Пазначаючы прыярытэтныя задачы для ведамства, Наталля Пяткевіч звярнула ўвагу, што кіраўнік дзяржавы сваімі рашэннямі наглядна прадэманстраваў узрастаючую

ролю, якая ў гэтай пяцігодцы адводзіцца Міністэрству працы і сацыяльнай абароны. «Гэта міністэрства набывае ключавое, стратэгічнае значэнне, — адзначыла яна. — А значыць, павінна быць і пэўная трансфармацыя ў функцыянале ведамства».

Паводле яе слоў, міністэрства павінна займацца ідэалогіяй і эканомікай працы і сацыяльнай абароны. «Сёння мы не можам сабе дазволіць займацца толькі пострэгуляторыкай, — падкрэсліла віцэ-прэм’ер. — Самае галоўнае, на чым цяпер трэба сканцэнтравацца, — гэта выбудоўваць стратэгічнае бачанне развіцця сацыяльна-працоўнай сферы і сацыяльнай абароны. Міністэрства працы і сацыяльнай абароны павінна быць паўнавартасным рэгулятарам у тых сферах, якія яму падведамасныя».

Наталля Пяткевіч звярнула ўвагу, што Андрэй Лабовіч у сістэме Мінпрацы і сацабароны чалавек не новы. Яна падкрэсліла, што прызначыць на пасаду міністра кіраўніка з яго вопытам работы — правільнае рашэнне. Віцэ-прэм’ер таксама адзначыла ўклад у развіццё сістэмы Наталлі Паўлючэнка, якая дагэтуль узначальвала Міністэрства працы і сацыяльнай абароны, і падзякавала за яе самаадданасць і прафесіяналізм падчас работы на гэтай пасадзе.

Гаворачы аб прызначэнні Наталлі Паўлючэнка членам Савета Рэспублікі, намеснік Прэм’ер-міністра падкрэсліла, што гэтае рашэнне сведчыць аб увазе, якую кіраўнік дзяржавы надае пытанням працы і сацыяльнай абароны ў бягучай пяцігодцы. «Гэта рашэнне сведчыць аб многім: і аб прафесіяналізме Наталлі Віктараўны, і аб тым, чым нам з вамі прыйдзецца займацца ў найбліжэйшыя пяць гадоў», — дадала яна.

Новы міністр працы і сацыяльнай абароны Андрэй ЛАБОВІЧ заявіў, што настроены на комплекснае і стратэгічнае вырашэнне галіновых пытанняў. Паводле яго слоў, цяперашнія кірункі работы ведамства застаюцца прыярытэтнымі ў рамках выканання Праграмы сацыяльна-эканамічнага развіцця. Але падыход да вырашэння галіновых пытанняў павінен быць больш стратэгічным і комплексным. 

Адпаведна, работа будзе выбудавана менавіта ў такім ключы і ў інтарэсах дзяржавы і грамадзян.

Адказваючы на пытанне аб стратэгіі развіцця рынку працоўных рэсурсаў, Андрэй Лабовіч адзначыў, што яго сёння адрознівае дынамізм. Узнікаюць новыя патрэбы эканомікі і бізнесу, з’яўляюцца новыя фарматы занятасці насельніцтва. «Наша задача — стратэгічная. Яна заключаецца ў тым, каб не вырашаць задачы пастфактум, а прадбачыць усе тэндэнцыі і ісці на апярэджанне, ствараць умовы для бізнесу, для нашых грамадзян», — перакананы кіраўнік ведамства.

Міністэрству працы і сацыяльнай абароны сёння быў пастаўлены шэраг задач па ўсіх кірунках работы: пачынаючы ад працоўнай сферы, заканчваючы сацыяльнымі паслугамі, клопатам пра пажылых, маламаёмных, інвалідаў. «Важна разумець наш функцыянал праз у тым ліку эканоміку сацыяльнай сферы, улічваючы, што падтрымка павінна быць адрасная, кропкавая, сапраўды тым грамадзянам, якія маюць у ёй патрэбу», — рэзюмаваў Андрэй Лабовіч.

Данііл ХМЯЛЬНІЦКІ