З самых першых дзён 2026-га рабочы графік кіраўніка дзяржавы быў надзвычай насычаны. А яшчэ пачатак года адметны вельмі моцнымі выказваннямі Прэзідэнта. Іх можна лічыць устаноўкай, як краіне і кожнаму яе грамадзяніну cёлета жыць, каб было мірнае неба і дабрабыт — тое, што ў цяперашнім свеце набывае ўсё большую каштоўнасць. Разам з экспертамі мы згадалі яскравыя цытаты Першага, якія кожны можа лічыць кіраўніцтвам да дзеяння.

«Пачынаецца вельмі важны для нас год. 2026 год мы праваліць ніяк не павінны. Новы год для нас — гэта пачатак новых спраў».

(Падчас даклада пасла Беларусі ў Расіі, 5 студзеня 2026 г.)

Намеснік старшыні Пастаяннай камісіі Савета Рэспублікі Нацыянальнага сходу па рэгіянальнай палітыцы і мясцовым самакіраванні, дырэктар ААТ «Рассвет імя К. П. Арлоўскага» Аляксандр Багель, каменціруючы тэзіс кіраўніка дзяржавы, звярнуў увагу на важнасць мадэрнізацыі, укараненне перадавых тэхналогій і супрацоўніцтва з Расіяй:

— Перад намі стаіць вельмі адказная задача на гэты год і найбліжэйшую пяцігодку — узмацніць эканоміку нашай краіны і падняцца на вышэйшую прыступку. Каб была моцная эканоміка, нашы прадпрыемствы павінны адпавядаць усім патрабаванням часу. Прычым не толькі прамысловыя, але і сельскагаспадарчыя. На фоне расійскага рынку беларуская сельская гаспадарка выглядае нядрэнна, але, каб не губляць сваіх пазіцый, трэба развіваць узаемавыгаднае супрацоўніцтва, быць яшчэ больш руплівымі. У сельскагаспадарчай вытворчасці ўкараненне новых тэхналогій і мадэрнізацыя — гэта асноўныя пункты росту. Летась, падчас наведвання Прэзідэнтам нашага прадпрыемства, было прынята рашэнне будаваць новыя цяпліцы замест старых, састарэлых. Ужо завершана работа па распрацоўцы перадпраектнай дакументацыі «Узвядзенне энергазберагальных цяпліц у ААТ «Рассвет імя К. П. Арлоўскага». Працягваем развіваць жывёлагадоўлю: вядзецца будаўніцтва малочнатаварнага комплексу на 768 галоў з пашырэннем на перспектыву да 1100 галоў. 

У раслінаводчай галіне дададзім яшчэ 5 гектараў інтэнсіўных садоў на шпалерах.

Сенатар перакананы, што сінтэз перадавой тэхнікі і кампетэнтных спецыялістаў стварае рухальную сілу, якая дазваляе дынамічна развівацца ва ўмовах сучаснага рынку, як унутранага, так і знешняга:

— Мы ўвайшлі ў новую пяцігодку, і для таго, каб не страціць сваіх пазіцый, а яшчэ больш умацаваць іх, неабходна, каб кожны на сваім месцы працаваў з аддачай. Толькі тады ў нас атрымаецца выйсці на запланаваныя рубяжы. У першыя дні новага года кіраўнік дзяржавы ставіць перад намі архіважныя задачы: нарошчваць экспарт, удасканальваць прамысловасць, развіваць сферу паслуг. Вялікая адказнасць за ўсё гэта ляжыць менавіта на рэгіёнах, і мы не павінны падвесці. У нас вялікі патэнцыял у супрацоўніцтве з Расіяй. Трэба ўмацоўваць партнёрскія сувязі, прычым па ўсіх кірунках. Менавіта ў гэтым плённым супрацоўніцтве наша моц і пункты росту.

У сваю чаргу член Пастаяннай камісіі Палаты прадстаўнікоў па жыллёвай палітыцы, гандлі і будаўніцтве Анжаліна Сырамятнікава звярнула ўвагу на планы па развіцці ў краіне гандлю, грамадскага харчавання, бытавога абслугоўвання, а таксама спажывецкай кааперацыі, якая забяспечвае вяскоўцаў:

— Праграма развіцця гандлю і грамадскага харчавання разлічана да 2030 года, а вось развіццё спажыўкааперацыі патрабуе пастаяннага кантролю і падтрымкі дзяржавы, таму яе планаванне разлічана на найбліжэйшыя два гады — 2026–2027. Галоўная мэта гандлёвай сферы: беларуская прадукцыя ў розніцы павінна складаць не менш за 60 %. Таксама важна, каб гандаль даходзіў да кожнага жыхара краіны, уключаючы самыя маленькія вёскі. Для гэтага будуць абнаўляцца аўталаўкі айчыннай вытворчасці і аптымізавацца іх маршруты. Ні для каго не сакрэт, што сучасны гандаль выйшаў за межы крам — значная частка продажаў перамешчана ў інтэрнэт. Таму да 2030 года Беларусь плануе атрымліваць не менш за 20 % рознічнага гандлю выручкі ад рэалізацыі тавараў на анлайн-пляцоўках. Для гэтага прадпрыемствам трэба будзе актыўна развіваць маркетынг і анлайн-продажы.

