У пятніцу на базе Столінскага райвыканкама прайшло выязное пасяджэнне Экспертна-кансультатыўнага савета пры Прэзідыуме Савета Рэспублікі з удзелам сенатараў, прадстаўнікоў міністэрстваў, ведамстваў і мясцовай вертыкалі ўлады. У цэнтры ўвагі ўдзельнікаў мерапрыемства стала рэалізацыя Праграмы развіцця раёнаў Прыпяцкага Палесся на 2025 — 2030 гады.

«Унікальны край, аналагаў якому ў свеце не знайсці»

Перад разглядам пытанняў эканамічнага парадку дня Старшыня Савета Рэспублікі Наталля Качанава ўручыла дзяржаўныя ўзнагароды — ордэны Маці — шматдзетным жыхаркам Столінскага раёна. «Самае галоўнае, чым ганарыцца наша зямля, і мы ўсё гэта ведаем у Беларусі, — сваімі моцнымі, дружнымі сем’ямі», — адзначыла Наталля Качанава.

Адкрываючы пасяджэнне Экспертна-кансультатыўнага савета, спікер Савета Рэспублікі падкрэсліла, што сёння стаўка зроблена на эканамічную самастойнасць і самае галоўнае — павышэнне якасці жыцця нашых грамадзян. Паводле слоў спікера, Праграма развіцця раёнаў Прыпяцкага Палесся на 2025 — 2030 гады прадугледжвае ўпэўнены пераход «ад аднаўлення да развіцця». Для шэрагу рэгіёнаў, якія доўгі час асацыяваліся ў асноўным з пераадоленнем наступстваў чарнобыльскай аварыі, гэты праект адкрывае прынцыпова новыя перспектывы.

Па даных Міністэрства эканомікі, маштабная праграма ахоплівае 9 раёнаў Брэсцкай і Гомельскай абласцей, уключае ў сябе каля 400 мерапрыемстваў, а агульны аб’ём фінансавання перавышае 5,4 мільярда рублёў. Асаблівую ўвагу Наталля Качанава звярнула на тое, што праграма цалкам забяспечана фінансаваннем і збалансавана, аднак мясцовай вертыкалі ўлады і дэпутацкаму корпусу неабходна ўключацца ў работу максімальна актыўна.

«Я яшчэ раз паўтаруся: гэта вялікае дабро, калі ёсць праграма, якая пацверджана фінансаваннем. Таму, калі задача пастаўлена — яна павінна выконвацца. Вельмі жорстка ў сучасных умовах. Гэта значыць, сказана — рабі», — заявіла Старшыня Савета Рэспублікі.

Наталля Качанава таксама выказала здзіўленне тым, што ад некаторых рэгіёнаў да гэтага часу адсутнічаюць заяўкі на атрыманне льготных крэдытных рэсурсаў пад новыя індустрыяльныя і турыстычныя праекты. Яна даручыла Міністэрству эканомікі больш актыўна працаваць з бізнесам «у ручным рэжыме», каб аб даступных прэферэнцыях ведалі патэнцыяльныя інвестары па ўсёй краіне, а не толькі ўнутры Палесся.

Спікер выказала ўпэўненасць у тым, што калі бягучая праграма будзе цалкам рэалізаваная да 2030 года, Беларусь атрымае абсалютна «ўнікальны край, аналагаў якому ў свеце не знайсці».

Стратэгічныя арыенціры доўгатэрміновага росту

Закранаючы тэму рэалізацыі праграмы, член Пастаяннай камісіі Савета Рэспублікі па заканадаўстве і дзяржаўным будаўніцтве, намеснік старшыні Гомельскага аблвыканкама Ксенія Панцюхова звярнула ўвагу на тое, што да тэрыторыі Прыпяцкага Палесся аднесены пяць раёнаў Гомельшчыны: Ельскі, Жыткавіцкі, Калінкавіцкі, Лельчыцкі і Петрыкаўскі. Сумарна яны займаюць 32 % тэрыторыі вобласці. Колькасць насельніцтва, якое пражывае ў раёнах, — каля 145 тысяч чалавек.

У 2025 годзе ў Гомельскай вобласці было рэалізавана 117 мерапрыемстваў праграмы, у тым ліку 39 — у сацыяльнай сферы, 17 — у сферы ЖКГ і энергетыкі. Сярод яркіх прыкладаў Ксенія Панцюхова назвала стварэнне ў Жыткавіцкім раёне вытворчасці швейнай прадукцыі, увядзенне ў Калінкавіцкім раёне лініі змешвання і дазавання сумесяў на аснове сухога малака — менавіта там цяпер вырабляецца сухое марожанае, якое карыстаецца вялікай папулярнасцю. У Лельчыцкім раёне прыватным прадпрыемствам арганізавана вытворчасць прадукцыі дрэваапрацоўкі.

«У сферы турызму ў Петрыкаўскім раёне ў Нацыянальным парку „Прыпяцкі“ ў гасцініцы адкрыта зона спа-паслуг. Рэалізаваны шэраг праектаў і ў іншых сферах. У кожным з пяці раёнаў Прыпяцкага Палесся таксама праведзены работы па меліярацыі на плошчы больш за 6 тысяч гектараў. Сярод іншага — заменена больш за 7 кіламетраў сетак водазабеспячэння і 4 кіламетры водаадвядзення са звышнарматыўнымі тэрмінамі эксплуатацыі. У энергетыцы рэканструявана каля 105 кіламетраў размеркавальных электрычных сетак», — канкрэтызавала намеснік старшыні Гомельскага аблвыканкама.

Яна таксама звярнула ўвагу на тое, што ў 2026 годзе рэалізуецца 139 мерапрыемстваў праграмы, у тым ліку 44 — у сацыяльнай сферы, 11 — у сельскай гаспадарцы, 15 — па правядзенні меліярацыі, 13 — у прамысловасці, 18 — у транспарце, 10 — у турызме, 16 — у жыллёва-камунальнай гаспадарцы і энергетыцы, 7 — у сферы гандлю і паслуг, 5 — у лясной гаспадарцы.

У Брэсцкай вобласці да Прыпяцкага Палесся адносяцца чатыры раёны: Ганцавіцкі, Лунінецкі, Столінскі і Пінскі. Першы намеснік старшыні Брэсцкага аблвыканкама Дзмітрый Гарадзецкі падкрэсліў, што ў поўным аб’ёме выконваюцца гадавыя планы па меліярацыі, абнаўленні аўтобусна-машынна-трактарнага парку, рамонце дарог, замене сетак водазабеспячэння, будаўніцтве валаконна-аптычных ліній.

Дзмітрый Гарадзецкі дэталёва прадставіў эканамічны і сацыяльны патэнцыял паўднёвых тэрыторый вобласці. Асноўны акцэнт зроблены на неабходнасці інтэнсіфікацыі аграпрамысловага комплексу, мадэрнізацыі мясцовых вытворчасцяў. Акрамя таго, пазначаны стратэгічныя арыенціры доўгатэрміновага росту Палесся. Рэгіён разглядаецца як зона з высокім узроўнем сацыяльна-эканамічнага развіцця, што патрабуе збалансаванага падыходу да развіцця інфраструктуры і стварэння новых вытворчасцяў.

* * *

Пасля пасяджэння ўдзельнікі мерапрыемства ўсклалі кветкі да помніка на магіле савецкіх воінаў і партызан, пасля чаго наведалі шэраг культурных і прамысловых аб’ектаў Століншчыны.

Паводле прэс-службы Савета Рэспублікі

Фота БелТА