Рэспубліканскі суботнік прайшоў 25 кастрычніка ў Беларусі
Беларусы сёння займаюцца азеляненнем, добраўпарадкаваннем і прывядзеннем у належны стан аб’ектаў і тэрыторый населеных пунктаў, знакавых аб’ектаў, гісторыка-культурных каштоўнасцяў, мемарыяльных комплексаў, месцаў баявой і воінскай славы, пахаванняў воінаў і партызан часоў Вялікай Айчыннай вайны. Таксама суботнік можа быць праведзены на працоўных месцах.
З грашовых сродкаў, заробленых ад правядзення восеньскага суботніка, 50% пойдуць на будаўніцтва Нацыянальнага гістарычнага музея Беларусі і стварэнне яго пастаяннай экспазіцыі. Яшчэ 50% застануцца ў распараджэнні аблвыканкамаў, Мінскага гарвыканкама з магчымасцю іх накіравання на канкрэтныя аб’екты.
Урад прыняў удзел у суботніку на будаўніцтве хірургічнага корпуса Мінскай абласной клінічнай бальніцы
Прэм’ер-міністр Беларусі Аляксандр Турчын, віцэ-прэм’еры і работнікі Апарата Савета Міністраў узялі ўдзел у рэспубліканскім суботніку. Прадстаўнікі ўрада працавалі на будаўніцтве хірургічнага корпуса № 2 Мінскай ордэна Працоўнага Чырвонага Сцяга абласной клінічнай бальніцы ў аграгарадку Лясны Мінскага раёна.
Хірургічны корпус прызначаны для аказання высокакваліфікаванай спецыялізаванай медыцынскай дапамогі з выкарыстаннем сучасных методык лячэння і абсталявання. Корпус разлічаны на 380 ложка-месцаў у профільных аддзяленнях і 24 ложка-месцы ў аддзяленні анестэзіялогіі і рэанімацыі. Корпус складаецца з чатырох блокаў, якія злучаюцца ў цэнтральнай частцы.
Як адзначыў Прэм’ер-міністр Беларусі Аляксандр Турчын, узвядзенне корпуса мае працяглую гісторыю. «Былі ўжо некалькі спробаў яго будаўніцтва. Рашэннем кіраўніка дзяржавы было вызначана, што ўсё ж такі корпусу быць. Наведваючы дзіцячую абласную клінічную бальніцу, Прэзідэнт паставіў выразную задачу — да 9 мая 2026 года гэты аб’ект павінен быць завершаны. Задача досыць напружаная, але тым не менш я сёння бачу, што яна выканальная», — падкрэсліў Аляксандр Турчын.
Паводле яго слоў, хірургічны корпус Мінскай абласной бальніцы — толькі «верхнеузроўневая» частка медыцынскіх аб’ектаў вобласці. «Недалёка размешчаны дзіцячая абласная клінічная бальніца і шпіталь імя Машэрава. У перспектыве плануем, што ўсе гэтыя аб’екты будуць працаваць як адзінае цэлае», — сказаў Прэм’ер-міністр.
Кіраўнік урада звярнуў увагу, што Мінская вобласць пасля горада Мінска самая буйная па колькасці людзей. Вельмі важна, каб жыхары вобласці маглі атрымліваць кваліфікаваную медыцынскую дапамогу ў поўным аб’ёме. «Пасля ўводу гэтага корпуса з дзіцячай абласной клінічнай бальніцы будзе пераведзена аддзяленне для дарослых пацыентаў альбо ў гэты корпус, альбо ў вызваленыя карпусы бальніцы, якія таксама будуць адрамантаваны і рэканструяваны. Гэта дазволіць нам таксама пашырыць якасную медыцынскую дапамогу для дзяцей, — падкрэсліў Прэм’ер-міністр. — Відавочна, што ўвод корпуса і завяршэнне ўсёй гэтай рэарганізацыі дазволіць істотна нарасціць як аб’ём, так і якасць медыцынскіх паслуг, якія аказваюцца насельніцтву не толькі Мінскай вобласці».
Аляксандр Турчын адзначыў, што ў Мінскай абласной клінічнай бальніцы лечацца людзі з усіх рэгіёнаў нашай краіны. Сёння бальніца становіцца цэнтрам рэспубліканскага ўзроўню. Ён дадаў, што корпус, які будуецца, з’яўляецца карысным аб’ектам, які яшчэ раз паказвае, што медыцына з’яўляецца адным з прыярытэтаў палітыкі нашай дзяржавы. «І ў гэта ўкладваюцца немалыя грошы. Амаль 500 мільёнаў беларускіх рублёў каштуе гэты корпус. У кожным рэгіёне нашай краіны штогод укладваюцца немалыя грошы ў сістэму аховы здароўя», — канкрэтызаваў Аляксандр Турчын.
Дарэчы, будаўніцтва хірургічнага корпуса пачалося ў 2023 годзе. На яго ўзвядзенне і закупку абсталявання выдаткавана амаль 500 мільёнаў рублёў. Падобныя праекты рэалізуюцца і ў іншых рэгіёнах краіны — Віцебскай, Гродзенскай і іншых абласцях. Аляксандр Турчын падкрэсліў, што ўрад кантралюе і забяспечвае крыніцы фінансавання, каб усе аб’екты ўводзіліся ў эксплуатацыю своечасова, а дзяржаўныя даручэнні выконваліся.