Парламентарый падкрэслівае, што на фоне гэтых важных планаў нельга забываць: будучыня краіны залежыць не толькі ад рашэнняў дзяржавы, але і ад выбару кожнага з нас — аддаючы перавагу беларускім таварам, мы падтрымліваем эканоміку і ўмацоўваем незалежнасць рэспублікі.

«Дух, фундамент і аснова ў нас адна — справядлівасць».

(Падчас цырымоніі прывядзення да прысягі суддзяў Канстытуцыйнага і Вярхоўнага судоў, 6 студзеня 2026 г.)

— Аснова асноў нашай дзяржавы — справядлівасць. Гэта азначае сумленнае, непрадузятае і роўнае стаўленне да ўсіх, — падкрэслівае член Пастаяннай камісіі Савета Рэспублікі па рэгіянальнай палітыцы і мясцовым самакіраванні, старшыня Гомельскага абласнога Савета дэпутатаў Кацярына Зенкевіч. — Справядлівасць забяспечваецца толькі строгім выкананнем законаў усімі членамі грамадства. Пры гэтым дзяржаўная палітыка ў нашай краіне заўсёды прытрымліваецца прынцыпу гуманнасці, стаўлення да чалавека як да вышэйшай каштоўнасці. Гэта выяўляецца ў сацыяльнай абароне і клопаце аб нашых людзях, сем’ях, падтрымцы традыцыйных каштоўнасцяў, а таксама ў актах міласэрнасці ў адносінах да асоб, якія памыліліся ў жыцці.

Парламентарый звяртае ўвагу на тое, што словы Прэзідэнта — «Дух, фундамент і аснова ў нас адна — справядлівасць» — асабліва адгукаюцца ў жыхароў Гомельшчыны:

— Наш паўднёва-ўсходні рэгіён дзесяцігоддзямі развіваецца нягледзячы на наступствы Чарнобыльскай катастрофы. Для многіх сем’яў гэта асабісты вопыт — страта дома, здароўя, звыклага ўкладу жыцця. І справядліва, што дзяржаўная падтрымка людзей не слабела ўсе гэтыя гады, а пацярпелыя тэрыторыі развіваліся, а не кансерваваліся ў статусе «праблемных».

Яна падкрэслівае, Гомельшчына — вялікая і розная. 

У кожнага раёна свой характар, свае магчымасці, свае людзі. Праграма «Адзін раён — адзін праект» якраз пра справядлівасць у развіцці, якая дае кожнаму раёну шанц абаперціся на яго моцныя бакі. Асобная і вельмі адчувальная тэма — сацыяльныя праграмы. Гэта ў тым ліку даступнасць медыцыны, развіццё міжраённых медцэнтраў, выязныя прыёмы спецыялістаў, абнаўленне ФАПаў.

— Справядлівасць і ў аплаце працы, яе умовах, калі заробак адпавядае нагрузцы, умовы працы бяспечныя, а работнік адчувае павагу да сваёй прафесіі. Справядлівасць — магчымасць для людзей быць пачутымі. Гэта і абмеркаванне мясцовых ініцыятыў, работа са зваротамі, адкрытасць улады. Калі чалавек разумее, што яго меркаванне ўлічваецца, нават складаныя рашэнні ўспрымаюцца спакайней, — канстатуе суразмоўніца.

«За Радзіму ў нас ёсць каму змагацца і ісці наперадзе. Вы, калі ласка, падумайце аб сваёй сям’і, сваіх дзецях, сваіх любімых. І памятайце: у любой складанай абстаноўцы вы павінны абараніць менавіта гэтыя святыні ў вашым жыцці. А з усяго гэтага складваецца Радзіма, абарона нашай Радзімы».

(Падчас наведвання храма іконы Божай Маці «Млекакарміцельніца», 7 студзеня 2026 г.)

— Абсалютна правільная парада для кожнага беларуса, — перакананы намеснік старшыні Пастаяннай камісіі Палаты прадстаўнікоў па міжнароднай палітыцы Алег Дзячэнка і вось чаму. — Бо многія сёння сталі забываць пра тое, што дзяржава і грамадства пачынаюцца менавіта з маральна здаровай і пажадана шматдзетнай сям’і, якая з’яўляецца не толькі сацыяльнай ячэйкай і інструментам сацыялізацыі асобы, але і найважнейшым элементам стабільнасці і ўмацавання нацыянальных інтарэсаў дзяржавы.

