Аказалася, што эксперыментальная лазерная сістэма, якая выкарыстоўваецца вайскоўцамі, можа, па даных выдання, уяўляць «сур’ёзную небяспеку для камерцыйнай авіяцыі». Гэты інцыдэнт на некалькі гадзін увёў у хаос Эль-Паса і выклікаў буру абурэння ў Вашынгтоне, асабліва ў Пентагоне, дзе чыноўнікі спрабавалі высветліць, што ж адбылося і хто вінаваты.

Па словах заканадаўцаў і экспертаў, знаёмых з сітуацыяй, прычынай канфлікту стала непаразуменне паміж Пентагонам, Федэральным Упраўленнем грамадзянскай авіяцыі (FAA) і Міністэрствам унутранай бяспекі (DHS) у дачыненні да таго, хто нясе адказнасць за нейтралізацыю пагроз з боку беспілотнікаў над буйнымі аэрапортамі і ваеннымі базамі, і аб выкарыстанні з гэтай мэтай лазернай зброі.

У мінулым месяцы шэф Пентагона Піт Хегсет ухваліў перадачу мытна-пагранічнай службе (CBP) строга засакрэчанай лазернай сістэмы Locust кампаніі AeroVironment для выкарыстання на вайсковай базе Форт-Бліс у Эль-Паса. CBP апавясціла, у сваю чаргу, Федэральнае ўпраўленне грамадзянскай авіяцыі аб жаданні выкарыстоўваць лазерную зброю ў раёне Форт-Бліс. Аднак FAA выступіла супраць, папярэдзіўшы аб рызыцы гэтага для камерцыйнай авіяцыі. CBP праігнаравала папярэджанне і ўжыла зброю, збіўшы некалькі аб’ектаў, якія аператары ў той момант прынялі за беспілотнікі мексіканскага картэля.

Тады Федэральнае ўпраўленне грамадзянскай авіяцыі нанесла «наймацнейшы ўдар у адказ», распаўсюдзіўшы апавяшчэнне аб тым, што ў наступныя 10 дзён паветраная прастора над Эль-Паса будзе закрытая, не паставіўшы папярэдне ў вядомасць службовых асоб Белага дома, Пентагона і Міністэрства ўнутранай бяспекі аб закрыцці аэрапорта.