Рабочая сустрэча праходзіла з удзелам Кіраўніка спраў Прэзідэнта Юрыя Назарава, старшыні Магілёўскага аблвыканкама Анатоля Ісачанкі, старшыні Шклоўскага райвыканкама Сяргея Барташа. Такая пільная ўвага Шклоўскаму раёну надаецца нездарма: Прэзідэнтам пастаўлена дакладная задача перазагрузіць вытворчыя магутнасці. У іх ліку — Шклоўскі міжрайаграсэрвіс, сучасны малакаперапрацоўчы завод. Над фарміраваннем базавых для раёна прадпрыемстваў тут працуе Кіраўніцтва справамі Прэзідэнта. Усе яны ўваходзяць у склад РУП «Купалаўскае» — кіруючая кампанія холдынга».

Як адзначыў Аляксандр Турчын, сёння стаіць задача падвесці вынікі за мінулы год, азнаёміцца з новымі магутнасцямі раёна і пры неабходнасці прыняць адпаведныя кіраўнічыя рашэнні.

Першым пунктам у працоўным маршруце стаў Шклоўскі міжрайаграпрамтэхснаб. Як расказў галоўны інжынер РУП «Купалаўскае» — кіруючая кампанія холдынга» Юрый Касенка, першую тэхніку на рамонт тут будуць гатовыя прыняць ужо да канца лютага — наперадзе пачатак вяснова-палявога сезона, а гэта значыць, што час не чакае.

«Цяпер мы ўжо заканчваем будаўніцтва. Да канца лютага плануем пачаць займацца рамонтамі паралельна з будаўнікамі, якія будуць заканчваць унутраныя работы, — адзначыў ён. — Мы павінны дапамагчы забяспечыць нашы гаспадаркі спраўнай тэхнікай, каб яна выканала ўсе пастаўленыя задачы своечасова і якасна».

Да сярэдзіны лютага тут да работы прыступяць 10 слесараў. Яны будуць займацца рамонтам плугоў, камбінаваных глебаапрацоўчых і пасяўных агрэгатаў. Усё неабходнае спецыялізаванае абсталяванне для гэтага ёсць. «Зіма сёлета марозная, а такія рамонтныя работы ў гаспадарках звычайна выконваюцца ў халодных майстэрнях. Наша майстэрня ў такіх жа ўмовах зможа павысіць прадукцыйнасць гаспадарак і спецыялістаў, паменшыць тэрмін рамонту неабходнай тэхнікі, — адзначыў Юрый Касенка. — Так, мы можам выконваць рамонт 15 сельгасмашын адначасова».

 

Для дробнага рамонту тут ствараецца мабільная група. Калі ён не будзе патрабаваць перамяшчэння тэхнікі ў майстэрню, спецыялісты самі будуць выязджаць на месцы. Рамантаваць у міжрайаграсэрвісе будуць увесь спектр тэхнікі: ад агрэгатаў да камбайнаў.

Калі міжрайаграсэрвіс выйдзе на поўную магутнасць, тут будуць працаваць 45 чалавек. Новыя працоўныя месцы — адзін з важных аспектаў развіцця не толькі прадпрыемства, але і раёна ў цэлым. У будучыні міжрайаграсэрвіс будзе абслугоўваць не толькі прадпрыемствы і арганізацыі Шклоўскага раёна. «Мы будзем дапамагаць найбліжэйшым раёнам і ўсім тым з вобласці, хто будзе звяртацца», — падсумаваў Юрый Касенка.

 

Яшчэ адзін важны аб’ект для раёна і вобласці — сучасны завод па вытворчасці натуральнамалочнай прадукцыі з аб’ёмам перапрацоўкі 300 т малака ў суткі. На сёння тут працягваецца ўзвядзенне адміністрацыйна-бытавога будынка, актыўнымі тэмпамі вядзецца будаўніцтва вытворчага цэха, дапаможных памяшканняў і інжынерных сетак.

Як расказаў дырэктар ААТ «Шклоўскі масларобны завод» Андрэй Сякацкі, штодня на аб’екце працуюць каля 200 чалавек. Работы вядуцца без адставанняў ад графіка. «На дадзены момант многія пытанні закрытыя. Ужо закантрактаваліся на пастаўку абсталявання практычна на 100 %. Яно пачынае паступаць, — адзначыў Андрэй Сякацкі. — Новыя вытворчыя плошчы дазволяць не толькі павялічыць аб’ёмы перапрацоўкі малака, але і пашырыць асартымент і павысіць якасць прадукцыі. Таксама будзе створана 100 новых працоўных месцаў».

Акрамя азнаямлення з новымі аб’ектамі, удзельнікі сустрэчы абмеркавалі вытворчыя пытанні прадпрыемстваў Шклоўскага раёна.