У Міністэрстве працы і сацыяльнай абароны нагадалі, што шматдзетныя сем’і маюць права выкарыстоўваць сродкі сямейнага капіталу для аплаты адукацыі. Грошы дазваляецца траціць на сярэднюю спецыяльную або вышэйшую адукацыю ў дзяржаўных установах, а таксама ў навучальных установах спажывецкай кааперацыі і Федэрацыі прафсаюзаў Беларусі.
Як паведамілі ў ведамстве, выкарыстоўваць сродкі можна датэрмінова, не чакаючы 18-годдзя дзіцяці. Аплаціць дазваляецца навучанне любога члена сям’і — бацькоў, дзяцей. Накіроўваць капітал дапускаецца на першую, другую ці наступную адукацыю незалежна ад формы атрымання: вочнай, завочнай або дыстанцыйнай.
Для афармлення неабходна падрыхтаваць пашпарт заяўніка і навучэнца (альбо пасведчанне аб нараджэнні), рашэнне аб прызначэнні сямейнага капіталу, дагавор з навучальнай установай, даведку аб статусе студэнта, пасведчанне аб шлюбе, а таксама дакументы аб занятасці мужа (у поўнай сям’і) або аднаго з бацькоў (у няпоўнай). Заява падаецца ў службу «Адно акно». Пасля прыняцця рашэння аб датэрміновым распараджэнні трэба звярнуцца ў Беларусбанк для пераводу сродкаў на рахунак навучальнай установы. Тэрмін разгляду заявы ў выканкаме складае да аднаго месяца, пералік сродкаў у банку займае ад 31 да 41 дня.
Ягор ЧУРЫК
