У Маладзечанскім раёне пачасціліся выпадкі махлярства шляхам узлому ўліковага запісу ў месенджары Telegram. Зламыснікі на падставе ўдзелу ў «дабрачыннай акцыі» выкрадаюць акаўнты грамадзян і ўжо ад іх імя ажыццяўляюць ашуканскія дзеянні.

Пра тое, як гэта адбываецца, расказаў начальнік Маладзечанскага РАУС Вадзім Прыгара. «Гэтая схема падману выглядае наступным чынам. Зламыснік адпраўляе ад імя карыстальніка ўжо ўзламанага ўліковага запісу паведамленне наяўным кантактам з просьбай ажыццявіць „галасаванне“. Сайт „галасавання“, як і сама падстава, могуць адрознівацца. Напрыклад, могуць папрасіць прагаласаваць за дзяўчынку, якая ўдзельнічае ў конкурсе або для аказання дапамогі ў сувязі з сур’ёзным захворваннем. Атрымаўшы такое паведамленне, грамадзяне пераходзяць па спасылцы, пасля чаго пакідаюць свой голас», — растлумачыў ён.

Далей у мэтах пацвярджэння галасавання або ідэнтыфікацыі асобы сайт патрабуе ажыццявіць уваход ва ўліковы запіс, пры гэтым неабходна ўвесці свой абаненцкі нумар, да якога прывязаны ўліковы запіс, а таксама ў далейшым праверачны код, які можа прыйсці ў паведамленні ў самім месенджары, у СМС-паведамленнях на абаненцкі нумар, а таксама на электронную пошту.

«Варта разумець, што грамадзяне для галасавання пераходзяць па ашуканскіх спасылках, якія ствараюць зламыснікі. У сувязі з гэтым у момант уводу сваіх даных (нумар і код) гэтыя звесткі непасрэдна трапляюць да зламыснікаў», — адзначыў Вадзім Прыгара.

Пасля атрымання неабходнай інфармацыі зламыснік на іншай прыладзе ажыццяўляе ўваход ва ўліковы запіс грамадзяніна, які ажыццявіў «галасаванне». Пры гэтым уладальніку ўліковага запісу прыходзіць Push-паведамленне, а таксама ў службовым дыялогу з Telegram высвечваецца паведамленне аб аўтарызацыі новай прылады. Каб выдаліць прыладу ўладальніка ўліковага запісу, зламыснік некаторы час (некалькі гадзін) не здзяйсняе якіх-небудзь дзеянняў на акаўнце, каб не прыцягнуць увагу ўладальніка.

Пасля выдалення прылады ўладальніка з акаўнта зламыснік пачынае рассылку паведамленняў наяўным кантактам з просьбай таксама ажыццявіць «галасаванне» альбо пазычыць грашовыя сродкі, пры гэтым уладальнікі доступ да свайго ўліковага запісу страчваюць (адбываецца выхад на прыладзе).

У міліцыі нагадваюць, што любыя коды на вашай прыладзе павінны быць вядомыя толькі вам.