Першы канцэрт праграмы адбудзецца 26 кастрычніка. Яго падрыхтавала пастаянная арганістка Сафійскага Сабора, заслужаная артыстка Беларусі Ксенія Пагарэлая. Менавіта ёй належала ідэя арганнага фестывалю ў Полацку, дзе з’явіўся шыкоўны інструмент, выраблены адмыслова для гэтай канцэртнай залы адной з найстарэйшых чэшскіх фірм: у ім 3905 труб з розных парод дрэва і асаблівых металічных сплаваў, 48 рэгістраў, 3 ручныя клавіятуры і адмысловая сістэма нажных педаляў. Яго стварылі 40 гадоў таму, з таго часу полацкі арган лічыцца найлепшым у Беларусі, што ацанілі выдатныя айчынныя і замежныя музыканты з больш чым 20 краін. А сёлета ў фестывалі возьмуць удзел прадстаўнікі Беларусі, Расіі і Японіі.
Разам з Ксеніяй Пагарэлай у першым канцэрце творы Вольфганга Амадэя Моцарта, Вінчэнца Беліні і Францішка Брыксі выканае спявачка з Расіі Людміла Трацэўская. Але афіцыйнае адкрыццё зладзяць менавіта музыканты Полаччыны 30 кастрычніка: Ксенія Пагарэлая і мясцовы камерны аркестр «Еўропа-цэнтр» падрыхтавалі праграму да 340-годдзя Іагана Себасцьяна Баха і Георга Фрыдрыха Гендэля, найярчэйшых кампазітараў эпохі барока. Розныя грані музыкі барока збіраецца раскрыць расійская арганістка Наталля Міхайлава. Нашы музыканты Вера Латышава і трамбаніст Канстанцін Мазюк дададуць свайго адчування таго часу. А вось расійскі арганіст Аляксей Шмітаў выбраў творы славутых нямецкіх кампазітараў ХІХ стагоддзя. Арганную музыку яшчэ адной краіны — Францыі ХІХ і ХХ стагоддзяў — прадставяць нашы Кацярына Мікалаева і флейтыстка Таццяна Кармазінава.
Але арган — не толькі еўрапейская гісторыя. Сёлета госцем фестывалю «Званы Сафіі» стане японская арганістка Хірока Інаўэ, яна 2 лістапада прадставіць сольную праграму «Дзве стыхіі аргана». У яе ўвайшлі творы еўрапейскіх кампазітараў, што стваралі на працягу некалькіх стагоддзяў і працуюць цяпер, а таксама японскага аўтара Юі Какінумы. Вядома, што арганная музыка ў час італьянскага Адраджэння, калі жыў Антонія Валентэ, і сучасная, тым больш з далёкіх ад нас астравоў, — гэта сапраўды розныя карціны, створаныя гукам, што і цікава будзе адчуць.
Сем фестывальных канцэртаў (апошні з якіх адбудзецца 30 лістапада) прадэманструюць, што арган можа гучаць па-рознаму, але гэта заўсёды багаты россып гукаў. У гэтым маглі ўпэўніцца наведвальнікі папярэдніх фестываляў у Полацку. Бо адметнасць іх яшчэ і ў тым, што канцэртная зала знаходзіцца непасрэдна ў старажытным Сафійскім саборы, які мае цудоўную акустыку. Пашчасціць тым, што наведае Полацк у гэтыя дні.
Ларыса ЦІМОШЫК
