Уначы 15 лютага на большай частцы тэрыторыі Беларусі чакаецца рэзкая змена ўмоў надвор’я, пахаладае. Аб гэтым паведамілі ў Рэспубліканскім цэнтры па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.
У нядзелю ў Беларусі будзе воблачна з праясненнямі. Месцамі невялікі снег, днём па поўдні — снег, слабая мяцеліца. На дарогах галалёдзіца. Уначы і раніцай у асобных раёнах краіны слабы туман. Вецер паўночны, паўночна-ўсходні 3-8 м/с, днём па паўднёвым усходзе — парывы да 14 м/с. Тэмпература паветра мінімальная ноччу 12-17 градусаў марозу, па поўначы пры праясненнях ад мінус 18 да мінус 23 градусаў, у паўднёвых раёнах ад мінус 7 да мінус 11 градусаў. Максімальная тэмпература днём ад мінус 4 па поўдні да мінус 13 градусаў па поўначы.