Хірургічны корпус стане найбуйнейшым у рэгіёне: яго плошча — больш за 60 тысяч квадратных метраў. Васьміпавярховы будынак разлічаны на 380 ложка-месцаў. У палатах плануюць размяшчаць па 2-3 пацыента.
У ходзе рэспубліканскага суботніка зароблена каля 19,4 — 19,5 мільёна рублёў. Гэта амаль на 3 мільёны рублёў больш, чым на мінулым суботніку, які праводзіўся 12 красавіка, расказала журналістам намеснік Прэм’ер-міністра Наталля Пяткевіч. Яна адзначыла, што да суботніка далучыліся 2,3 мільёна чалавек. «У Год добраўпарадкавання мы ўпершыню правялі два рэспубліканскія суботнікі за год. Вельмі прыемна, што, нягледзячы на дажджлівае надвор’е ў Мінску і, магчыма, у іншых населеных пунктах краіны, у гэтым мерапрыемстве паўдзельнічала вялікая колькасць чалавек», — сказала намеснік Прэм’ер-міністра.
Яна дадала, што ў пастанове Савета Міністраў вызначаны мэты расходавання грашовых сродкаў. «50 % сродкаў, сабраных падчас рэспубліканскага суботніка, будуць накіраваныя на мэты, якія запланаваны ў рэгіёнах. А яшчэ 50 % будуць накіраваныя на будаўніцтва Нацыянальнага гістарычнага музея Беларусі. Характэрна, што сёлета загадзя вызначаныя мэты выдаткаў грашовых сродкаў у кожным рэгіёне і кожны грамадзянін можа ўбачыць, ва што ён унёс свой уклад», — канкрэтызавала Наталля Пяткевіч.
Паводле яе слоў, у рэгіёнах суботнікі праводзяцца па тры-чатыры разы на год. «Напрыклад, у Гомельскай вобласці за кошт суботнікаў, якія некалькі разоў на працягу года праводзяцца, узведзена некалькі вельмі значных аб’ектаў, прысвечаных Вялікай Айчыннай вайне. Важна разумець, куды ідуць грошы і на што яны выдаткоўваюцца. Хочацца, каб часцінка тваёй працы служыла рэальнай карысці для краіны», — рэзюмавала Наталля Пяткевіч.
Данііл ХМЯЛЬНІЦКІ
Фота БелТА
Члены Савета Рэспублікі высадзілі алею на тэрыторыі будучага парку Народнага адзінства
Члены Савета Рэспублікі і работнікі Сакратарыята Савета Рэспублікі сёння высадзілі алею на тэрыторыі будучага Нацыянальнага гістарычнага музея Беларусі і парку Народнага адзінства — у лютым гэтага года ўказам Прэзідэнта № 50 музею быў прысвоены статус Усебеларускай маладзёжнай будоўлі.
Гэта мерапрыемства мае асаблівае значэнне ў год 80-годдзя Вялікай Перамогі, адзначыла Старшыня Савета Рэспублікі Наталля Качанава. «Сёлета ідзе будаўніцтва музея гісторыі нашай роднай краіны (Нацыянальны гістарычны музей. — заўв. аўт.). Калі мы разам збіраемся для таго, каб паўдзельнічаць у добраўпарадкаванні нашай цудоўнай краіны, не перашкаджае ніякае надвор’е. Талакой мы можам усё. Мы можам разам зрабіць усё для таго, каб захаваць нашу краіну цудоўнай, прыгожай, добраўпарадкаванай, чыстай, дагледжанай. Сімвалічна, што мы сёння высаджваем дрэвы тут, у парку, які будзе называцца паркам Народнага адзінства», — падкрэсліла спікер.
Старшыня Пастаяннай камісіі Савета Рэспублікі па заканадаўстве і дзяржаўным будаўніцтве Міхаіл Русы падкрэсліў, што праводзіць суботнікі не толькі вясной, але і напярэдадні лістападаўскіх святаў восенню стала ўжо добрай традыцыяй. «Пасадзіўшы дрэва, асабліва ў такім знакавым месцы, чалавек пакідае аб сабе знак. Тут будзе сабрана ўся наша гісторыя. Калі-небудзь можна будзе прыйсці сюды з унукамі, паказаць ім гэтую алею і расказаць, што мы таксама ўнеслі свой уклад у гэтую добрую справу. Я думаю, тут вырастуць добрыя дрэвы, якія мы пасадзілі ў добрую глебу для цудоўнага народа», — сказаў Міхаіл Русы.
Ён таксама нагадаў словы кіраўніка дзяржавы аб добраўпарадкаванні, якое не павінна абмяжоўвацца пэўнымі мерапрыемствамі, а сыходзіць ад душы: не толькі сёлета, а ў цэлым кожны чалавек павінен настройвацца на добрую працу, каб тэхналагічныя працэсы і эканоміка краіны працавалі. «Тэма добраўпарадкавання павінна пачынацца ўнутры кожнага з нас. Учора на мерапрыемстве ў Віцебску кіраўнік дзяржавы гаварыў пра гэта. Не можа быць так, што ў аднаго атрымліваецца, а ў іншага — не. Усе прычыны таго, што адбываецца ляжаць у нас саміх», — дадаў сенатар.