Дэпутат упэўнены: аб захаванні інстытута сям’і і адраджэнні традыцыйных сямейных каштоўнасцяў неабходна думаць усім, хто занепакоены лёсам сваёй краіны і роднай зямлі. Са свайго боку дзяржава прыняла ўсе меры для годнай матэрыяльнай падтрымкі маладых, шматдзетных і няпоўных сем’яў, і гэта, несумненна, мае асаблівае значэнне для нашай агульнай будучыні.

— Разам з тым і грамадзяне павінны прыкласці неабходныя намаганні для фарміравання ў сваіх сем’ях правільных каштоўнасных і маральных арыенціраў, далучэння да духоўных і дзяржаўных традыцый беларускага народа. Сям’я, дзеці, родныя і блізкія нам людзі з’яўляюцца той святыняй, каштоўнасцю, тым падмуркам, на якім у канчатковым выніку выбудоўваецца наш агульны Беларускі дом, — акцэнтуе ўвагу Алег Дзячэнка.

Ён нагадвае словы з усім вядомай савецкай песні Веніяміна Баснера «З чаго пачынаецца Радзіма»:

— Радзіма пачынаецца «з карцінкі ў тваім буквары, з добрых і верных таварышаў, якія жывуць у суседнім двары. А можа яна пачынаецца з той песні, што спявала нам маці, з таго, што ў любых выпрабаваннях у нас нікому не адняць...». І вось гэтую Радзіму, нашу Беларусь трэба абараняць заўсёды і ўсюды, асабліва ў наш шалёны час, калі ў сусветных палітычных эліт ваўчком закружылася галава ад уяўных геапалітычных поспехаў.

Напрыканцы суразмоўнік падкрэсліў:

— Сказанае на дарогу Каляднае слова Прэзідэнта Беларусі сугучна чаканням большасці беларусаў і яшчэ раз сведчыць аб адзінстве поглядаў і маральных каштоўнасцяў улады і народа.

«Мільёнам-мільёнам беларусаў трэба прымацца за працу. Задачы зразумелыя, мэты вызначаны. Хочам жыць добра — трэба выканаць тое, што мы сабе вызначылі. Таму за работу!»

(Падчас наведвання храма іконы Божай Маці «Млекакарміцельніца», 7 студзеня 2026 г.)

Гаворачы аб амбіцыйных планах на гэты год, член Пастаяннай камісіі Палаты прадстаўнікоў па міжнародных справах Аляксандр Шпакоўскі ў эфіры ток-шоу «Будні» на «Альфа Радыё» адзначыў:

— Ёсць задачы на 2026 год, ёсць Праграма сацыяльна-эканамічнага развіцця на пяцігодку, якая бурна абмяркоўвалася на Усебеларускім народным сходзе і да яго. Гэты год аб'яўлены Годам беларускай жанчыны, гэта таксама нездарма. Жанчыны — значная частка нашага грамадства. Акрамя таго, мы шмат разоў падымалі пытанні дэмаграфіі. Тут, вядома, роля жанчыны з’яўляецца першачарговай.

Дэпутат дадаў, што расхалоджвацца пасля свят нельга. У некаторых можа ўзнікнуць пытанне: чаму ў суседняй Расіі цяпер адпачываюць амаль два тыдні, а ў нас няма такой колькасці выхадных. І тут Аляксандр Шпакоўскі падкрэсліў:

— Калі разважаць па-дзяржаўнаму, кожны святочны дзень, калі мы не выходзім на працу, — гэта пэўныя выдаткі для дзяржаўнага бюджэту. А што, мы настолькі багатыя прыроднымі рэсурсамі, як нашы браты-расіяне? Маем экстэнсіўную эканоміку, здольную проста існаваць за кошт распродажы тых ці іншых сыравінных рэсурсаў? Не, вядома. Ужо неаднаразова казалі пра тое, што мы наўпрост залежым ад прадукцыйнасці працы, якасці і колькасці тавараў, што выпускаюцца, а таксама іх рэалізацыі на знешніх рынках. Вырабілі, прадалі, зарабілі — можам далей планаваць сваё дзяржаўнае развіццё. Кожны дзень прастою, натуральна, паварочваецца пэўнымі выдаткамі.

Госць праграмы рэзюмаваў:

— Мэты сапраўды вызначаны, задачы пастаўленыя. Некалькі дзён адгулялі, пара з новымі сіламі прымацца за працу. Новы год, новая старонка... За нас, за беларусаў, гэтую працу ніхто не зробіць. Ніхто нам не дапаможа. Так, у нас ёсць магутныя саюзнікі, але яны не будуць нас выцягваць і цягнуць наперад па дарозе суверэннага развіцця. Толькі самі. Выкарыстоўваючы ўнутраныя магчымасці і нашы дасягненні ў галіне знешняй палітыкі.

Па паведамленнях нашых карэспандэнтаў