— У мінулым годзе я перавёз больш за чатыры тоны. У гэтым, калі ўсё добра будзе, думаю пабіць свой рэкорд, — сказаў Аляксандр. — Ураджай сёлета радуе, будзе вельмі добры плюс — гэта відаць па палях, па коласе.

Кожнае дасягненне ў гаспадарцы — агульная радасць. Заслужаныя ўзнагароды ў гэты дзень уручалі не толькі вадзіцелю-трохтысячніку. Тут цудоўна разумеюць, што збор ураджаю — зона адказнасці кожнага без выключэння аграрыя.

Перадавікоў уборачнай павіншаваў старшыня Гродзенскага аблвыканкама Юрый КАРАЕЎ:

— У вас душа ў полі, у вас душа з тэхнікай. Дзякуй вам вялікі, вы нас корміце! У вобласці амаль мільён чалавек, а ўвесь фокус увагі засяроджаны цяпер на некалькіх тысячах, якія працуюць у сельскай гаспадарцы. Эканоміка вобласці складаецца з працы гэтых людзей.

Тэмп уборкі ў ААТ «Чарлена» набірае абароты, адзначыў дырэктар гаспадаркі Андрэй ЛЯШКЕВІЧ:

— На сённяшні дзень мы ўбралі 29 % плошчы. Скончылі ўборку азімага рапсу — намалацілі 4,5 тысячы тон пры ўраджайнасці 55,7 ц/га. Цешаць нас і азімыя збожжавыя. Дзякуючы згуртаванасці камбайнераў, спецыялістаў, думаю, на працягу 10 дзён уборка будзе завершана. У нас тры зернесушыльныя комплексы, усе магутнасці загружаны.

У цэлым жа на Мастоўшчыне ўбрана трэць ураджаю збожжавых, зернебабовых.

— Тэхніка працуе спраўна, настрой у механізатараў добры. Усё ідзе ў патрэбных тэмпах, — падкрэсліў першы намеснік старшыні — начальнік упраўлення сельскай гаспадаркі і харчавання Мастоўскага райвыканкама Раман РУБЛІК.

Віктар ЛЮБІМАЎ
Фота БелТА