Старшыня Пастаяннай камісіі Савета Рэспублікі па рэгіянальнай палітыцы і мясцовым самакіраванні Леанід Заяц адзначыў, што надвор’е не перашкаджае працаваць, а наадварот, загартоўвае характар: «Тое, што робіцца сёння на гэтай пляцоўцы, — гэта ў некаторай ступені даніна павагі нашай гісторыі. Сёння мы высаджваем алею каля грандыёзнага будынка, які збярэ ў сваіх сценах усю гісторыю Беларусі. І наша сённяшняя праца будзе ўпісаная ў летапіс краіны. Я лічу, што гэты суботнік, нават у такое надвор’е, сімвалізуе адзінства і братэрства нашых людзей».
Старшыня Пастаяннай камісіі Савета Рэспублікі па міжнародных справах і нацыянальнай бяспецы Сяргей Алейнік звярнуў увагу на пераемнасць пакаленняў падчас суботніка: «Сёння з намі працуюць члены Маладзёжнага савета Савета Рэспублікі. І гэта вельмі важна ў плане пераемнасці. Асабліва важна, што гэты суботнік праводзіцца ў Год добраўпарадкавання, які накіраваны на тое, каб зрабіць нашу дзяржаву чысцейшай і прыгажэйшай», — рэзюмаваў Сяргей Алейнік.
Яна ВАЛАСАЧ
Фота БелТА і Віктара ІВАНЧЫКАВА
Даць жыццё дрэвам на карысць будучых пакаленняў
У суботу дэпутаты і работнікі Сакратарыята на чале з намеснікам Старшыні Палаты прадстаўнікоў Вадзімам Іпатавым прынялі ўдзел у добраахвотнай рэспубліканскай акцыі «Дай лесу новае жыццё».
Акцыя праводзіцца Міністэрствам лясной гаспадаркі Беларусі. Яе мэта — аднавіць нашы лясы, у тым ліку пашкоджаныя ўраганам ветравальна-бураломныя ўчасткі. У Год добраўпарадкавання і навядзення парадку на зямлі — гэта задача асаблівай важнасці.
Нягледзячы на праліўны дождж, парламентарыі актыўна папрацавалі і высадзілі саджанцы бярозы і хвоі на ўчастку плошчай 2,6 гектара на тэрыторыі Уздзенскага лясгаса. Дарэчы, гэта ў прамым сэнсе слова ўклад у жыццё будучых пакаленняў, нашых дзяцей і ўнукаў. Вялікія бярозы тут зашумяць прыкладна праз 60 гадоў, а хвоі — праз 80.
У Бярэзінскім біясферным запаведніку добраўпарадкавалі Музей мёда
У Бярэзінскім біясферным запаведніку ў час суботніка добраўпарадкавалі рэканструяваны да 100-годдзя запаведніка Музей мёда, паведамілі БелТА ва Кіраўніцтве справамі Прэзідэнта.
Пасля будаўнічых работ тут наводзіцца парадак на тэрыторыі, а таксама афармляецца абноўленая экспазіцыя музея. Працоўны калектыў Кіраўніцтва справамі Прэзідэнта на чале з Юрыем Назаравым працаваў на добраўпарадкаванні гэтага аб’екта.
Кіраўнік спраў Прэзідэнта падкрэсліў, што выезд на такія мерапрыемствы калектывам заўсёды ўспрымаецца з энтузіязмам і натхненнем. «Гэта магчымасць унесці свой уклад у пераўтварэнне нашай краіны, яе гарадоў, пасёлкаў, вёсак, ляснога фонду і іншых месц і аб’ектаў, — пракаментаваў ён. — Для нас асабліва сімвалічна, што мы сёння працуем на ўнікальнай прыроднай тэрыторыі, у гэтым запаведным кутку беларускай зямлі. Ён ужо на працягу стагоддзя знаходзіцца пад асаблівай аховай дзяржавы. Дзякуючы самаадданай працы некалькіх пакаленняў работнікаў запаведніка гэтая прыродная жамчужына захавалася ў першародным выглядзе і зараз мы, наша пакаленне, павінны зрабіць усё, каб захаваць яе і для будучых пакаленняў».
Таксама важна прывіваць любоў да прыроды ў маладога пакалення, падкрэсліў Кіраўнік спраў Прэзідэнта. Для гэтага ў тым ліку ў запаведніку створаны Дом экалагічнай асветы, Музей запаведнай справы, Музей прыроды, Музей мёда і іншыя цікавыя аб’екты. «Працуем тут з задавальненнем, думаю, сёння на гэтым аб’екце работы завершым. Усім раю пабываць у Бярэзінскім біясферным запаведніку і абавязкова зайсці ў Музей мёда, ён атрымаўся вельмі пазнавальным і цікавым», — заклікаў Юрый Назараў.
Працоўны дэсант Міністэрства інфармацыі высадзіў дрэвы у Касцяневіцкім лясніцтве Вілейскага раёна
Працоўны дэсант Міністэрства інфармацыі на чале з Міністрам Маратам Маркавым шчыраваў на пасадцы дрэў у Касцяневіцкім лясніцтве Вілейскага раёна.
