Намеснік старшыні ФПБ Таццяна Філімонава павіншавала юбіляра, уручыўшы падзяку старшыні ФПБ Юрыя Сянько і памятны падарунак.

— Вы — легенда, на якую трэба раўняцца ўсім: і дзеткам, якія толькі пачалі займацца фізічнай культурай, і тым, хто ўжо дасягнуў пэўных спартыўных вышынь, — звярнулася яна да віноўніка ўрачыстасці. — Вялікі вам дзякуй за тое, што вы былі разам з прафсаюзамі, падтрымліваеце фізічную культуру і спорт. Хочацца пажадаць вам моцнага здароўя, як мага даўжэй будзьце з намі.

Таццяна Філімонава падкрэсліла, што ў аснове любой сур’ёзнай справы ляжаць традыцыі, і прафсаюзны спорт таксама моцны сваімі традыцыямі.

— Такія людзі, як Эрнст Мікалаевіч Яроменка, не проста ветэраны спорту, а сапраўдныя легенды, якія ўсё сваё жыццё прысвяцілі спорту, фізічнай культуры. Будучы маладымі, услаўлялі нашу краіну на міжнароднай арэне. Далей выхоўвалі маладое пакаленне, развівалі ў тым ліку прафсаюзны спорт, — адзначыў яна. — Доўгія гады Эрнст Мікалаевіч быў намеснікам дырэктара спартыўнага клуба Федэрацыі прафсаюзаў, затым яго кіраўніком. Сёння мы бачым, што асновы, якія былі закладзены такімі людзьмі, развіваюцца і прыносяць свой плён. Цяпер мы маем дастаткова высокія вынікі сярод выхаванцаў дзіцячых прафсаюзных школ. У такіх людзей можна павучыцца любіць сваю радзіму, упэўнена ісці да пастаўленай мэты і, вядома ж, нічога не баяцца. 

Алена КРАВЕЦ