Герой тыдня. Кірыл Маскевіч — абсалютны чэмпіён Беларусі па грэка-рымскай барацьбе. Гэты тытул спартсмен, які выступае ў вагавой катэгорыі да 97 кг заваяваў у схватцы з чэмпіёнам краіны 2025 года Паўлам Глінчуком, які выступае ў катэгорыі да 130 кг. Кірыл Маскевіч з’яўляецца пераможцам Кубка свету 2020 года, сярэбраным медалістам чэмпіянату свету 2021 года і двухразовым прызёрам кантынентальных форумаў (2021-ы — «серабро», 2024-ы — «бронза»).
Надзеі тыдня. У Мінску завяршыўся трэці сезон адкрытага рэспубліканскага каманднага турніру «Ліга Храбрых» па вольнай і грэка-рымскай барацьбе. Пераможцамі гэтага сезона сталі юныя барцы з Масквы, якія ў фінале сустрэліся з камандай Магілёўскай вобласці. Перамогу маскоўскім спартсменам прынёс вынік 17:13. Бронзавыя медалі спаборніцтваў — 2024/2025 заваявала каманда Гродзенскай вобласці.
Турнір тыдня. На базе РЦАП па зімовых відах спорту «Раўбічы» завяршылася адкрытае першынство Рэспублікі Беларусь па біятлоне. Медалі разыгрываліся ў дзвюх узроставых катэгорыях, сярод біятланістаў 2003–2005 гадоў нараджэння і сярод спартсменаў 2006–2009 гадоў нараджэння. Двухразовым пераможцам турніру ў юніёраў (U21) стаў Глеб Арлоўскі з Мінскай вобласці, які выйграў спрынт і пасьют. У мас-старце «золата» заваяваў прадстаўнік Магілёўшчыны Аляксей Логвінаў.
У юніёрак двойчы на верхнюю прыступку п’едэстала ўзнімалася Аліна Зайцава з Віцебскай вобласці (спрынт, мас-старт), а ў гонцы праследавання наймацнейшай стала Алена Кулак (Мінская вобласць). У спаборніцтвах юнакоў (U18) Серафім Сайко выйграў спрынт і пасьют. У гэтых жа відах праграмы ў дзяўчат найлепшыя вынікі паказала Анастасія Цітова з Віцебскай вобласці. Перамогі ў індывідуальных гонках атрымалі Аляксандр Шыкун (Мінск) і Ульяна Каморнікава (Мінская вобласць).
Каманда тыдня. Жаночая зборная Беларусі U18 па валейболе выйграла турнір «Лакавалей» у Новасібірску. Удзел у спаборніцтвах сярод юнакоў і дзяўчат не старэй за 18 гадоў прынялі каманды з розных рэгіёнаў Расіі, а таксама валейбалісты з Беларусі, Казахстана і Манголіі. У фінале беларускія спартсменкі сустрэліся з камандай Чалябінскай вобласці, якую абыгралі з вынікам 2:0. Найлепшым гульцом турніру была прызнана блакіруючая беларускай каманды Аіда Даўтава.
Поспех тыдня. На «Сібір-Арэне» ў Новасібірску прайшоў Кубак Выкліку Маладзёжнай хакейнай лігі з удзелам найлепшых гульцоў бягучага сезона МХЛ. У матчы сышліся каманды Заходняй і Усходняй канферэнцый МХЛ. Сярод найлепшых гульцоў «Захаду» — абаронцы «Дынама-Шынніка» Канстанцін Валочка і Аляксандр Яцэнка, а галоўны трэнер бабруйскага клуба Андрэй Міхалёў увайшоў у трэнерскі штаб зборнай. Пераможцам матча з вынікам 7:4 стала каманда Захаду. Каманда Заходняй канферэнцыі МХЛ заваявала Кубак Выкліку ў дзясяты раз.