Нягледзячы на дождж, былі пасаджаны сотні дрэўцаў дуба і елкі – праз некалькі год тут зашуміць змешаны лес.
Звяздоўцы таксама ўнеслі свой уклад, пасадзіўшы каля паўтары сотні маладых дубкоў.
Мінпрам на чале з Андрэем Кузняцовым апрабаваў новы фармат удзелу ў рэспубліканскім суботніку
Сёлета ўпершыню ў сваёй гісторыі ведамства апрабавала новы фармат, калі міністр і яго намеснікі працавалі на тэрыторыях розных прадпрыемстваў сістэмы Мінпрама — ААТ «Мінскі падшыпнікавы завод», ААТ «Планар», ААТ «МЭТЗ ім.В.і. Казлова», ААТ «Амкадор». У дапамогу ім выйшлі супрацоўнікі Цэнтральнага апарата ведамства.
Так, міністр прамысловасці Андрэй Кузняцоў, яго першы намеснік Андрэй Канюшка і намеснік Дзяніс Бакей працавалі на тэрыторыі ААТ «Мінскі падшыпнікавы завод» (у структуры холдынгу БМК). Суботнік аб’яднаў як работнікаў ведамства, так і двух прадпрыемстваў — МПЗ і БМЗ. Фронт работ уключаў уборку прылеглай тэрыторыі і пасадку алеі «працоўны подзвіг краіны», якая сімвалізуе важнасць стваральнай працы работнікаў у мірнай краіне. Лепту ў азеляненне ўнеслі кіраўнікі ААТ «БМЗ — кіруючая кампанія холдынгу „БМК“ Дзмітрый Корчык і ААТ „Мінскі падшыпнікавы завод“ Сяргей Грынкевіч, а таксама старшыня прафсаюза „БЕЛПРАФМАШ“ Валерый Курсевіч.
Гэта мерапрыемства — не проста магчымасць папрацаваць разам, але і важны крок да стварэння новага фармату ўзаемадзеяння міністэрства з прадпрыемствамі галіны ў рамках удзелу ў рэспубліканскім суботніку. Галоўная мэта-максімальны ахоп і ўцягнутасць, каб кожны работнік усвядоміў сваю ролю і ўнёс свой уклад у добраўпарадкаванне. Такім чынам, усе работнікі Мінпрама — ад кіраўніцтва да супрацоўнікаў — разам з кіраўніцтвам і работнікамі прадпрыемстваў Мінпрама сёння на сваіх тэрыторыях папрацавалі не толькі па навядзенні парадку, але і прадэманстравалі адзінства і згуртаванасць вялікай прамысловай каманды.
Рэспубліканскі суботнік таксама прайшоў і ў холдынгу «Планар»
Працоўны калектыў холдынгу, а таксама работнікі структурных падраздзяленняў Міністэрства прамысловасці пад кіраўніцтвам намесніка міністра Аляксея Казлова прынялі ўдзел у рэспубліканскім суботніку на тэрыторыі „Планара“.
Працоўны дэсант працаваў стразу на некалькіх пляцоўках. Работнікі высадзілі алею» працоўны подзвіг краіны«, прыбралі не толькі завадскія плошчы, але і прылеглыя тэрыторыі, навялі парадак на працоўных месцах. Прыемны бонус для ўсіх завадчан, якія прынялі ўдзел у рэспубліканскім суботніку, — салдацкая каша і гарачая гарбата!
Рэспубліканскі суботнік у холдынгу «МЭТЗ ім.В. І. Казлова»
У сяброўскай абстаноўцы электразаводцы разам з намеснікам Міністра прамысловасці Леанідам Рыжкоўскім, генеральным дырэктарам завода Аляксандрам Радзевічам і работнікамі Мінпрама правялі будаўнічыя работы, прыбралі сквер ад лісця, вымылі вокны ў сталовай, а таксама прывялі ў парадак тэрыторыю прадпрыемства.
Рэспубліканскі суботнік у холдынгу «Амкадор»
Калектывы прадпрыемстваў холдынгу правялі ўборку вытворчых памяшканняў, офісаў, прылеглых і замацаваных тэрыторый, добраўпарадкавалі дваровыя зоны і абнавілі элементы вытворчай інфраструктуры. У агульнай складанасці прыведзена ў парадак звыш 23 тыс. кв. м тэрыторый.
Да калектыву холдынгу «Амкадор» далучыўся намеснік Міністра прамысловасці Дзяніс Бакей, які разам з супрацоўнікамі прыняў удзел ва ўборцы тэрыторыі. Такі сумесны ўдзел прадстаўнікоў органаў дзяржаўнага кіравання і работнікаў прадпрыемстваў яшчэ раз падкрэсліла згуртаванасць і адзінства мэт — працаваць на карысць сваёй краіны і яе людзей.
Усяго ўдзел у рэспубліканскім суботніку прыняло ўдзел каля 100 тыс работнікаў арганізацый сістэмы Мінпрама па ўсёй краіне.
