У мерапрыемстве прынялі ўдзел першы намеснік кіраўніка Адміністрацыі Прэзідэнта Уладзімір Пярцоў, намеснік міністра інфармацыі Дзяніс Езерскі, намеснік міністра адукацыі Кацярына Пятруцкая (у рэжыме відэаканферэнцсувязі), памочнік Прэзідэнта — інспектар па Віцебскай вобласці Уладзімір Юргевіч, намеснік старшыні Віцебскага аблвыканкама Вячаслаў Дурноў.

Аб выніках ідэалагічнай работы ў 2025 годзе і яе стратэгічных кірунках у сваім дакладзе расказала начальнік галоўнага ўпраўлення ідэалагічнай работы і па справах моладзі Віцебскага аблвыканкама Марына Навіцкая. «Мы бачым тыя прыярытэты, на якіх павінны сканцэнтраваць сваю ўвагу: наша прысутнасць у інфармацыйным полі, работа з моладдзю, з працоўнымі калектывамі і насельніцтвам. Да ідэалагічнай работы мы абавязаны далучаць усе пласты грамадства і прысутнічаць на прадпрыемствах усіх форм уласнасці», — сказала падчас інтэрв’ю з журналістамі Марына Навіцкая. 

Гаворачы аб тых задачах, якія былі вызначаны Уладзімірам Пярцовым у час пасяджэння, яна адзначыла, што акцэнт робіцца ў першую чаргу на работу з моладдзю. «Мы павінны рыхтаваць маладых людзей да той прысутнасці ў нашым грамадстве, якая адпавядае сучасным рэаліям. Мы бачым наколькі абвостраная сітуацыя па контуры нашай краіны. Мы павінны зрабіць усё, каб наша моладзь шанавала і разумела, дзе яны жывуць, што яны павінны берагчы, на што накіроўваць свае сілы», — падкрэсліла Марына Навіцкая. 

На пасяджэнні былі анансаваны праекты, якія пройдуць у рэгіёне ў Год беларускай жанчыны. «Яны з’явяцца ў сродках масавай інфармацыі — і тэлевізійныя версіі, і версіі ў друкаваных выданнях, у сацыяльных сетках. Вядома, гэта будуць праекты патрыятычнага кірунку, дзе пакажам і паднімем на пастамент жанчыну-працаўніцу, жанчыну-маці. Будзем казаць аб тым, што сёння сямейныя каштоўнасці ў прыярытэце ў нашых грамадзян», — паведаміла Марына Навіцкая. 

Што да задач для СМІ рэгіёна Віцебскай вобласці, на яе думку, неабходна не баяцца аператыўна прымаць меры рэагавання на выяўленую грамадска-палітычную інфармацыю. Работа з насельніцтвам — адзін з ключавых кірункаў дзеянняў рэгіянальных СМІ. Ім трэба шырэй выкарыстоўваць чат-бот для ўзаемадзеяння з аўдыторыяй. Установам рэдакцыі неабходна актывізаваць намаганні па стварэнні і публікацыі ўласных аналітычных матэрыялаў. «Працаваць на апярэджанне. Казаць першым аб існуючых праблемах. Дыктаваць і перахапляць інфармацыйны парадак дня», — удакладніла Марына Навіцкая. 

Інфармацыйнае поле Віцебскай вобласці акрамя традыцыйных СМІ, інтэрнэт-рэсурсаў уключае дзяржаўныя органы ўлады, арганізацыі, прадпрыемствы, блогасферу. У мінулым годзе рэгіянальнымі СМІ было рэалізавана больш за 60 новых праектаў. На калегіі ішла размова і аб неабходнасці стварэння холдынга, які аб’яднае рэдакцыі раённай газеты і тэлебачання ў Паставах.