Член Пастаяннай камісіі Савета Рэспублікі па рэгіянальнай палітыцы і мясцовым самакіраванні, намеснік старшыні Брэсцкага абласнога выканаўчага камітэта Аляксандр Максімчук у сваёй працы пільную ўвагу ўдзяляе вырашэнню праблем людзей. Веданне таго, што насамрэч хвалюе грамадзян, дапамагае Аляксандру Аляксандравічу і ў парламенцкай дзейнасці. Як менавіта, парламентарый расказаў карэспандэнту «МС».

— Аляксандр Аляксандравіч, раскажыце, што вас прывяло ў палітыку?

— Жаданне рабіць нашу краіну для нас і наступных пакаленняў яшчэ лепш. На працягу доўгага часу працаваў у сістэме жыллёва-камунальнай гаспадаркі, знаходзіўся на кіруючай пасадзе ў Брэсцкім абласным унітарным прадпрыемстве «Упраўленне жыллёва-камунальнай гаспадаркі» і ўзначальваў гэту галіну на абласным узроўні. Тады і зразумеў, наколькі цесна пераплятаюцца пытанні галіны жыллёва-камунальнай гаспадаркі і грамадскіх адносін, прапускаючы іх праз сябе штодзённа. На мой погляд, забеспячэнне добрай якасці жыцця членаў нашага грамадства — вельмі важная функцыя заканадаўчага органа. Гэта аказвае ўплыў на стабільнасць у грамадстве. Таму, як гаворыць кіраўнік дзяржавы: «Час выбраў нас!».

— Якія задачы ставіце перад сабой у парламенцкай дзейнасці?

— У першую чаргу яны датычацца бяспекі і палітычнай стабільнасці, дабрабыту народа, стабільнай эканомікі, сістэмы сацыяльных гарантый, сацыяльнай абароны ветэранаў, пенсіянераў, пажылых людзей і, безумоўна, выхавання патрыятызму ў дзяцей і моладзі.

— У вас вялікі стаж працы ў сістэме жыллёва-камунальнай гаспадаркі. Аляксандр Аляксандравіч, ці дапамагае гэты вопыт у палітычнай дзейнасці?

— Я пачынаў сваю працоўную дзейнасць у 1997 годзе. Праца ў сферы жыллёва-камунальнай гаспадаркі вучыць быць уважлівым да кожнага чалавека, які звярнуўся па дапамогу, каб вырашыць уласныя праблемы. Яна дапамагае зразумець, што насамрэч турбуе людзей, дзе ёсць патрэба нешта дапрацаваць ці, можа, прыйшоў час штосьці змяніць. Грамадзяне, ведаючы, з чым звязана мая асноўная праца, звяртаюцца менавіта з такімі пытаннямі.

Прыклады можна прыводзіць бясконца, сістэма ЖКГ — гэта практычна ўсё, што нас акружае, гэта побыт людзей. Для некаторых пытанняў можна хутка знайсці рашэнне. На некаторыя звароты людзей варта проста знайсці больш дасканалае тлумачэнне. Але бываюць і такія просьбы, якія нельга вырашыць імгненна.

Напрыклад, грамадзянін з Баранавічаў некалькі гадоў таму звяртаўся з просьбай дапамагчы пабудаваць сеткі водазабеспячэння. Як вынік — дадзены аб’ект будаўніцтва быў уключаны ў графік чарговасці будаўніцтва сетак водазабеспячэння і водаадвядзення на наступны год. Цяпер ён пабудаваны і карыстаецца попытам. Што самае важнае — чалавек застаўся задаволены.

Аднойчы жыхарка з Ляхавічаў звярнулася да мяне, каб вырашыць пытанне па ачыстцы рэчкі Ведзьма. Усе работы зроблены, дзякуючы выдзяленню сродкаў з абласнога бюджэту ў рамках дзяржаўнай праграмы «Ахова навакольнага асяроддзя і ўстойлівае выкарыстанне прыродных рэсурсаў».

— Якую форму работы з грамадзянамі лічыце найбольш эфектыўнай?

— На мой погляд, асабістае ўзаемадзеянне — прыёмы, сустрэчы з працоўнымі калектывамі. Дзе непасрэдна камунікуеш з людзьмі, бачыш іх вочы і эмоцыі.

— Нядаўна Прэзідэнт Беларусі прызначыў вас намеснікам старшыні Брэсцкага аблвыканкама. Якія мэты плануеце ўвасабляць у жыццё?

— Хацелася б адзначыць, што гэта новы этап маёй працоўнай дзейнасці і ўвогуле жыцця. Вельмі адказны і значны. Зона маёй адказнасці — пытанні будаўніцтва, транспарту і жыллёва-камунальнай гаспадаркі. Асноўныя акцэнты кіраўніка дзяржавы, якія датычыліся будаўніцтва і ЖКГ, былі звязаны са скаргамі людзей, работай з кадрамі і дысцыплінай, перш за ўсё тэхналагічнай. Задачы, якія я асабіста для сябе вызначыў на найбліжэйшую перспектыву, — будаўніцтва аб’ектаў сацыяльнага значэння, дарог, мастоў. Вельмі важна паляпшаць дарожныя зносіны паміж невялікімі населенымі пунктамі. Планую ўдзяляць увагу якасці жыллёва-камунальных і транспартных паслуг. А ўвогуле трымаць высока зададзеную планку, выбудоўваць сістэму, якая дазволіць першаму рэгіёну быць на першых месцах у краіне!

Яна ХМЯЛЬНІЦКАЯ
Фота vitbichi.by