У рамках агульнарэспубліканскага марафону добраўпарадкавання на Гомельшчыне з удзелам жыхароў рэгіёна і кіраўніцтва вобласці аднаўляюцца месцы памяці
На Гомельшчыне стала добрай традыцыяй, калі па ініцыятыве жыхароў рэгіёну сабраныя падчас суботнікаў сродкі накіроўваюцца на рэканструкцыю асаблівых месцаў памяці. Вынік такой маштабнай сумеснай работы апошніх гадоў — абноўленыя мемарыяльныя комплексы «Ала» ў Светлагорскім раёне, «Партызанская крынічка» пад Гомелем, «Азарычы» ў Калінкавіцкім раёне, мемарыяльны комплекс «Дзецям — ахвярам Вялікай Айчыннай вайны» на Жлобіншчыне. Цяпер частку сродкаў, заробленых падчас удзелу жыхароў Гомельшчыны у рэспубліканскім суботніку, накіруюць на рэканструкцыю комплексу воінскай славы ў гонар аперацыі «Баграціён» у Светлагорскім раёне.
Падчас агульнарэспубліканскага марафону добраўпарадкавання кіраўніцтва Гомельскага аблвыканкама арганізавала маштабны працоўны дэсант па добраўпарадкаванні тэрыторыі памятнага пахавання ў вёсцы Першамайск Рэчыцкага раёна. У гэтым годзе на месцы памяці распачаліся работы па рэканструкцыі брацкага пахавання ахвяр фашызму. Вельмі актыўна гэту ініцыятыву падтрымалі жыхары Рэчыцкага раёна і супрацоўнікі пракуратуры Гомельскай вобласці.
Першамайск (раней в. Кабылева) — адна з сотняў беларускіх вёсак, знішчаных нацыстамі ў гады акупацыі. Трагедыя тут адбылася 14 мая 1943 года: карны атрад СС пры ўдзеле мясцовых паліцаяў акружыў вёску. Людзей групамі па 20-30 чалавек заганялі ў дамы, расстрэльвалі і падпальвалі. Па архіўных дадзеных і сведчаннях відавочцаў, фашысты і іх памагатыя расстралялі і спалілі 1050 чалавек, з якіх амаль 600 — дзеці. Большасць загінула ў агні жывымі. Выратавацца ўдалося толькі дзесятку параненых, якія пазней расказалі пра тое, што адбылося. Па дадзеных акта аб зверствах акупантаў пасля фашысцкай расправы над мясцовымі жыхарамі масавыя пахаванні людзей знаходзіліся па ўсім перыметры вёскі. Пасля вайны целы ахвяр фашызму перапахавалі ў брацкай магіле ў цэнтры Першамайска, дзе і ўсталяваны памятны знак.
Канцэпцыю абнаўлення месца памяці распрацавала творчая каманда Інстытуту «Гомельграмадзянпраект». Праектам прадугледжана ўзвядзенне капліцы-званіцы, устаноўка памятнага знака, рэканструкцыя існуючага пахавання, добраўпарадкаванне тэрыторыі — у тым ліку ўладкаванне аўтамабільнай паркоўкі, санітарна-тэхнічнага блока, вонкавага асвятлення. Існуючая стэла будзе захавана. Акрамя таго спецыяльна для гэтага месца памяці створана аўтарская кампазіцыя — сімвал жалобы і памяці аб ахвярах фашызму — памятны знак «Смуткуючая маці».
Работы па рэканструкцыі брацкага пахавання ў Першамайску ўжо выкананы 75%, плануецца, што іх цалкам завяршыць ў лістападзе бягучага года.
Свой унёсак ў абнаўленне знакавага месца памяці падчас рэспубліканскага суботніку зрабілі старшыня аблвыканкама Іван Крупко, намеснікі кіраўніцтва вобласці, памочнік Прэзідэнта — інспектар па Гомельскай вобласці Руслан Пархамовіч, лідар дэпутацкага корпусу Гомельшчыны — Кацярына Зенкевіч, працоўныя калектывы, моладзь, а таксама старшыня Рэчыцкага райвыканкама Сяргей Даўгалёў і грамадскі актыў раёна, у тым ліку аўтар і стваральнік аднаго з аб’ектаў мемарыяла, уладальнік звання «Чалавек года» ў Гомельскай вобласці ў намінацыі «Майстар» Сяргей Раманюк.
Старшыня аблвыканкама Іван Крупко і яго намеснікі працавалі над укладкай тратуарнай пліткі. Маштабны працоўны дэсант кіраўніцтва вобласці дапамог выраўноўваць грунт вакол брацкага пахавання. Тут плануецца закласці сад з яблынь гатунку «Макун», якія красуюць чырвоным колерам.
— За час падрыхтоўкі да святкавання 80 гадавіны Вялікай Перамогі на Гомельшчыне было абноўлена мноства памятнікаў, абеліскаў, месцаў пахавання і герояў Вялікай Айчыннай, і мірных жыхароў, якія трагічна пацярпелі і загінулі падчас вайны. За гэты час амаль усе аб’екты прыведзены ў належны стан, — адзначыў старшыня аблвыканкама.
Адным з са знакавых месцаў памяці, на які скіравана ўвага, стала і памятнае пахаванне ў вёсцы Першамайск Рэчыцкага раёна.
