіку гэтага года спецыялісты наведалі звыш 520 гандлёвых аб’ектаў.

Акрамя набору для баршчу, вясной асаблівая ўвага надавалася і забяспечанасці пакупнікоў свежымі агуркамі і памідорамі беларускай вытворчасці, а таксама цэнам на гэтую прадукцыю.

Практычна ва ўсіх правераных гандлёвых аб’ектах на прылаўках быў прадстаўлены дастатковы асартымент якаснай плодаагародніннай прадукцыі айчынных вытворцаў. Фіксаваліся толькі адзінкавыя выпадкі адсутнасці асобных відаў агародніны або яблыкаў, а таксама наяўнасці прадукцыі з прыкметамі недабраякаснасці.

• «Дзякуючы аператыўнаму ўзаемадзеянню прафсаюзаў з гандлёвымі арганізацыямі і зацікаўленымі ведамствамі выяўленыя недахопы ўстараняліся ў самыя кароткія тэрміны, а асартымент прадукцыі аператыўна папаўняўся, — расказаў начальнік галоўнага ўпраўлення сацыяльнага партнёрства і працоўных адносін ФПБ Дзмітрый Аляксейчык. — Трэба адзначыць, што наяўнасць на паліцах якаснай прадукцыі падтрымлівалася на высокім узроўні менавіта дзякуючы сістэме фарміравання стабілізацыйных фондаў, якая функцыянуе ў краіне».

Дарэчы, у бягучым сезоне ў грамадскія прыёмныя прафсаюзаў, а таксама ў Міжгаліновы маніторынгавы цэнтр ФПБ не паступала сістэмных скаргаў ад грамадзян па пытаннях адсутнасці ў продажы плодаагародніннай прадукцыі або ў сувязі з яе дрэннай якасцю.

У цэлым атрыманыя вынікі істотна адрозніваюцца ад тых, якія былі годам раней. У мінулы міжсезонны перыяд прадстаўнікі прафсаюзаў фіксавалі масавыя выпадкі адсутнасці бульбы, цыбулі і іншай агародніны, паступалі звароты і ад спажыўцоў, якія паведамлялі аб рэалізацыі прадукцыі неналежнай якасці.