Сабаленка пацвердзіла статус наймацнейшай на планеце
Другі год запар пераможцай турніру WTA-500 у аўстралійскім Брысбене стала беларуска Арына Сабаленка. Прызавы фонд турніру сёлета склаў $ 1,2 млн.
У вырашальным паядынку першая ракетка планеты абыграла ўкраінскую тэнісістку Марту Касцюк, якая займае 26-е месца ў сусветным рэйтынгу, — 6:4, 6:3. Фінальная сустрэча працягвалася 1 гадзіну 19 хвілін. У выніку ў актыве Арыны Сабаленка стала 22 чэмпіёнскія тытулы на турнірах пад эгідай WTA.
У тэлеграме прэзідэнта НАК Беларусі Віктара Лукашэнкі адзначаецца, што, прадэманстраваўшы цудоўную гульню і форму на старце сезона, Сабаленка зноў даказала статус наймацнейшай і падарыла цудоўныя эмоцыі беларусам, якія падтрымліваюць яе і ганарацца яе дасягненнямі.
Характэрна, што на шляху да фіналу цяперашняга турніру Сабаленка не аддала саперніцам ніводнага сэта, перамогшы прадстаўніцу Іспаніі Крысціну Букшу (50-ы нумар рэйтынгу WTA), румынку Сарану Кырсцю (41-ы), амерыканку Мэдысан Кіз (7-ы), чэшку Караліну Мухаву (19-ы).
Цяпер у актыве першай ракеткі планеты 10990 рэйтынгавых ачкоў. Сваю найбліжэйшую праследавацельніцу польку Ігу Свёнтак Сабаленка апярэджвае на 2662 ачкі.
Спаборніцтвы ў Брысбене сталі адной з апошніх праверак сіл перад першым у новым сезоне турнірам серыі «Вялікага шлема» — адкрытым чэмпіянатам Аўстраліі. Маючы адбыцца Australіan Open пройдзе ў Мельбурне з 18 студзеня да 1 лютага.
«Віцебск» упершыню ў гісторыі выйграў Еўра-Азіяцкі Кубак Дружбы
Хакейны клуб «Віцебск» стаў першым беларускім клубам, які перамог на традыцыйным міжнародным турніры па хакеі «Еўра-Азіяцкі Кубак Дружбы».
Фінальны этап спаборніцтваў праходзіў на сталічнай «Чыжоўка-Арэне». У вырашальным матчы віцябчанам супрацьстаяў дзейны чэмпіён Усерасійскай хакейнай лігі «Тарпеда-Горкі». «Віцебск» выйшаў наперад ужо праз 95 секунд пасля стартавага ўкідвання намаганнямі Вячаслава Іпатава, а на 14-й хвіліне сустрэчы Яўген Астанкоў падвоіў перавагу беларускага клуба.
У другім перыядзе каманды абышліся без галоў, у пачатку заключнай трэці ніжагародцы таксама ў гульні ў фармаце «5 на 4» скарацілі адставанне да мінімуму. Да фінальнай сірэны лічбы на табло не змяніліся, у выніку — 2:1 на карысць віцябчан. 10 студзеня ў паўфінале падапечныя Рамана Юпатава абыгралі мінскае «Юнацтва» (4:0).
Гэты трафей стаў трэцім у клубнай калекцыі «Віцебска» — раней «мядзведзі» двойчы выйгравалі Кубак Руслана Салея (2022, 2023). А вось Еўра-Азіяцкі Кубак Дружбы дагэтуль не пакараўся беларускімі камандамі, папярэднімі пераможцамі турніру былі цюменскі «Рубін» (сезон — 2022/23), «Хімік» з Васкрасенска (2023/24) і «Нафтавік» з Альмецьеўска (2024/25).
