Экатранспарт будзе курсіраваць паміж Мінскам і гарадамі-спадарожнікамі. Машыны з запасам ходу на 100 км цяпер праходзяць выпрабаванні. Першымі іх апрабоўваюць работнікі Астравецкай АЭС.

«На наступны год мы плануем мадэрнізаваць гэты электробус, пашырыць яго аўтаномны ход да 250 км і забяспечыць магчымасць экспрэс-зарадкі. Кіраўніком дзяржавы пастаўлена задача менавіта забяспечыць прыгарадныя перавозкі электратранспартам. Таму мы актыўна ўдзельнічаем у гэтым працэсе, і ў наступным годзе абавязкова такі электробус ужо будзе перавозіць пасажыраў паміж Мінскам і Смалявічамі. У далейшым і астатнія гарады-спадарожнікі плануецца абсталяваць менавіта такім транспартам», — сказаў Алег Быцко.

Электробусы спраектаваны з папраўкай на ўмовы прыгарада: сядзенні павышанай камфортнасці, рамяні бяспекі, асаблівыя патрабаванні да трываласці кузава. Такая распрацоўка для беларускага прадпрыемства — вопыт зусім новы. Зрабіць неабходныя разлікі і разабрацца ў нюансах канструктарам дапамагалі вучоныя.