- — Важна, што добраўпарадкаванне на гэтым аб’екце закране не толькі ўласна месца памяці, але тэрыторыю ўсёй вёскі. Зробім усё, каб можна было прыехаць, ускласці кветкі і аддаць даніну памяці загінулым ахвярам фашызму і і ўзгадаць тыя страшныя, трагічныя гады. Перакананы, што ніхто ніколі не павінен забываць трагізм вайны. Бо, калі не памятаць сваёй гісторыі, немагчыма будаваць будучыню, — падкрэсліў асаблівую значнасць народных праектаў захавання памяці аб Вялікай Айчыннай вайне Іван Крупко
Як адзначыў кіраўнік рэгіёна, цяперашні агульнарэспубліканскі марафон добраўпарадкавання, які актыўна падтрымалі жыхары Гомельшчыны, закране два асноўныя кірункі — аднаўленне памятных мясцін рэгіёна і добраўпарадкаванне населеных пунктаў Гомельшчыны. Усяго больш за 300 тысяч жыхароў вобласці ўключыліся ў навядзенне парадку на вуліцах населеных пунктах, у парках і скверах, тэрыторыях прадпрыемстваў, месцах баявой славы.
Чакаецца, што на Гомельшчыне агульнымі намаганнямі на суботніку будзе сабрана больш за пяць мільёнаў рублёў, палова сумы накіруецца на заканчэнне стварэння музейных экспазіцый комплексу воінскай славы ў гонар аперацыі «Баграціён».
Наталля КАПРЫЛЕНКА
фота ТК «Гомельшчына афіцыйна»
Гродзеншчына далучылася да рэспубліканскага суботніка
Па ўсёй Беларусі сёння ажыўлена! Рэспубліканскі суботнік сабраў беларусаў на самых розных аб’ектах. Канешне, Гродзеншчына не засталася ўбаку. Да навядзення парадку далучыліся каля 270 000 чалавек. Амаль усе калектывы ўзброіліся інвентаром і сталі часткай вялікай і важнай справы.
Па ўсёй вобласці было шмат лакацый, у асноўным парадак наводзілі на тэрыторыі зон рэкрэацыі. Так, дэндрапарк Скідальскага лясгаса стаў месцам прыцягнення ўдзельнікаў суботніка. Больш за 100 добраахвотнікаў, сярод якіх былі прадстаўнікі Гродзенскага абласнога выканаўчага камітэта, абласнога Савета дэпутатаў і работнікі лясгаса аб’ядналіся для добраўпарадкавання гэтага ўнікальнага кутка прыроды. Узброіўшыся інструментамі, яны з энтузіязмам прыняліся за працу. Актыўна да работы далучыліся старшыня Гродзенскага аблвыканкама Юрый Караеў і старшыня абласнога Савета дэпутатаў Алена Пасюта. Нягледзячы на дажджлівае і прахалоднае надвор’е, ніхто не адступіў ад сваіх планаў.
Падчас суботніка былі высаджаны маладыя дрэвы, якія з цягам часу стануць упрыгожаннем гэтага месца. Акрамя таго, удзельнікі ўстанавілі новыя інфармацыйныя стэнды, якія расказваюць аб флоры і фаўне дэндрапарку. Пасля завяршэння працы тэрыторыя аб’екта змянілася: зніклі сухія галінкі, апалае лісце і смецце, а дрэвы і хмызнякі набылі дагледжаны выгляд. Цяпер гэтае месца гатова цешыць наведвальнікаў сваёй чысцінёй і прыгажосцю.
Яшчэ адна буйная працоўная пляцоўка была ў аграгарадку Жыровічы. Там працоўную групу ўзначалілі намеснікі старшыні Гродзенскага аблвыканкама Віктар Пранюк і Андрэй Жук. Работнікі аблвыканкама працавалі над абнаўленнем тэрыторыі: разбіралі старыя пабудовы, прыбіралі зараснікі і закладвалі аснову для будучага парка. А супрацоўнікі Гродзенскага гарадскога выканаўчага камітэта прыводзяць у парадак лесапаркавую зону «Пышкі». Яны збіраюць сухастой, падалі галінкі і бярвенне.
Таксама падчас рэспубліканскага суботніка прафсаюзныя актывісты правялі ўборку ў санаторыі «Нёман-72» і турысцка-аздараўленчым комплексе «Пышкі». У маштабным мерапрыемстве прынялі ўдзел каля 80 чалавек, сярод якіх былі супрацоўнікі абласнога аб’яднання прафсаюзаў і прадстаўнікі галіновых прафсаюзаў.
Трэба адзначыць, што сродкі, сабраныя жыхарамі рэгіёну падчас суботніка, будуць размеркаваны наступным чынам: 50% пойдзе на будаўніцтва Нацыянальнага гістарычнага музея, а астатнія 50% — на добраўпарадкаванне Жыровіцкага манастыра і самога аграгарадка.
Вераніка Казлоўская
Фота Пул 4 рэгіён
Парк у форме сімвала Беларусі заклалі каля падножжа Кургана Славы падчас рэспубліканскага суботніка на Міншчыне
У Дзень Незалежнасці, ускладаючы кветкі да падножжа Кургана Славы, Прэзідэнт Беларусі Аляксандр Лукашэнка даў кіраўніцтву Мінскай вобласці даручэнне: разбіць каля мемарыяльнага комплексу парк, годны подзвігу герояў. Старшыня Мінскага аблвыканкама Аляксей Кушнарэнка паабяцаў, што яно будзе выканана — і слова сваё стрымаў. Сёння, 25 кастрычніка падчас рэспубліканскага суботніка быў закладзены новы зялёны сімвал памяці.
