Пасля выхаду ў фінал адкрытага чэмпіянату Аўстраліі беларуска Арына Сабаленка працягвае ўзначальваць рэйтынг Жаночай тэніснай асацыяцыі (WTA), паведамляе БелТА.
У актыве першай ракеткі планеты засталося 10 990 ачкоў, пераможца Australian Open Алена Рыбакіна з Казахстана паднялася на дзве пазіцыі і зараз займае трэцяе месца. Беларуска Аляксандра Сасновіч апусцілася на чатыры радкі і знаходзіцца на 109-й пазіцыі, Вікторыя Азаранка займае зараз 149-е месца, Ірына Шымановіч на 158-м месцы.
Першая дзясятка новага рэйтынгу WTA:
- Арына Сабаленка (Беларусь) — 10 990 ачкоў;
- Іга Свёнтэк (Польшча) — 7978;
- Алена Рыбакіна (Казахстан) — 7610;
- Аманда Анісімава (ЗША) — 6680;
- Коры Гаўф (ЗША) — 6423;
- Джэсіка Пегула (ЗША) — 6103;
- Міра Андрэева (Расія) — 4731;
- Жасмін Пааліні (Італія) — 4267;
- Белінда Бенчыч (Швейцарыя) — 3342;
- Эліна Світаліна (Украіна) — 3205.
Рэйтынг Асацыяцыі тэнісістаў-прафесіяналаў (ATP) узначальвае наваспечаны чэмпіён Australian Open іспанец Карлас Алькарас, на другой пазіцыі — італьянец Янік Сінер, трэцім стаў фіналіст аўстралійскага першынства серб Новак Джокавіч. Найлепшы з прадстаўнікоў Беларусі Эрык Аруцюнян займае 433-е месца.
