Другі дзень XXIII Міжнароднага дзіцячага музычнага конкурсу «Віцебск» адбудзецца ў 13.00. Узыходзячыя зорачкі прадставяць на сцэне Канцэртнай залы «Віцебск» славянскі хіт у суправаджэнні Нацыянальнага акадэмічнага канцэртнага аркестра Беларусі імя Міхаіла Фінберга. Па выніках першага конкурснага дня ў тройцы лідараў аказаліся прадстаўнікі Казахстана, Мальты і Беларусі. Дарэчы, беларуска Амалія Сухан будзе выступаць пад трэцім нумарам, які яна лічыць шчаслівым, і, магчыма, гэта надасць ёй сіл для фінальнага рыўка.

У Мастацкім музеі ў 15.00 прэзентуюць выставу Зураба Цэрэтэлі «Чарлі-летуценнік». Тут будзе прадстаўлены жывапіс, графіка, эмаль, скульптура.

У 18.00 на ўрачыстай цырымоніі паднімуць сцяг фестывалю. Гледачоў запрашаюць далучыцца да гэтай падзеі ў культурна-спартыўным комплексе Летняга амфітэатра.

У гэты ж час у абласной філармоніі пройдзе сольны канцэрт грузінскай групы Bravo Metehi. Сольнае выступленне Стаса Міхайлава адбудзецца на новай сцэнічнай пляцоўцы — у Віцебскім цэнтральным спартыўным комплексе. У 19.00 паклоннікі артыста змогуць атрымаць задавальненне ад любімых песень. Яшчэ адзін сольнік пройдзе ў КЗ «Віцебск» у 20.00. Беларускі спявак Пётр Ялфімаў разам з Нацыянальным акадэмічным народным аркестрам Беларусі імя Іосіфа Жыновіча прадставіць праграму «Незабыўнае...». Наведвальнікі канцэрта пачуюць лепшыя кампазіцыі з творчай спадчыны Уладзіміра Мулявіна і ансамбля «Песняры».

У 19.00 гледачоў запрашаюць у Нацыянальны акадэмічны драматычны тэатр імя Якуба Коласа на гістарычную драму «Радавыя».

У Летнім амфітэатры сёння стартуе серыя яркіх выступленняў. У 22.00 на галоўнай фестывальнай сцэне выступіць аркестр Nikamuza з праграмай «Легенды рока».

Асноўныя мерапрыемствы XXXIV Міжнароднага фестывалю мастацтваў «Славянскі базар у Віцебску» пройдуць з 10 па 13 ліпеня.