Дажджлівае надвор'е паспрабавала ўмяшацца ў планы ўдзельнікаў суботніка, але відавочна недаацаніла іх працавітасць і азарт. Таму кароткі інструктаж, і можна брацца за рыдлёўкі, граблі. Задача пастаўлена канкрэтная — высадзіць 400 адзінак саджанцаў дрэў і кустоў — дуб чырвоны, клён вастралісты, елка блакітная, ядловец, спірэя, туя, елка канадская, вярба ломкая і інш.
У кожнага дрэўца — свая кропка на карце, бо па выніку парк павінен мець форму крылаў бусла. І гэта таксама невыпадкова: белая птушка лічыцца заступнікам беларускага народа, чыстага душой, шчырага верай і дабром.
Курган Славы — адзін з самых вядомых манументаў краіны. Менавіта тут праходзіў найважнейшы этап вызваленчай аперацыі «Баграціён». Сімвалічны і сам манумент: чатыры штыкі — гэта чатыры фронты, якія вызвалялі краіну ад фашызму.
- Каля 100 тысяч чалавек штогод наведваюць Курган Славы — гэта не магло не адбіцца на яго стане. Да 80-годдзя вызвалення Беларусі комплекс было вырашана рэканструяваць, а вясной, падчас рэспубліканскага суботніка, каля яго падножжа з'явілася алея з 360 дрэў і 82 кустоў. Цяпер жа гэты святы для кожнага беларуса сімвал упрыгожвае і новы парк, увасоблены ў форме крылаў бусла — птушкі, якая лунае над зямлёй, якую калісьці адстаялі героі. У цэнтры парку ўсталявалі малыя архітэктурныя формы, плюс зрабілі пешаходныя дарожкі.
Дарэчы, 50 % заробленых сродкаў будуць накіраваны на распрацоўку праектна-каштарыснай дакументацыі аб'ектаў, якія ўваходзяць у склад гісторыка-культурнай каштоўнасці «Гарадзішча «Вал» у Заслаўі. Таксама сродкі пойдуць на закупку медыцынскага абсталявання хірургічнага корпуса № 2 «Мінскай ордэна Працоўнага Чырвонага Сцяга абласной клінічнай бальніцы».
Як паведаміў старшыня Мінскага аблвыканкама Аляксей Кушнарэнка, удзел у добраўпарадкаванні прымаюць больш за 330 тысяч жыхароў цэнтральнага рэгіёна. Яны добраўпарадкоўваюць скверы і паркі адпачынку, дзіцячыя пляцоўкі і тэрыторыі прадпрыемстваў. Таксама высаджана больш за 6 тысяч дрэў і кустоў, пры гэтым асаблівая ўвага нададзена мемарыялам Вялікай Айчыннай вайны.
Дарэчы, сам кіраўнік Міншчыны сёння працаваў каля Кургана Славы — тут быў закладзены парк. Гэты аб'ект, па словах губернатара, стане падарункам для ўсіх жыхароў і гасцей вобласці. «Кіраўнік дзяржавы, наведваючы Курган Славы ў рамках святкавання Дня Незалежнасці, даручыў разбіць парк каля падножжа мемарыяла. Мы вырашылі падысці да рэалізацыі гэтай задачы творча, былі распрацаваны тры канцэпцыі, — адзначыў Аляксей Кушнарэнка. — Мы іх усе разгледзелі і шляхам галасавання выбралі варыянт, які прадугледжвае высадку 400 дрэў і кустоў, уладкаванне дарожак, малых архітэктурных формаў. Пры выглядзе зверху дрэвы фарміруюць вобраз крылаў бусла. Як вядома, бусел — сімвал міралюбнасці нашай краіны.
Удзел у работах па пасадцы парка прынялі члены Мінаблвыканкама, абласны Савет дэпутатаў, моладзь. «У цэлым, у рэспубліканскім суботніку прымаюць удзел звыш 330 тысяч жыхароў вобласці. Яны працуюць ва ўсіх рэгіёнах Міншчыны: хтосьці на працоўных месцах, хтосьці займаецца навядзеннем парадку на зямлі, саджае дрэвы. Напрыклад, супрацоўнікі Бярэзінскага райвыканкама працуюць на аб'ектах аграпрамысловага корпуса. Пухавіцкага і Чэрвеньскага — добраўпарадкоўваюць крыніцы, у Жодзіне працуюць на добраўпарадкаванні прыбярэжнай паласы ракі. Усе ўключыліся ў гэтую добрую традыцыю правядзення рэспубліканскіх суботнікаў», — канкрэтызаваў губернатар.
Па словах кіраўніка Міншчыны, у цэнтральным рэгіёне плануецца зарабіць больш за 2 мільёна рублёў у рамках суботніка. «Гэтыя сродкі будуць падзеленыя на тры часткі: 50 % пойдуць на будаўніцтва Нацыянальнага гістарычнага музея Беларусі, а грашовыя сродкі, якія засталіся ў распараджэнні Мінаблвыканкама, будуць накіраваныя на распрацоўку праектна-каштарыснай дакументацыі гістарычнага вала ў Заслаўі і закупку медыцынскага абсталявання для хірургічнага корпуса абласной бальніцы», — рэзюмаваў Аляксей Кушнарэнка.
