Сёлета каля 15 тыс. абітурыентаў скарысталіся паслугай электроннай чаргі, якая дазваляла папярэдне зарэгістравацца на зручную дату і час падачы дакументаў у ВНУ. «Гэтая інфармацыя накіроўвалася не толькі абітурыентам, але і ў ВНУ нашай краіны, якія дзякуючы гэтаму маглі карэктаваць пры неабходнасці сваю працу ў частцы арганізацыі дадатковай колькасці членаў прыёмнай камісіі для таго, каб хлопцы і дзяўчаты ў зручнай і камфортнай абстаноўцы падалі дакументы. Асабліва гэтая паслуга была запатрабавана ў іншагародніх абітурыентаў, якія падладжвалі свой візіт ва ўніверсітэты пад графік працы грамадскага транспарту. Практычна кожны трэці абітурыент скарыстаўся электроннай чаргой, мяркуем, што яна сапраўды сябе апраўдала і ў наступным годзе таксама будзе працаваць», — праінфармаваў Сяргей Пішчоў. 

Рэктар Беларускага нацыянальнага тэхнічнага ўніверсітэта Сяргей Харытончык падкрэсліў, што электронная чарга — гэта вялікая дапамога для ВНУ краіны. «Мы пазбеглі вялікай колькасці людзей у калідорах, нам не трэба было якім-небудзь чынам прагназаваць іх чаканне. Зарэгістраваўся чалавек на пэўны час і ўсё. Гэта дысцыплінуе як абітурыента - ён павінен прыйсці своечасова з цалкам падрыхтаваным пакетам дакументаў, так і ВНУ — мы адпрацоўвалі гэтыя дакументы. Атрымалася вельмі камфортная сітуацыя, што любы абітурыент затраціў каля 15 хвілін на падачу дакументаў», — адзначыў рэктар.