Злачынная схема выглядала надзейнай, як швейцарскі гадзіннік, і эфектыўна працавала больш за паўгода. У Мазыры вынесены прыгавор па рэзананснай крымінальнай справе аб крадзяжы прадуктаў у школьнай сталовай. Пра гэта паведамляе тэлеграм-канал «МОЗЫРЬ».
Загадчыца вытворчасці і дзве яе падначаленыя на працягу паўгода сістэматычна кралі ежу, прызначаную для дзяцей.
Як устанавіў суд, злачынная схема дзейнічала з верасня 2024-га па сакавік 2025 года. Абвінавачаныя рэгулярна закладвалі пры падрыхтоўцы страў меншую колькасць прадуктаў, чым належыць па нормах.
Акрамя таго, яны замянялі адны прадукты іншымі, відаць, таннейшымі, а таксама выдавалі школьнікам порцыі паменшанага аб’ёму і вагі.
Зэканомленыя такім несумленным спосабам прадукты харчавання саўдзельніцы дзялілі паміж сабой і забіралі. Агульная сума ўрону склала больш як Br750.
Каб схаваць нястачу, загадчыца ўносіла ў справаздачныя дакументы заведама ілжывыя звесткі аб поўным выкарыстанні ўсяго аб’ёму прадуктаў.
Прыгавор суда
Суд прызнаў усіх трох жанчын вінаватымі ў крадзяжы шляхам злоўжывання службовымі паўнамоцтвамі па папярэдняй змове групай асоб.
Загадчыцы прызначана пакаранне ў выглядзе 3 гадоў пазбаўлення волі са штрафам у 150 базавых велічынь. Таксама ёй забаронена займаць кіруючыя пасады на працягу 5 гадоў.
Дзве работніцы сталовай атрымалі па 2 гады пазбаўлення волі са штрафам у 70 «базавых» кожнай.
Суд пастанавіў не прыводзіць у выкананне рэальнае пазбаўленне волі, устанавіўшы для ўсіх асуджаных выпрабавальны тэрмін. Гэта азначае, што яны пазбягаюць калоніі, калі на працягу гэтага тэрміна не зробяць новых злачынстваў і будуць выконваць ускладзеныя судом абавязкі.
Прыгавор пакуль не ўступіў у законную сілу і можа быць абскарджаны.