Данііл ХМЯЛЬНІЦКІ
Падчас рэспубліканскага суботніка жыхары Віцебскай вобласці ствараюць новыя месцы сілы
Галоўны аб’ект рэспубліканскага суботніка на Віцебшчыне — адноўлены сквер на перасячэнні вуліц імя К. Заслонава і С. Грыцаўца ў цэнтры Оршы, дзе ўсталёўваюць памятны знак у гонар прысваення гэтаму раённаму цэнтру ганаровага звання СНД «Горад працоўнай славы.1941 — 1945».
Сёння больш за паўсотні чалавек, сярод якіх кіраўніцтва раёна, спецыялісты-будаўнікі, прадстаўнікі грамадскіх аб’яднанняў, палітычных партый, маладзёжных арганізацый аб’ядналіся, каб зрабіць свой унёсак у добраўпарадкавання новага месца сілы, якое будзе звацца скверам Працоўнай славы. Добраахвотнікі ўкладваюць тратуарную плітку, бардзюры, разбіваюць газоны і кветнікі. Папярэдне закладзены электракамунікацыі, каб звязаць існуючае асвятленне з дэкаратыўнай падсветкай.
Як паведамілі ў Аршанскім райвыканкаме, галоўным элементам сквера плошчай 0,4 га будзе дзевяціметровая стэла з маналітнага бетона з размешчаным на ёй бронзавым барэльефам «Горад працоўнай славы». Стэлу ўсталююць на круглым подыуме з паліраванага граніта. Перад стэлай — трохкутная плошча, да якой, як прамяні, вядуць шырокія пешаходныя дарожкі.
Сродкі ад рэспубліканскага суботніка, што застануцца ў распараджэнні Віцебскага аблвыканкама, будуць выдаткаваны менавіта на ўладкаванне гэтага месца памяці і сілы. Стэла стане напамінам аб укладзе аршанцаў у перамогу над фашызмам і працоўны подзвіг жыхароў горада. Яны аднавілі стратэгічны чыгуначны вузел, іншыя прадпрыемствы адразу пасля вызвалення ад нямецка-фашысцкіх захопнікаў, у вельмі сціслыя тэрміны.
Адкрыццё стэлы і сквера задумана як частка святкавання Дня Кастрычніцкай рэвалюцыі
Да субботніка далучыліся ва ўсіх рэгіёнах Віцебшчыны. Першапачатковая ўвага накіравана на добраўпарадкаванне мемарыялаў, месцаў баявой і воінскай славы, знакавых аб’ектаў, тэрыторый населеных пунктаў, прадпрыемстваў і арганізацый.
Старшыня аблвыканкама Аляксандр Субоцін наведаў пастаянны лесапітомнік Віцебскага лясгаса, дзе на тэрыторыі плошчай 12 га вырошчыаюць дуб, бярозу, елку, чорную вольху для лесаўзнаўлення, а таксама дэкаратыўныя дрэвы і кусты для рэалізацыі насельніцтву. Затым ён са сваёй камандай далучыўся да пасадкі сеянцаў маладых дрэў у Лосвідскім лясніцтве.
Старшыня аблсавета дэпутатаў Дзмітрый Дзямідаў разам з землякамі працуе на сваёй малой радзіме, Полаччыне. Яны наводзяць парадак на мемарыяльным комплексе «Партызанам брыгады імя К.Я. Варашылава» у аграгарадку Гомель.
Святлана ЯКАЎЛЕВА
фота з адкрытых крыніц
На рэспубліканскім суботніку сабрана каля Br19, 4 млн
На рэспубліканскім суботніку, па папярэдніх дадзеных, сабрана каля Br19, 4 млн, што амаль на Br3 млн больш, чым на мінулым суботніку 12 красавіка. Такія лічбы прывяла намеснік прэм’ер-міністра Наталля Пяткевіч пасля ўдзелу ў суботніку на будаўніцтве хірургічнага корпуса Мінскай ордэна Працоўнага Чырвонага Сцяга абласной клінічнай бальніцы ў аграгарадку лясны Мінскага раёна, перадае БелТА.
Наталля Пяткевіч адзначыла, што да суботніка далучыліся 2,3 млн чалавек.
Сёння ў Беларусі праходзіць рэспубліканскі суботнік. Беларусы добраўпарадкоўваюць і прыводзяць у належны стан аб’екты і тэрыторыі населеных пунктаў, гісторыка-культурныя каштоўнасці, мемарыяльныя комплексы, месцы баявой і воінскай славы, пахаванні воінаў і партызан часоў Вялікай Айчыннай вайны.
З грашовых сродкаў, заробленых ад правядзення восеньскага суботніка, 50% пойдуць на будаўніцтва Нацыянальнага гістарычнага музея Беларусі і стварэнне яго пастаяннай экспазіцыі. Яшчэ 50% застануцца ў распараджэнні аблвыканкамаў, Мінскага гарвыканкама з магчымасцю іх накіравання на канкрэтныя аб’екты.
