Спецыялісты Сусветнай арганізацыі аховы здароўя (СААЗ) адзначаюць імклівае распаўсюджванне віруса грыпу A (H3N2), вядомага як ганконгскі грып, яго ўжо зафіксавалі ў 30 краінах. Пра гэта заявіла кіраўнік аддзела па глабальных рэспіраторных пагрозах Дэпартамента па кіраванні эпідэмічнымі і пандэмічнымі пагрозамі арганізацыі Вэньцін Чжан, паведамляе ТАСС.
З прыходам зімы ў Паўночным паўшар’і фіксуецца рост захворвання на грып і іншыя рэспіраторныя вірусы. Па словах спецыялістаў, глабальны ўзровень захворвання на грып на дадзены момант не перавышае прагназуемых паказчыкаў. Асаблівая ўвага арганізацыі прыцягвае з’яўленне і хуткае распаўсюджванне новага падтыпу віруса A (H3N2), названага J.2.4.1
«Упершыню вірус гэтага падтыпу быў зафіксаваны ў жніўні ў Аўстраліі і Новай Зеландыі, пасля чаго яго выявілі больш чым у 30 краінах ва ўсіх рэгіёнах свету, за выключэннем Паўднёвай Амерыкі», — сказала Вэньцін Чжан.
Прадстаўнік СААЗ удакладніла, што бягучыя эпідэміялагічныя даныя не сведчаць аб павелічэнні цяжасці цячэння хваробы. Першасная інфармацыя аб новым варыянце грыпу паказвае, што існуючыя сезонныя вакцыны захоўваюць сваю эфектыўнасць у прадухіленні цяжкіх формаў захворвання і памяншэнні верагоднасці шпіталізацыі.
Нароўні з грыпам назіраецца цыркуляцыя і іншых рэспіраторных вірусаў, уключаючы рэспіраторна-сінцытыяльны вірус, каранавірус і рынавірусы. На фоне гэтага сістэмы аховы здароўя ў шэрагу краін сутыкаюцца з дадатковай нагрузкай не толькі з-за росту колькасці шпіталізацый з рэспіраторнымі захворваннямі, але і з прычыны сезоннага ўздыму іншых вірусных інфекцый.
