Старшыня Палаты прадстаўнікоў сустрэўся з дэпутатамі Браслаўскага райсавета. Галоўнай тэмай размовы стала будучая электаральная кампанія. Ігар Сергяенка засяродзіў увагу на тым, што тэма інфармацыйнай бяспекі сёння з’яўляецца адной з самых важных.
«Для генерацыі фэйкаў у некаторых краінах існуюць спецыяльныя інфармацыйныя цэнтры, якія для распальвання сітуацыі ў свеце рыхтуюць пастановачныя фотаматэрыялы, відэаролікі, у якія вераць людзі. З гэтага можна зрабіць выснову, што ў цяперашні час ваенныя дзеянні спалучаюцца з вайной у інфармацыйным полі», — сказаў спікер.
На пасяджэнні Браслаўскага райвыканкама з удзелам Ігара Сергяенкі былі разгледжаны пытанні эфектыўнасці функцыянавання сістэмы аховы здароўя на аснове даступнасці і якасці аказання медыцынскай дапамогі для шырокіх слаёў насельніцтва Браслаўскага раёна, выдзялення зямельных участкаў і садзейнічання занятасці насельніцтва.
Старшыня Палаты прадстаўнікоў падкрэсліў, што правальных пазіцый у сферы аховы здароўя Браслаўшчыны няма. «Усё знаходзіцца ў прывабным стане, тут працуюць выдатныя актыўныя спецыялісты. За гэты ўчастак работы ў Браслаўскім раёне я магу быць спакойны», — сказаў спікер.
Павышэнню якасці медыцынскіх паслуг кіраўніцтва краіны ўдзяляе шмат увагі. У планах на 2025 год — працягнуць будаўніцтва дзіцячага анкагематалагічнага цэнтра ў Бараўлянах, узвесці там жа новы корпус дзіцячай хірургіі, а таксама пабудаваць новы корпус рэабілітацыі спецыялізаванай бальніцы ў Аксакаўшчыне. Усяго за 30 апошніх гадоў у Беларусі пабудавана 923 аб’екты аховы здароўя.
Фінальным мерапрыемствам рабочай паездкі на Браслаўшчыну стала дыялогавая пляцоўка «Час тваіх магчымасцяў», у якой узялі ўдзел члены Савета працоўнай моладзі раёна і члены патрыятычнага клуба «Сокал» Відзаўскага дзяржаўнага каледжа. Падчас адкрытага дыялогу з моладдзю Ігар Сергяенка расказаў аб сітуацыі ў краіне і важнасці будучых выбараў Прэзідэнта. Спікер заўважыў, што ў бягучым годзе на 17 % будуць павялічаны расходы на сістэму адукацыі. Адной з цэнтральных тэм гутаркі стала размова пра захаванне гістарычнай памяці, якая нас аб’ядноўвае.
«Перапісаць праўду аб тых складаных гераічных часах, аб Вялікай Айчыннай вайне вельмі лёгка. Паглядзіце, што цяпер адбываецца ў суседняй Польшчы: там завяршаецца дэмантаж помнікаў героям-вызваліцелям Савецкай Арміі, якая разграміла фашызм і выратавала народы ад зняволення. Там забылі, што 600 тысяч савецкіх салдат загінулі за вызваленне Польшчы. Таму наша задача, усіх прагрэсіўных грамадзян Беларусі, — абараніць і захаваць гістарычную праўду», — заключыў Старшыня Палаты прадстаўнікоў.
