Для абмеркавання інавацый у сферы ліквідацыі наступстваў НС і развіцця тэхналогій двайнога прызначэння на міжнароднай выставе 2025 года Shanghai International Emergency & Dual-Use Expo сабраліся вучоныя, эксперты галіны і прадстаўнікі дзяржаўных ведамстваў розных краін свету. Як паведамляе Міністэрства надзвычайных сітуацый, свой стэнд на мерапрыемстве прадставіў і Універсітэт грамадзянскай абароны МНС Беларусі.
Галоўная задача выставы — прадэманстраваць тэхналогіі, якія дазваляюць прадухіляць і эфектыўна ліквідаваць НС. Сярод яе арганізатараў — Міжнародны альянс аварыйна-ратавальных службаў Кітая, Асацыяцыя беспілотнай авіяцыі Кітая, кампанія «Санлін Дэвелапмент парка праграмнага забеспячэння Пудун» і Шанхайская міжнародная кампанія па арганізацыі кангрэсаў і выстаў.
Акрамя прадстаўнікоў Беларусі, у мерапрыемстве прынялі ўдзел спецыялісты з Кітая, Казахстана, Бангладэш, Аўстрыі, Венгрыі і іншых дзяржаў. З прывітальным словам на адкрыцці выступіў віцэ-прэзідэнт Міжнароднага альянсу аварыйна-ратавальных службаў Кітая Чжан Цзінхуа, які падкрэсліў значэнне міжнароднага супрацоўніцтва і абмену вопытам у сферы бяспекі.
Экспазіцыя беларускага ўніверсітэта пазнаёміла міжнародную супольнасць са сваімі ключавымі навуковымі распрацоўкамі, перспектыўнымі даследаваннямі і дасягненнямі. Асаблівую ўвагу ўдзялілі сучасным адукацыйным праграмам для падрыхтоўкі высокакваліфікаваных спецыялістаў. Госці выставы змаглі ацаніць навукова-тэхнічныя праекты, вынікі даследаванняў і ўнікальныя методыкі падрыхтоўкі ратавальнікаў, якія паспяхова прымяняюцца не толькі ў Беларусі, але і далёка за яе межамі.
Аміна НАЗАРАВА.
Фота: Міністэрства надзвычайных сітуацый Рэспублікі Беларусь.
