Пасяджэнне Савета Еўразійскай эканамічнай камісіі адбылося 13 сакавіка. Пра яго вынікі журналістам расказала віцэ-прэм’ер Беларусі Наталля Пяткевіч, паведамляе БелТА.

«Гэта наша апошняе пасяджэнне савета перад Еўразійскім міжурадавым саветам, таму мы, уласна, падрыхтавалі ўвесь пакет дакументаў для разгляду прэм’ер-міністрамі і сфарміравалі той парадак дня, які ў Казахстане літаральна праз паўтара тыдня будзе разглядацца», — паведаміла Наталля Пяткевіч. 

Паводле яе слоў, упершыню вельмі шмат увагі на пасяджэнні было нададзена пытанням лічбавага парадку ў рамках ЕАЭС, развіцця штучнага інтэлекту і каардынацыі намаганняў краін «пяцёркі» ў гэтым напрамку. «Вельмі вялікі блок пытанняў у сувязі з геапалітычнымі ўмовамі быў прысвечаны абароне нашага спажывецкага рынку, забеспячэнню нашых грамадзян неабходнымі таварамі, каб не было дэфіцыту тых ці іншых тавараў, звязанага з умовамі надвор’я і з пэўнымі абмежаваннямі паставак. Для гэтага трэба прымаць пэўныя меры рэгулявання ў рамках нашай мытнай прасторы. І па гэтых пытаннях дзесьці мы прыйшлі да кансэнсусу, прынялі рашэнні па асобных таварных пазіцыях. Дзесьці мы яшчэ дапрацуем, але разуменне ёсць, і мы прымем рашэнне так, каб грамадзяне не адчувалі дэфіцыт тых ці іншых тавараў, перш за ўсё, вядома, прадуктаў харчавання», — сказала віцэ-прэм’ер.

• Значная ўвага была ўдзелена развіццю прамысловай кааперацыі ў ЕАЭС. «Мы ідзём у напрамку дэбюракратызацыі і развіцця праграмы прамысловай кааперацыі з тым, каб фінансаванне прамысловых праектаў на нашу „пяцёрку“, у якіх будуць задзейнічаны суб’екты гаспадарання некалькіх краін, ішло больш аператыўна, быў больш хуткі і дэбюракратызаваны доступ да фінансавых рэсурсаў», — звярнула ўвагу Наталля Пяткевіч. 

«Вельмі доўга — напэўна, некалькі месяцаў — мы ішлі, але нарэшце ўзгаднілі новыя дадатковыя таварныя пазіцыі, якія змогуць удзельнічаць у дзяржзакупках. Гэта вельмі складаны працэс, таму што ідзе пошук кампрамісаў усіх краін, кожны абараняе свой нацыянальны рынак. Тым не менш мы ўсё ж такі ўжо прыйшлі да пагаднення, і спіс тавараў Еўразійскага саюза, якія могуць удзельнічаць у дзяржзакупках, папоўніўся яшчэ шэрагам пазіцый, вельмі актуальных для нашых краін», — адзначыла яна. 

Таксама на пасяджэнні прынята праграма абароны правоў спажыўцоў у ЕАЭС, вялікі блок пытанняў датычыўся функцыянавання адзінай мытнай прасторы, кантролю мытнага кошту падаткаёмістых тавараў. «Таму што, улічваючы, што наша прастора ўнутры без меж, мы адчуваем пэўны ціск і па кантрафакце, і па несанкцыянаваным увозе прадукцыі, і па ўвозе прадукцыі так званага шэрага імпарту. Мы заслухалі чарговы даклад аб маніторынгу сітуацыі і намецілі крокі, якія нам неабходна яшчэ прыняць для таго, каб і павысіць збіральнасць падаткаў, і „ачысціць“ наш рынак», — патлумачыла Наталля Пяткевіч.