Як заўважыў Дзяніс Каржыцкі, чырвонай ніткай у Праграме сацыяльна-эканамічнага развіцця Беларусі ідзе пытанне тэхналагічнага суверэнітэту, развіцця вытворчасцяў. «Гэта 25 буйных інвестыцыйных праектаў. Але, натуральна, не толькі гэтыя праекты будуць рэалізоўвацца. Ёсць шэраг праектаў, якія забяспечваюць укараненне новых тэхналогій, скразных тэхналогій. Указам № 135 Прэзідэнта на новую пяцігодку зацверджаны прыярытэтныя тэхналогіі, якія павінны распрацоўвацца і ўкараняцца ў рэальным сектары краіны. Дзяржаўны камітэт па навуцы і тэхналогіях працуе над напаўненнем дзяржпраграмы інавацыйнага развіцця. Мы праводзім экспертызу праектаў, якія будуць заходзіць у новую пяцігодку. У рамках дзяржпраграмы інавацыйнага развіцця ў мінулую пяцігодку каля 100 праектаў рэалізоўвалася. У прынцыпе, мы разлічваем, што ў гэтай пяцігодцы мы таксама набяром такую ж колькасць праектаў, якія будуць працаваць на краіну ў рамках прыярытэтных напрамкаў», — сказаў старшыня ДКНТ.

 

Разам з тым, распрацоўваюцца і напаўняюцца канкрэтнымі заданнямі 20 дзяржаўных навукова-тэхнічных праграм практычна па ўсіх галінах эканомікі, прыярытэтных відах дзейнасці і 6 арыгінальных навукова-тэхнічных праграм. «Гэта тыя распрацоўкі новай прадукцыі, новых тэхналогій, якія будуць рэалізоўвацца ў рэгіёнах. Прэзідэнт асобна даручыў нам зрабіць больш жорсткай экспертызу, забяспечыць адбор толькі высокаэфектыўных, запатрабаваных у рэальным сектары распрацовак. Мы гэтым зараз і займаемся, праходзяць экспертызы праектаў. Экспертыза мадыфікуе праект так, каб ён дапамагаў менавіта рэальнаму сектару. У нашых вучоных вельмі часта ёсць распрацоўкі, якія для ўсяго свету нешта новае прадстаўляюць. Мы, вядома, забяспечваем, каб траплялі тыя, якія патрэбныя менавіта нашай краіне і якія прынясуць карысць у бліжэйшую пяцігодку. Наша задача — забяспечыць менавіта такі адбор», — адзначыў Дзяніс Каржыцкі. Паводле яго слоў, у праграму на пяцігодку заходзяць у тым ліку праекты па рабатызацыі вытворчасцяў, што забяспечыць рост прадукцыйнасці працы і якасць вырабленай прадукцыі. 

«Наша краіна, вядома ж, славіцца навуковымі распрацоўкамі ў галіне аховы здароўя. Рэалізаваны праекты, якія забяспечылі, напрыклад, перасадку сэрца (РНПЦ „Кардыялогія“). Мы ўвайшлі ў дзясятку краін, якія забяспечваюць гэту ўнікальную аперацыю. Таксама створаны распрацоўкі па лячэнні анказахворванняў. Мы ўваходзім у лідары сярод гэтых распрацовак. Напрыклад, такое захворванне, як лімфома, ужо можна вылечыць, вядуцца эксперыментальныя ўкараненні методык лячэння, — сказаў Дзяніс Каржыцкі. — У новай пяцігодцы разлічваем укараніць новыя праекты па вытворчасці ветэрынарных прэпаратаў. На сённяшні дзень гэта істотная доля імпарту. Шэраг медыцынскіх прэпаратаў на аснове плазмы крыві — таксама плануем пашырыць вытворчасць. Гэта біятэхналогіі, якія ўваходзяць у прыярытэты для нашай эканомікі на наступныя пяць гадоў». 

Як адзначыў кіраўнік ДКНТ, Прэзідэнт асобна звяртаў увагу, што трэба паскорыць рэалізацыю гэтых праектаў. «Гэта могуць быць невялікія праекты, але яны павінны рэалізоўвацца хутка. Для гэтага ў нас у новай дзяржаўнай праграме інавацыйнага развіцця прадугледжаны шэраг новых механізмаў. Гэта і комплексныя праекты, і праекты з паніжанымі крытэрыямі эфектыўнасці, але якія забяспечваюць рабатызацыю, укараненне штучнага інтэлекту ў тэхналагічныя ланцужкі вытворцаў. Гэтай работай мы зараз актыўна займаемся, каб як мага хутчэй запусціць праекты новай пяцігодкі, выканаць усе задачы сацыяльна-эканамічнага развіцця», — сказаў на заканчэнне Дзяніс Каржыцкі.

 

Пасля мерапрыемства работнікі абмеркавалі пачутае. Мадэрнізацыя вытворчасцяў, укараненне новых тэхналогій, падрыхтоўка кадраў — усё гэта цікавіць калектыў, асаблівая цікаўнасць у маладых работнікаў. Як адзначыла спецыяліст па рабоце з моладдзю і сакратар пярвічнай арганізацыі БРСМ на прадпрыемстве Юлія Грушэўская, маладыя людзі — гэта тыя, хто гатовы здзяйсняць добрыя перамены для стабільнай будучыні. «Сёння на сустрэчы было вельмі шмат маладых работнікаў прадпрыемства. Дарэчы, у нас ва ўзросце да 31 года працуе 365 чалавек. Гэта досыць вялікая маладая каманда, якая заўсёды актыўная, цікаўная», — сказала яна. 

 

Па словах Юліі Грушэўскай, сучаснае прадпрыемства прыцягвае маладыя кадры. «Моладзь актыўна і з задавальненнем прыходзіць да нас на прадпрыемства — прыходзяць на практыку і застаюцца працаваць. Замацавальнасць — 51 %. Напрыклад, у 2025 годзе прыйшоў на работу 31 малады спецыяліст, на сёння з іх 28 працуюць», — сказала Юлія Грушэўская. Касцяк калектыву прадпрыемства — жанчыны.

Фота Леаніда Шчаглова