У Брэсце грандыёзнае гулянне разгорнецца 15 лютага ў парку культуры і адпачынку. Выступленні артыстаў на працягу дня будуць чаргавацца з гульнявой праграмай з прызамі. Напрыклад, смельчакам па традыцыі прапануюць праверыць свае сілы, узлезшы на волатаўскі слуп за падарункам. Госці змогуць паўдзельнічаць у флэшмобах, карагодах, конкурсах, віктарынах. Не абыдзецца без запальвання масленічнага вогнішча. На алеях парка размесцяцца фудкорты, дзе можна будзе пачаставацца стравамі беларускай кухні, гарачымі шашлыкамі, духмяным пловам, сонечнымі блінамі. Рамеснікі на выставе прапануюць вырабленыя іх таленавітымі рукамі творы.

У парку жывёл у Баранавічах запрашаюць адзначыць Масленіцу 21 лютага. Цэнтральнай падзеяй стане спроба ўстанавіць рэкорд па прыгатаванні самага вялікага бліна ў Беларусі. Гасцей чакаюць да 13:00 на лакацыі «Лясныя Таямнiцы». Арганізатары абяцаюць неверагодную атмасферу з музыкай, забаўкамі і падарункамі, прыгатаваннем і дэгустацыяй бліноў і іншых пачастункаў. Запланаваны майстар-клас па вырабе масленічнага пудзіла. Наведвальнікі змогуць сумясціць асалоду свята з прагулкай па тэрыторыі парка, кантактам з жывёламі. 

Яшчэ адной знакавай лакацыяй у Брэсцкай вобласці стане 21 лютага нацыянальны парк «Белавежская пушча». Там Масленіцу будуць адзначаць на тэрыторыі Археалагічнага музея пад адкрытым небам. Народныя гулянні не абыдуцца без гульняў, конкурсаў і забаў. Разгорнецца горад майстроў, дзе можна будзе набыць аўтэнтычныя сувеніры і паўдзельнічаць у майстар-класах. Вядома, гасцям прадставіцца магчымасць удосталь пачаставацца румянымі блінамі і гарбатай, шашлыком, стравамі палявой кухні. 

«Галоўная падзея — у 16:00. Урачыста праводзім Снягурку і яе сям’ю на Паўднёвы полюс», — засяродзілі ўвагу ў нацпарку. У фінале вечара чакаюцца фаер-шоу, абрадавы карагод і спальванне пудзіла Масленіцы, дыскатэка пад адкрытым небам.