У першым туры XXXIV Міжнароднага конкурсу выканаўцаў эстраднай песні «Віцебск» 14 удзельнікаў прапануюць сусветныя хіты. Якія яшчэ мерапрыемствы сёння запланаваны на «Славянскім базары», БелТА паведамілі ў дырэкцыі фестывалю.
З раніцы на вуліцы Пушкіна майстры кавальскай справы пакажуць сябе на міжнародным свяце-конкурсе «Знiч». Аматараў вулічных перформансаў, цікавых лакацый і жывых статуй запрашаюць на фэст «На сямі вятрах».
У 10.00 у віцебскім Храме Праабражэння Гасподня прэзентуюць выставу «Святыя новапакутнікі Ясенавецкія», арганізаваную пасольствам Сербіі ў Беларусі.
У 11.00 і 13.00 у Беларускім тэатры «Лялька» дзіцячы драматычны «Тэатр ля Нарвскай брамы» пакажа спектакль «Мама і малыш». А ў 19.00 гледачы ўбачаць тут пастаноўку «Зямля продкаў», якую прадставіць Мангістаўскі абласны тэатр лялек з Казахстана. Дарэчы, калектыў упершыню прыязджае на фестывальны «Лялечны квартал».
Прэзентацыя выставы лапікавага шыцця «Падарожжа з Выльгорта ў Віцебск» адбудзецца ў 12.00 у абласным краязнаўчым музеі.
У Свята-Успенскім кафедральным саборы пройдзе свята харавой музыкі «Славянскі благавест». У ім прымуць удзел Варонежскі рускі народны хор імя К.І.Масаліцінава (Расія), хор Віцебскай духоўнай семінарыі.
На плошчу Свабоды а 13.00 запрашаюць прыхільнікаў харэаграфіі, дзе яны пабываюць на турніры нацыянальных танцаў.
Паказ мод «Рука ў руцэ» віцебскага тэатра моды «Касцюмер» у міжнародным прэс-цэнтры пройдзе ў 14.30.
«Саюзная дзяржава — дзецям» — з такім пасылам у фестывальнай сталіцы ўжо другі год арганізуюць мерапрыемствы для маладога пакалення. Сёлета сямейны мюзікл «Летуценнікі» збярэ дзяцей і дарослых, каб прадэманстраваць, што ўсё на свеце магчыма, калі ёсць запаветная мэта, жаданне яе дасягаць і мара, да якой імкнецца душа. Паказы музычнага шоу пройдуць у 16.00 і 19.00 у Канцэртнай зале «Віцебск».
Самых вясёлых і знаходлівых чакае выпрабаванне гумарам. У 17.30 у Летнім амфітэатры ў дасціпнасці будуць спаборнічаць каманды КВЗ «Зборная Краснаярска», «Саюз» і «Азія Mix».
У 18.00 у абласной філармоніі гледачы змогуць убачыць выступленне Маскоўскага ансамбля танца «Аланія». У гэтым жа час у Нацыянальным акадэмічным драматычным тэатры імя Якуба Коласа адбудзецца паказ драмы «Пяць вечароў» Маскоўскага дзяржаўнага тэатра РАСТА ў Царыцына. Пасля яго гледачы атрымаюць магчымасць паразмаўляць з артыстамі.
Паслухаць аўтарскі і сучасны джаз запрашаюць аматараў у Віцебскі дзяржаўны музычны каледж імя І.І.Салярцінскага ў 18.00.
На Пушкінскай плошчы ў 20.00 на закрыцці дзён моладзі на фестывалі збярэцца энергічная тусоўка.
